ຄໍາມ່ວນ-ເຫງ່ອານ ພົບປະແລກປ່ຽນກ່ຽວກັບການສ້າງຕັ້ງເຂດນິຄົມອຸດສາຫະກໍາ

ກອງປະຊຸມພົບປະແລກປ່ຽນບົດຮຽນກ່ຽວກັບການສ້າງຕັ້ງເຂດນິຄົມອຸດສາຫະກໍາ ລະຫວ່າງ ຄະນະຜູ້ແທນແຂວງຄໍາມ່ວນ ສປປ ລາວ ແລະ ຄະນະຜູ້ແທນແຂວງເຫງ່ອານ ສສ ຫວຽດນາມ ໄດ້ຈັດຂຶ້ນໃນວັນທີ 10 ເມສາຜ່ານມາ ທີ່ເຮືອນຮັບແຂກເລກ 1 ແຂວງຄໍາມ່ວນ. ຄະນະຜູ້ແທນແຂວງຄໍາມ່ວນນໍາໂດຍສະຫາຍ ແກ້ວອຸດອນ ບຸດສິງຂອນ ຄະນະປະຈໍາພັກແຂວງ ຮອງເຈົ້າແຂວງຄໍາມ່ວນ, ຄະນະຜູ້ແທນແຂວງເຫງ່ອານນໍາໂດຍສະຫາຍ ບຸ໋ຍ ແທັງ ອານ ຄະນະປະຈໍາພັກແຂວງ ຮອງປະທານຄະນະກຳມະການປະຊາຊົນແຂວງ, ໂດຍມີຜູ້ແທນທັງສອງຝ່າຍເຂົ້າຮ່ວມ.
ການພົບປະຄັ້ງນີ້, ສອງຝ່າຍໄດ້ຜັດປ່ຽນກັນລາຍງານສະພາບໂດຍລວມກ່ຽວກັບການພັດທະນາເສດຖະກິດ-ສັງຄົມ ແລະ ທີ່ຕັ້ງ, ທ່າແຮງຂອງແຕ່ລະແຂວງ, ຕະຫຼອດເຖິງການພົວພັນຮ່ວມມືໃນຜ່ານມາ ໂດຍສະເພາະດ້ານວຽກງານນິຄົມອຸດສາຫະກໍາຂອງແຂວງ ຄໍາມ່ວນ - ເຫງ່ອານ. ສໍາລັບການລົງທຶນຂອງ ສສ ຫວຽດນາມ ຢູ່ແຂວງຄໍາມ່ວນ ມີ 37 ໂຄງການ, ມີມູນຄ່າການລົງທຶນທັງໝົດ 549 ລ້ານກວ່າໂດລາ. ພ້ອມນີ້ ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນເປັນຕົ້ນແມ່ນບັນຫາກ່ຽວກັບການສ້າງຕັ້ງນິຄົມອຸດສາຫະກຳຢູ່ແຂວງຄໍາມ່ວນ, ທີ່ຕັ້ງພູມສັນຖານ, ນິຕິກຳຕ່າງໆ ທີ່ກ່ຽວຂ້ອງ ລວມເຖິງນະໂຍບາຍ ເພື່ອດຶງດູດສົ່ງເສີມການລົງທຶນໃຫ້ແກ່ນັກທຸລະກິດທີ່ມາລົງທຶນຢູ່ເຂດນິຄົມອຸດສາຫະກຳ.
ໃນວັນດຽວກັນນັ້ນ ຄະນະຜູ້ແທນແຂວງເຫງ່ອານ ຍັງໄດ້ເດີນທາງໄປຢ້ຽມຢາມສັກກະລະບູຊາຮູບຫລໍ່ ປະທານ ໂຮ່ຈິມິນ ທີ່ອະນຸສອນສະຖານປະທານໂຮ່ຈິມິນ ທີ່ບ້ານຊຽງຫວາງ ເມືອງໜອງບົກ ແລະ ທັດສະນະສຶກສາຢ້ຽມຊົມເຂດນິຄົມອຸດສາຫະກໍາຂອງ ບໍລິສັດ ຊີໂນ-ອາກຣີ ໂປຕາສ ຈໍາກັດ.
(ຂ່າວ: ມະນີວັນ)