ທ່ານ ເຝີງ ຈູຢາງ (Feng Junyang) ຮອງຫົວໜ້າພະແນກໂຄສະນາອົບຮົມ ຄະນະພັກແຂວງຢຸນນານ ສປ ຈີນ ພ້ອມຄະນະໄດ້ເດີນທາງມາຮອດສະຖານີລົດໄຟນະຄອນຫຼວງວຽງຈັນ ສປປ ລາວ ໃນຕອນແລງວັນທີ 14 ມັງກອນນີ້ ໂດຍແມ່ນທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ ສຽງຂອງສູນກາງພັກ ໃຫ້ກຽດຕ້ອນຮັບຢ່າງສົມກຽດ. ເນື່ອງໃນໂອກາດທີ່ຄະນະຜູ້ແທນ ສປ ຈີນ ເດີນທາງມາເຂົ້າຮ່ວມກິດຈະກຳວັດທະນະທໍາບຸນກຸດຈີນກ້າວເຂົ້າສູ່ປະເທດລາວ ພາຍໃຕ້ຫົວຂໍ້ ດື່ມນໍ້າສາຍດຽວ ກົມກຽວດັ່ງຄອບຄົວດຽວກັນ ປີ 2025 ໃນລະຫວ່າງວັນທີ 15-16 ມັງກອນ 2025 ທີ່ນະຄອນຫຼວງວຽງຈັນ.
ໃນໂອກາດນີ້, ທ່ານ ວັນໄຊ ຕະວິນຍານ ໄດ້ກ່າວຍິນດີຕ້ອນຮັບຄະນະຜູ້ແທນ ສປ ຈີນ ຢ່າງສົມກຽດ. ພ້ອມກັນນັ້ນ, ຍັງໄດ້ຮັບຊົມສິລະປະວັນນະຄະດີລາວ-ຈີນ ຊຶ່ງເຮັດໃຫ້ສ້າງຄວາມປະທັບໃຈເປັນຢ່າງດີ.
ໃນໂອກາດເຂົ້າຮ່ວມກິດຈະກໍາດ່ງກ່າວຄະນະຜູ້ແທນ ສປ ຈີນ ຍັງຈະໄດ້ຈັດກອງປະຊຸມສົນທະນາເສັ້ນທາງແຫ່ງວັດທະ ນະທໍາລາວ-ຈີນ, ພິທີເປີດວາລະສານສະບັບພິເສດ. ຫຼັງຈາກນັ້ນ, ຄະນະຜູ້ແທນຍັງຈະໄດ້ເດີນທາງເຂົ້າພົບປະຫົວໜ້າຄະນະໂຄສະນາອົບຮົມສູນກາງພັກ ສປປ ລາວ, ພົບປະບັນນາທິການໃຫຍ່ໜັງສືພິມ ປະຊາຊົນ ສຽງຂອງສູນກາງພັກ ແລະ ຈະໄດ້ໄປທ່ຽວຊົມສະຖານທີ່ສໍາຄັນຕ່າງໆຂອງ ສປປ ລາວ ຕື່ມອີກ.
(ຂ່າວ-ພາບ: ວັນເພັງ)
ຄໍາເຫັນ