ແຫຼ່ງຂ່າວຈາກ ແຂວງຫຼວງພະບາງ ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ນາງວິລະວອນ ພັນທະວົງ ຮອງຫົວໜ້າ ຄະນະໂຄສະນາອົບຮົມສູນກາງພັກ(ຄອສພ)ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງຈອມເພັດ ແຂວງຫຼວງພະບາງ ໂດຍມີການນຳຂອງເມືອງ, ທີມງານສູນກາງ-ແຂວງ-ເມືອງ, ຕະຫຼອດຮອດ ພະນັກງານຫຼັກແຫຼ່ງທົ່ວເມືອງໃຫ້ການຕ້ອນຮັບ.
ໂອກາດນີ້, ທ່ານ ວັນໄຊ ບົວລະພັນ ຫົວໜ້າໂຄສະນາອົບຮົມເມືອງຈອມເພັດ ໄດ້ລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດແຜນພັດທະນາ ຂອງຫ້ອງການໂຄສະນາອົບຮົມເມືອງ, ໃນໄລຍະ 1 ປີຜ່ານມາ ຄະນະໂຄສະນາອົບຮົມເມືອງ ເຮັດໜ້າທີ່ເປັນເສນາທິການ ໃຫ້ແກ່ຄະນະປະຈຳພັກເມືອງ ແລະ ຄະນະໂຄສະນາອົບຮົມແຂວງ, ໂດຍໄດ້ຄົ້ນຄວ້າ, ຄັດຈ້ອນ ບັນດາເອກະສານສຳຄັນຂອງພັກ-ຂອງຊາດ ມອບໃຫ້ຄະນະໜ່ວຍພັກ ຫົວໜ້າຫ້ອງການ ຜູ້ຮັບຜິດຊອບແຕ່ລະວຽກ ໄດ້ນຳເອົາໄປເຜີຍແຜ່, ເຊື່ອມຊຶມ, ໃຫ້ບັນດາພະນັກງານ, ທະຫານ-ຕຳຫຼວດ ແລະ ປະຊາຊົນບັນດາເຜົ່າໃນທົ່ວເມືອງ, ເຮັດໃຫ້ທຸກຊັ້ນຄົນ ມີຄວາມຮັບຮູ້ ຕໍ່ແນວທາງຂອງພັກ-ລະບຽບກົດໝາຍຂອງລັດ ຢ່າງເລິກເຊິ່ງ, ປະກອບສ່ວນຢ່າງຕັ້ງໜ້າ ຕໍ່ການພັດທະນາເສດຖະກິດ-ສັງຄົມຂອງເມືອງ ເຮັດໃຫ້ທົ່ວເມືອງໄດ້ຮັບການພັດທະນາຕາມທິດທາງທີ່ຕັ້ງໄວ້ ທັງມີຄວາມສະຫງົບ ຄວາມເປັນລະບຽບຮຽບຮ້ອຍໂດຍພື້ນຖານ.
ຈາກນັ້ນ, ທ່ານຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ເນັ້ນໃຫ້ຄະນະພັກ, ຄະນະນຳທຸກຂັ້ນ ຈົ່ງສືບຕໍ່ເອົາໃຈໃສ່ຕໍ່ວຽກງານໂຄສະນາ-ສຶກສາອົບຮົມທຸກຊັ້ນຄົນ ມີຄວາມເຊື່ອໝັ້ນ ຕໍ່ການນຳພາຂອງພັກ, ປະກອບສ່ວນ ຕ້ານປະກົດການຫຍໍ້ທໍ້; ສຸມໃສ່ສົ່ງພະນັກງານລົງກໍ່ສ້າງຮາກຖານການເມືອງ, ປັບປຸງອົງການປົກຄອງບ້ານ ໂດຍຖືສຳຄັນ 4 ເນື້ອໃນ 4 ຄາດໝາຍຕິດພັນກັບວຽກງານສາມສ້າງ ແນໃສ່ສ້າງພື້ນຖານໂຄງລ່າງໃນຊົນນະບົດໄດ້ຮັບການພັດທະນາ, ສ້າງອາຊີບທີ່ໝັ້ນທ່ຽງຕາມທ່າແຮງ ເພື່ອປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ພ້ອມກັນນີ້, ທ່ານຍັງໄດ້ມອບເຄື່ອງສຽງ ໃຫ້ຫ້ອງການໂຄສະນາອົບຮົມເມືອງຈອມເພັດ ຕື່ມອີກ.
ໃນໂອກາດດຽວກັນ, ທ່ານ ນາງວິລະວອນ ພັນທະວົງ ພ້ອມຄະນະ ກໍໄດ້ໄປຊົມສວນຜັກປອດສານພິດຂອງປະຊາຊົນ, ທັງມີຄຳເຫັນເນັ້ນ ໃຫ້ພາກສວນທີ່ກ້ຽວຂ້ອງ ລົງຊຸກຍູ້, ນຳເອົາແນວພັນ, ເຕັກນິກວິຊາການລົງນຳພາປະຊາຊົນ ແລະ ກຳນົດຈຸດສຸມ, ສ້າງເປັນກຸ່ມຜະລິດ ຕາມທ່າແຮງຂອງແຕ່ລະເຂດ.
(ຂ່າວ: ຕາດຳ ກະເສີມສຸກ)
ຄໍາເຫັນ