ຄໍາມ່ວນ ຈັດງານສະເຫຼີມສະຫຼອງປີໃໝ່ລາວ

ແຂວງຄໍາມ່ວນໄດ້ຈັດພິທີບາສີສູ່ຂວັນ ແລະ ຫົດສົງນໍ້າອວຍພອນການນໍາພັກ-ລັດ ແຂວງຄໍາມ່ວນ ແລະ ອະດີດການນໍາຂອງແຂວງ, ເນື່ອງໃນໂອກາດສົ່ງທ້າຍປີເກົ່າ ພສ 2566 ແລະ ຕ້ອນຮັບປີໃໝ່ລາວ ພສ 2567 ຂຶ້ນໃນວັນທີ 12 ເມສານີ້ ທີ່ເຮືອນຮັບແຂກເລກ 1 ແຂວງໂດຍການເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາທ່ານການນໍາຂອງແຂວງ, ພະແນກການ, ພະນັກງານປະຕິວັດອາວຸໂສບໍານານ, ອົງການຈັດຕັ້ງມະຫາຊົນ, ບັນດາພາກສ່ວນທຸລະກິດ ແລະ ແຂກຖືກເຊີນເຂົ້າຮ່ວມ.
ທ່ານ ວັນໄຊ ພອງສະຫວັນ ໃນນາມຕາງໜ້າການນໍາພັກ-ລັດ ຂອງແຂວງ ໄດ້ມີຄໍາເຫັນຕໍ່ພິທີວ່າ : ພິທີບາສີ-ສູ່ຂວັນໃຫ້ການນໍາ-ອະດີດການນໍາຂອງແຂວງ ເນື່ອງໃນໂອກາດຕ້ອນຮັບປີໃໝ່ລາວ ພສ 2567 ທີ່ຈະມາເຖິງນີ້, ແມ່ນໃນທ່າມກາງບັນຍາກາດອັນເບີກບານມ່ວນຊື່ນ ທີ່ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດເວົ້າລວມ, ເວົ້າສະເພາະປະຊາຊົນລາວບັນດາເຜົ່າຊາວແຂວງຄໍາມ່ວນພວກເຮົາ ພວມເບີກບານມ່ວນຊື່ນກັບບັນຍາກາດສະເຫຼີມສະຫຼອງສົ່ງທ້າຍປີເກົ່າ ປີເຖາະ ພໍສໍ 2566 ແລະ ຕ້ອນຮັບປີໃໝ່ລາວ ປີມະໂລງ  ພໍສໍ 2567 ຊຶ່ງເປັນປາງບຸນໃຫຍ່ ຂອງປວງຊົນລາວທັງຊາດ ໄດ້ໜູນວຽນມາບັນຈົບຄົບຮອບອີກວາລະໜຶ່ງ.
ພິທີບາສີ-ສູ່ຂວັນກໍ່ແມ່ນກິດຈະກໍາທີ່ສໍາຄັນຂອງງານບຸນປີໃໝ່ລາວ ເພື່ອເປັນການເສີມຂະຫຍາຍມູນເຊື້ອອັນດີງາມຂອງຊາດລາວເຮົາທີ່ເຄີຍປະຕິບັດຜ່ານມາ ແລະ ເພື່ອສະແດງຄວາມຮູ້ບຸນຄຸນ ຕໍ່ການນໍາພັກ-ລັດ ເວົ້າລວມ, ເວົ້າສະເພາະ ການນໍາ-ອະດີດການນໍາຂອງແຂວງ, ອະດີດການນໍາຂອງເມືອງ, ຂໍຖືໂອກາດອັນເລີກງາມຍາມດີ ແລະ ເປັນສິລິມຸງຄຸນນີ້ ຂໍອວຍພອນໄຊອັນປະເສີດ ມາຍັງການນໍາຂອງແຂວງ, ອະດີດການນໍາຂອງແຂວງ, ພະແນກການ,  ອົງການທຽບເທົ່າອ້ອມຂ້າງແຂວງ, ແຂກທີ່ມີກຽດທຸກທ່ານຈົ່ງມີສຸຂະພາບເຂັ້ມແຂງ, ມີພາລານາໄມສົມບູນ, ສຸກກາຍສຸກໃຈ, ປາດສະຈາກໂລກໄພໄຂ້ເຈັບ ແລະ ປະສົບຜົນສຳເລັດໃນໜ້າທີ່ວຽກງານທຸກປະການ, ພ້ອມກັນຮ່ວມສະເຫຼີມສະ ຫຼອງວັນບຸນປີໃໝ່ລາວ ຢ່າງເບີກບານມ່ວນຊື່ນຕາມຮີດຄອງປະເພນີ ບົນຈິດໃຈປະຢັດມັດທະຍັດ ແລະ ພ້ອມກັນຈັດຕັ້ງປະຕິບັດບັນດາມາດຕະການ ແລະ ລະບຽບການຕ່າງໆ ທີ່ການຈັດຕັ້ງວາງອອກໃນການຫຼີ້ນບຸນປີໃໝ່ ຢ່າງເຂັ້ມງວດ.
(ຂ່າວ: ມະນີວັນ, ພາບ: ກອງຄໍາ)