ຝ່າຍແຂວງສະຫວັນນະເຂດນຳໂດຍທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນປະທານຄະນະກໍາມະການຊາຍແດນ ລາວ-ຫວຽດນາມຂັ້ນແຂວງ ພ້ອມຄະນະ, ແຂວງກວາງບິ່ງນຳໂດຍທ່ານ ຮ່າ ຊີ ດົ່ງ ຮັກສາການປະທານຄະນະກໍາມະການປະຊາຊົນແຂວງ, ປະທານຄະນະກໍາມະການຊາຍແດນ ຫວຽດນາມ-ລາວ ຂັ້ນແຂວງ ພ້ອມຄະນະ.
ໂອກາດນີ້, ທ່ານ ນາງ ຫຼິງທອງ ແສງຕາວັນ ແລະ ທ່ານ ຮ່າ ຊີ ດົ່ງ ກໍໄດ້ຜັດປ່ຽນກັນມີຄໍາເຫັນ, ຊຶ່ງໄດ້ຍົກໃຫ້ເຫັນສະພາບການພັດທະນາເສດຖະກິດ-ສັງຄົມຂອງສອງແຂວງ ສະຫວັນນະເຂດ - ກວາງຈິ. ຈາກນັ້ນ, ກໍໄດ້ປຶກສາຫາລືການປະຕິບັດວຽກງານຊາຍແດນຮ່ວມກັນໃນປີ 2024 ຊຶ່ບັນດາດ່ານສາກົນ, ດ່ານທ້ອງຖິ່ນ ແລະ ດ່ານປະເພນີ ຢູ່ລຽບຕາມບໍລິເວນຊາຍແດນແຂວງສະຫວັນນະເຂດ ແມ່ນມີຄວາມໝັ້ນຄົງ, ມີຄວາມສະຫງົບ, ເປັນລະບຽບຮຽບຮ້ອຍ ແລະ ມີຄວາມປອດໄພທາງດ້ານສັງຄົມ, ສ້າງເງື່ອນໄຂອໍານວຍຄວາມສະດວກໃຫ້ແກ່ການໄປ-ມາ ແລະ ແລກປ່ຽນສິນຄ້າຂອງປະຊາຊົນທີ່ອາໄສຢູ່ລຽບຕາມບໍລິເວນຊາຍແດນ, ບັນດາກອງກໍາລັງເຈົ້າໜ້າທີ່ໄດ້ມີການແລກປ່ຽນຂໍ້ມູນຂ່າວສານຢ່າງຕໍ່ເນື່ອງ, ໄດ້ມີການລາດຕະເວນເພື່ອປ້ອງກັນເສັ້ນຊາຍແດນ, ຫຼັກໝາຍຊາຍແດນ, ຮັບປະກັນຄວາມສະຫງົບປອດໄພ, ຄວາມເປັນລະບຽບຮຽບຍຮ້ອຍຕາມບໍລິເວນຊາຍແດນ ແລະ ສະກັດກັ້ນພະຍາດລະບາດຂ້າມແດນ, ສອງຝ່າຍ, ປະສານສົມທົບກັນໃນການປ້ອງກັນການກະທໍາຜິດຕາມບໍລິເວນຊາຍແດນ ເປັນຕົ້ນແມ່ນ: ການຂົນສົ່ງແຮ່ທາດທີ່ມີຄ່າ, ການຂຸດຄົ້ນຊັບພະຍາກອນປ່າໄມ້, ເຄື່ອງປ່າຂອງດົງ, ລ່າເນື້ອ, ການຄ້າຂາຍ-ຂົນສົ່ງຢາເສບຕິດ, ການຄ້າຂາຍເຖື່ອນ ແລະ ອື່ນໆ ທີ່ຜິດຕໍ່ກົດໝາຍຂ້າມຜ່ານຊາຍແດນ ແລະ ດ່ານຊາຍແດນ ໂດຍມີການແຈ້ງໃຫ້ກັນຊາບຕໍ່ສະພາບການທີ່ກ່ຽວພັນເຖິງວຽກງານຄຸ້ມຄອງ, ປົກປັກຮັກສາຊາຍແດນ, ໄດ້ປະຕິບັດການຈັບກຸມ, ຕັກເຕືອນຜູ້ກະທໍາຜິດຢູ່ຕາມບໍລິເວນຊາຍແດນ, ດໍາເນີນການແກ້ໄຂຕາມລະບຽບກົດໝາຍຂອງແຕ່ລະປະເທດ ແລະ ສັນຍາຂອງສອງລັດຖະບານທີ່ໄດ້ລົງນາມຮ່ວມກັນຢ່າງເຂັ້ມງວດ.
ຕອນທ້າຍຂອງກອງປະຊຸມ, ສອງຝ່າຍກໍໄດ້ມີການເຊັນບົດບັນທຶກວຽກງານຊາຍແດນ ປະຈໍາປີ 2024 ໂດຍ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດປະທານຄະນະກໍາມະການຊາຍແດນ ລາວ-ຫວຽດນາມຂັ້ນແຂວງ ແລະ ທ່ານ ຮ່າ ຊີ ດົ່ງ ຮັກສາການປະທານຄະນະກໍາມະການປະຊາຊົນແຂວງ, ປະທານຄະນະກໍາມະການຊາຍແດນ ຫວຽດນາມ-ລາວ ຂັ້ນແຂວງ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ