ວັນທີ 18 ມີນາ ນີ້, ຄະນະນຳກະຊວງປ້ອງກັນປະເທດ, ຄອບຄົວການນຳຂັ້ນສູງ ແລະ ຄອບຄົວ ສຸຍະວົງ ກໍຄື ບໍລິສັດ PSL ໄດ້ລົງເຄື່ອນໄຫວຢ້ຽມຢາມ ແລະ ມອບເຄື່ອງໃຫ້ແກ່ ສູນເສຍອົງຄະພິເສດ 790, ສູນເສຍອົງຄະ 489 ແລະ ສູນອົງຄະທຽມ 686 ເນື່ອງໃນໂອກາດລະນຶກວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ (21 ມີນາ 1946-21 ມີນາ 2024), ໂດຍມີ ສະຫາຍ ພົນໂທ ທອງລອຍ ສິລິວົງ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນປະເທດ ຫົວໜ້າກົມໃຫຍ່ການເມືອງກອງທັບ, ທ່ານ ປ້າ ນາລີ ສີສຸລິດ ພັນລະຍາປະທານປະເທດແຫ່ງ ສປປ ລາວ ພ້ອມດ້ວຍຄະນະ, ມີບັນດາຄະນະນຳກະຊວງປ້ອງກັນເທດ, ຄອບຄົວການນຳຂັ້ນສູງ, ພະນັກງານອະວຸໂສບຳນານ ອະດີດນາຍ ແລະ ພົນທະຫານເຂົ້າຮ່ວມ.
ເຄື່ອງທີ່ນຳມອບໃນຄັ້ງນີ້ປະກອບມີ: ອຸປະກອນການແພດ, ເຄື່ອງອຸປະໂພກ-ບໍລິໂພກ ເຂົ້າສານ, ນ້ຳດື່ມ, ໂຕະ, ຕູ້, ແອ, ຄອມພິວເຕີຕັ້ງໂຕະ, ເຄື່ອງປິ່ນເອກະສານ ພ້ອມອຸປະກອນຄົບຊຸດ ແລະ ເງິນສົດຈຳນວນໜຶ່ງ ລວມມູນຄ່າທັງໝົດ 1 ຕື້ກີບ ຊຶ່ງຕະຫຼອດໄລຍະເວລາຜ່ານມາ ຍາມໃດພັກ-ລັດ ກໍໄດ້ເອົາໃຈໃສ່ເບິ່ງແຍງດູແລໃກ້ຊິດຕິດແທດຕາມຄວາມສາມາດ ແລະ ກໍາລັງທີ່ມີດ້ວຍຄວາມເປັນຫ່ວງເປັນໃຍ ຄືກັບຄົນຢູ່ໃນຄອບຄົວດຽວກັນ, ພະຍາຍາມຊອກຫາທຸກວິທີທາງເພື່ອຊ່ວຍເຫຼືອ ແລະ ອໍານວຍຄວາມສະດວກໃຫ້ແກ່ພະນັກງານຜູ້ເສຍອົງຄະ ບໍ່ວ່າຈະເປັນທາງດ້ານການເງິນງົບປະມານ, ດ້ານວັດຖຸ ແລະ ຈິດໃຈ ໃນການປະຕິບັດນະໂຍບາຍດ້ານຕ່າງໆ ຕໍ່ພະນັກງານເສຍອົງຄະ ຍ້ອນການສູ້ຮົບ ແລະ ຮັບໃຊ້ການສູ້ຮົບ, ພະນັກງານບໍານານ ແລະ ພະນັກງານຜູ້ມີຜົນງານ ແລະ ຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ຕາມນິຕິກໍາ ແລະ ຄວາມສາມາດຕົວຈິງ.
ຂ່າວ-ພາບ: ນາງ ນົກ ບຸນມາເລີດ
ຄໍາເຫັນ