ຢ້ຽມຊົມເຂດເສດຖະກິດກວມລວມໄຊເສດຖາ ເມືອງໄຊເສດຖາ ນະຄອນຫຼວງວຽງຈັນ (ນວ)ໃນວັນທີ 10 ພະຈິກຜ່ານມາ, ໃນໂອກາດທີ່ຄະນະຜູ້ແທນພີ່ນ້ອງເຊື້ອຊາດລາວ ຢູ່ຕ່າງປະເທດເດີນທາງມາຮ່ວມກອງປະຊຸມພົບປະພີ່ນ້ອງເຊື້ອຊາດລາວຢູ່ຕ່າງປະເທດຄັ້ງປະຖົມມະລືກ ພາຍໃຕ້ຄໍາຂວັນ “ຮັກບ້ານເກີດ”ໃນລະຫວ່າງວັນທີ 9-15 ພະຈິກ 2024 ນີ້ທີ່ນວ.
ການໄປຢ້ຽມຊົມເຂດເສດຖະກິດກວມລວມໄຊເສດຖາໃນຄັ້ງນີ້, ພີ່ນ້ອງເຊື້ອຊາດລາວໄດ້ຮັບຟັງການນຳສະເໜີກ່ຽວກັບຄວາມເປັນມາໃນການພັດທະນາເຂດເສດຖະກິດດັ່ງກ່າວ. ໃນໂອກາດນີ້, ພີ່ນ້ອງເຊື້ອຊາດລາວທີ່ໄດ້ຮັບຟັງກໍໄດ້ໃຫ້ຄວາມສົນໃຈເປັນຢ່າງຍິ່ງ ແລະ ຕັ້ງຄຳຖາມຢ່າງກົງໄປກົງມາກ່ຽວກັບສະພາບການພັດທະນາ, ການລົງທຶນ ແລະ ແນວທາງການຈັດການບໍລິຫານເຂດເສດຖະກິດດັ່ງກ່າວໃນອະນາຄົດຊຶ່ງຄະນະຮັບຜິດຊອບກໍໄດ້ອະທິບາຍບັນດາຂໍ້ຂ້ອງໃຈຕ່າງໆໄດ້ຢ່າງຈະແຈ້ງເຮັດໃຫ້ພີ່ນ້ອງເຊື້ອຊາດລາວໄດ້ຮັບຊາບຢ່າງລະອຽດຈະແຈ້ງ. ພ້ອມນີ້, ໃນຕອນແລງຂອງວັນດຽວກັນ, ຄະນະພີ່ນ້ອງເຊື້ອຊາດລາວ ກໍໄດ້ທ່ຽວຊົມເມືອງວຽງຈັນໃນຍາມກາງຄືນ ແລະ ຢ້ຽມຊົມບາງສະຖານທີ່ສຳຄັນເຊັ່ນ: ຂຶ້ນຢ້ຽມຊົມໂຮງແຮມລາດຊະວົງວັນດ້າ ວິສຕ້າ ເພື່ອຊົມທິວທັດອັນສວຍສົດງົດງາມຂອງຕົວເມືອງວຽງຈັນ, ໄຫວ້ຮູບປັ້ນເຈົ້າອານຸວົງແລະ ຢ້ຽມຊົມປະຕູໄຊ,ຮ່ວມງານລ້ຽງຕ້ອນຮັບຊຶ່ງຈັດໂດຍຄະນະພັກ, ສະພາປະຊາຊົນ ແລະ ອົງການປົກຄອງນວ ຊຶ່ງໃນງານລ້ຽງດັ່ງກ່າວ, ທ່ານ ພູວົງ ວົງຄຳຊາວຮອງເຈົ້າຄອງນວ ຍັງໄດ້ແຈ້ງກ່ຽວກັບສະພາບການພັດທະນາທາງດ້ານເສດຖະກິດ-ສັງຄົມ ຢູ່ພາຍໃນນວ ໃຫ້ພີ່ນ້ອງເຊື້ອຊາດລາວໄດ້ຮັບຟັງ ແລະ ເຂົ້າໃຈຢ່າງຈະແຈ້ງຕື່ມອີກ.
ໂອກາດດຽວກັນ, ໃນວັນທີ 11 ພະຈິກຜ່ານມາ, ຄະນະຜູ້ເເທນຄົນເຊື້ອຊາດລາວລວມທັງພີ່ນ້ອງເຊື້ອຊາດລາວທີ່ດຳລົງຊີວິດ ແລະ ດຳເນີນທຸລະກິດຢູ່ລາວ ແລະ ແຂກຖືກເຊີນຈາກພາຍໃນປະມານ 500 ຄົນ ທີ່ມາຈາກປະເທດຕ່າງໆ ໄດ້ທ່ຽວຊົມສວນພຶກສາ ເມືອງນາຊາຍທອງ ນວ ແລະ ເຂົ້າຮ່ວມພິທີບາສີສູ່ຂວັນ ຊຶ່ງເປັນໜຶ່ງໃນກິດຈະກໍາສໍາຄັນໃນການຕ້ອນຮັບພີ່ນ້ອງຄົນເຊື້ອຊາດລາວ ທີ່ດໍາລົງຊີວິດຢູ່ຕ່າງປະເທດໂດຍມີທ່ານຈັນເພັງ ສຸດທິວົງ ຮອງປະທານ ສນຊ ,ທ່ານ ພູວົງ ພະມີສິດ ປະທານກຸ່ມບໍລິສັດ ຄໍາພູວົງເຈົ້າຂອງສວນພຶກສາໂດຍມີການນໍາຂັ້ນສູງພັກ-ລັດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມໃຫ້ການຕ້ອນຮັບຢ່າງສົມກຽດ.
ໂອກາດນີ້, ທ່ານ ຈັນເພັງ ສຸດທິວົງ ຕາງໜ້າພັກ-ລັດຖະບານ ກໍຄືຄະນະປະຈໍາສນຊ ຮູ້ສຶກເປັນກຽດ ເເລະ ພາກພູມໃຈ ທີ່ໄດ້ນໍາພາຄະນະຜູ້ແທນພີ່ນ້ອງເຊື້ອຊາດລາວຢູ່ຕ່າງປະເທດ ເຂົ້າຮ່ວມພິທີບາສີສູ່ຂວັນໃນຄັ້ງນີ້ ຊຶ່ງຖືເປັນຄວາມພາກພູມໃຈ ແລະ ເປັນການຢືນຢັນເຖິງຈິດໃຈຄວາມສາມັກຄີຮັກແພງລະຫວ່າງພີ່ນ້ອງຄົນເຊື້ອຊາດລາວຢູ່ຕ່າງປະເທດ ແລະ ພີ່ນ້ອງຊາວລາວບັນດາເຜົ່າທີ່ອາໃສຢູ່ພາຍໃນປະເທດ, ທີ່ມີນໍ້າໃຈຮັກເຊື້ອແພງຊາດ, ມີວັດທະນະທໍາຮີດຄອງປະເພນີອັນດີງາມ ແລະ ມີພາສາປາກເວົ້າ ແລະ ບ້ານເກີດເມືອງນອນອັນດຽວກັນ.ໂອກາດທີ່ມາທ່ຽວຊົມສວນພຶກສາໃນຄັ້ງນີ້,ພີ່ນ້ອງຄົນເຊື້ອຊາດລາວຢູ່ຕ່າງປະເທດໄດ້ທ່ຽວຊົມພິພິທະພັນຊົນເຜົ່າ ແລະ ເຮືອນຊົນເຜົ່າທີ່ສື່ເຖິງການດໍາລົງຊີວິດຂອງປະຊາຊົນບັນດາຊົນເຜົ່າຕ່າງໆທີ່ຢູ່ໃນລາວ, ສື່ໃຫ້ເຫັນເຖິງວັດທະນະທໍາຮີດຄອງປະເພນີອັນດີງາມຂອງຊາດລາວ. ສໍາລັບສວນພຶກສາເປັນສະຖານທີ່ທ່ອຽທ່ຽວສໍາຄັນອີກແຫ່ງໜຶ່ງທີ່ໄດ້ນໍາເອົາເຄື່ອງເກົ່າ, ວິຖີຊີວິດຂອງເຜົ່າຕ່າງໆມາວາງສະແດງເພື່ອໃຫ້ຜູ້ມາທ່ຽວຊົມໄດ້ສຶກສາຮຽນຮູ້ກ່ຽວກັບຊົນເຜົ່າທີ່ມີໃນລາວ.
(ຂ່າວ: ວັນເພັງ, ພາບ: ແສງຈັນ)
ຄໍາເຫັນ