ຄໍາມ່ວນ ສະຫຼຸບຂະບວນການແຂ່ງຂັນ-ຍ້ອງຍໍຮັກຊາດ ແລະ ພັດທະນາ ປີ 2023

ກອງປະຊຸມສະຫຼຸບວຽກງານຂະບວນການແຂ່ງຂັນພາຍໃຕ້ຄໍາຂວັນ “ຮັກຊາດແລະພັດທະນາ” ປີ 2023 ຂອງ 5 ຂະແໜງການທີ່ຂຶ້ນກັບຫ້ອງວ່າການແຂວງຄໍາມ່ວນໄດ້ຈັດຂຶ້ນໃນວັນທີ 14 ກຸມພາ ຜ່ານມາ ຢູ່ທີ່ເຮືອນ ຮັບແຂກເລກ 1 ຂອງແຂວງໂດຍການເຂົ້າຮ່ວມຂອງ ທ່ານ ວົງເພັດ ຈິດປັນຍາ ຮອງເລຂາພັກແຂວງ ຜູ້ຊີ້ນໍາວຽກ ງານການເມືອງ-ແນວຄິດ, ວຽກງານພັກ-ພະນັກງານ, ທ່ານ ໝັ້ນຍືນ ຄີນສະໝອນ ຫົວໜ້າຫ້ອງວ່າການແຂວງ, ມີພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ພາກອນ ແກ້ວມະນີ ຮອງຫົວໜ້າຫ້ອງວ່າການແຂວງໄດ້ຜ່ານບົດສະຫຼຸບການຈັດຕັ້ງປະຕິບັດເນື້ອ ໃນຂໍ້ແຂ່ງຂັນ “ຮັກຊາດແລະພັດທະນາ ”ປະຈໍາປີ 2023 ຊຶ່ງໄດ້ຍົກໃຫ້ເຫັນຜົນງານພົ້ນເດັ່ນທີ່ຍາດມາໄດ້ໃນໄລຍະ 1 ປີຜ່ານມາ ລວມເຖິງການຕີລາຄາດ້ານດີ-ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ສືບຕໍ່ຈັດຕັ້ງປະຕິບັດໃນຕໍ່ໜ້າ ພ້ອມທັງການຜ່ານຂໍ້ຕົກລົງວ່າດ້ວຍການເປີດຂະບວນການແຂ່ງຂັນຍ້ອງຍໍ ແລະ ແຜນການເຄື່ອນໄຫວປະຈຳປີ 2024. ພ້ອມນີ້ ຕາງໜ້າຈາກ 5 ຂະແໜງການຍັງໄດ້ຂຶ້ນຈັບມືເພື່ອສືບຕໍ່ຈັດຕັ້ງປະຕິບັດຂະບວນການແຂ່ງຂັນ-ຍ້ອງຍໍພາຍໃຕ້ຄໍາຂວັນ "ຮັກຊາດ ແລະ ພັດທະນາ" ປະຈໍາປີ 2024.
ໂອກາດນີ້, ທ່ານ ວົງເພັດ ຈິດປັນຍາ ໄດ້ມີຄໍາເຫັນໂອ້ລົມຊຶ່ງທ່ານກ່າວສະແດງຄວາມຍ້ອງຍໍຊົມເຊີຍ ຕໍ່ຜົນງານກໍຄືຜົນສໍາເລັດທີ່ ຍາດມາໄດ້ໃນໄລຍະ 1 ປີຜ່ານມາ ພ້ອມກັນນັ້ນ ທ່ານຍັງໄດ້ຍົກໃຫ້ເຫັນເຖິງພາ ລະບົດບາດ, ຄວາມໝາຍ, ຄວາມສໍາຄັນຂອງວຽກງານ 5 ຂະແໜງການທີ່ເຮັດໜ້າທີ່ເປັນເສນາທິການໃຫ້ແກ່ຫ້ອງ ວ່າການແຂວງກໍຄືການເຮັດໜ້າທີ່ບໍລິການ, ອໍານວນຄວາມສະດວກໃຫ້ກັບທຸກຂົງເຂດວຽກງານຊຶ່ງຫ້ອງວ່າການ ແຂວງເປັນສ່ວນໜຶ່ງໃນລະບົບບໍລິຫານຂອງລັດທີ່ເຮັດໜ້າທີ່ເປັນກົນໄກປະສານງານກັບແຕ່ລະຂັ້ນໃນການຈັດຕັ້ງປະຕິບັດມະຕິ, ຄໍາສັ່ງຕ່າງໆ. ພ້ອມນັ້ນ ທ່ານຍັງໄດ້ເນັ້ນໃຫ້ສືບຕໍ່ເພີ່ມທະວີເຮັດໜ້າທີ່ເປັນເສນາທິການໃຫ້ການນໍາຂັ້ນ ແຂວງ, ເອົາໃຈໃສ່ໃນການຄົ້ນຄວ້າວິເຄາະ, ວິໄຈບັນຫາ, ເອົາໃຈໃສ່ການຄຸ້ມຄອງເອກະສານຂາເຂົ້າ-ຂາອອກ, ຕະຫຼອດເຖິງການປົກປັກຮັກສາ ແລະ ສໍາເນົາເອກະສານທີ່ມີຄວາມສໍາຄັນ, ການຮັກສາເອກະສານລັບ, ຂອດການຈາລະຈອນເອກະສານລວມເຖິງງານພິທີການຕ່າງໆຕ້ອງໃຫ້ວ່ອງໄວທັນເຫດການ, ມີຄວາມໂລ່ງລ່ຽນ, ມີຄວາມສາມັກຄີພາຍໃນໃຫ້ເປັນປຶກແຜ່ນ ເຂັ້ມແຂງ ແລະ ພ້ອມກັນສືບຕໍ່ຈັດຕັ້ງປະຕິບັດ ຂັບເຂື່ອນວຽກງານ ໃນຂົງເຂດຫ້ອງວ່າການແຂວງໃຫ້ມີຜົນສຳເລັດ.
(ຂ່າວ-ພາບ: ກອງຄຳ)