ແຂ່ງຂັນກັອຟມິດຕະພາບສະຫຼອງວັນສ້າງຕັ້ງແຂວງບໍລິຄຳໄຊຄົບຮອບ 40 ປີ

ເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງແຂວງບໍລິຄຳໄຊຄົບຮອບ 40ປີ (6 ມີນາ 1984-6 ມີນາ 2024)ໃຫ້ເປັນຂະບວນຟົດຟື້ນ. ດັ່ງນັ້ນ, ການນຳແຂວງບໍລິຄຳໄຊຈຶ່ງໄດ້ຈັດການແຂ່ງຂັນກິລາກັອຟມິດຕະພາບຊີງຂັນທ່ານເຈົ້າແຂວງບໍລິຄຳໄຊຂຶ້ນໃນຕອນເຊົ້າວັນທີ 3 ມີນາ ຜ່ານມາ ທີ່ສະໜາມກັອຟບູຢອງ ນະຄອນຫຼວງວຽງຈັນ, ໂດຍມີທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ, ທ່ານສຸວັນນີ ໄຊຊະນະ ປະທານສະພາ ປະຊາຊົນແຂວງ ພ້ອມດ້ວຍນັກກິລາ ຈາກພາກສ່ວນຕ່າງໆເຂົ້າຮ່ວມ.
ການແຂ່ງຂັນກັອຟໃນຄັ້ງນີ້ຈັດຂຶ້ນເພື່ອສ້າງຂະບວນການຕ້ອນຮັບວັນສ້າງຕັ້ງແຂວງບໍລິຄຳໄຊຄົບຮອບ40 ປີ, ທັງເປັນການຂໍ່ານັບຮັບຕ້ອນ ແລະ ສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດແລະ ເພື່ອເປັນການສ້າງຂະບວນການໃຫ້ມີຄວາມຟົດຟື້ນທັງຮັດແໜ້ນຄວາມສາມັກຄີມິດຕະພາບຊຶ່ງກັນ ແລະກັນໃຫ້ແໜ້ນແຟ້ນຂຶ້ນກວ່າເກົ່າ.
ການແຂ່ງຂັນກັອຟໃນຄັ້ງນີ້ປະກອບມີ 16ທີມ, ທີມລະ 6 ທ່ານ. ສ່ວນຜົນການແຂ່ງຂັນມີດັ່ງນີ້: ທີ 1ທ່ານ ເພັດສະດາຈັນ ຈຸນລະມະນີໄດ້ 1ອິເກີນ 2 ເບີດີ 8 ພາ ເທົ່າກັບ 4 ໂອເຈີ ໄດ້ຮັບຂັນລາງວັນ ພ້ອມຂອງທີ່ລະນຶກ, ທີ 2ທ່ານ ຄໍາອ້ວນ ດວງບຸນມາ ໄດ້ 3 ເບີດີ, 9 ພາ ເທົ່າກັບ 4 ໂອເຈີໄດ້ຮັບຂັນລາງວັນພ້ອມຂອງທີ່ລະນຶກ. ສ່ວນລາງວັນຕີໄກ ທ່ານໂພຄຳ ຈັນທະສຸກຕີໄດ້ 273 ແມັດໄດ້ຮັບຂັນລາງວັນພ້ອມຂອງທີ່ລະນຶກ ແລະ ລາງວັນຕີໃກ້ທຸງ ທ່ານບຸນລັບ ເຄນກິດຕິສັກ ຕີໄດ້ 230 ຊັງຕີແມັດໄດ້ຮັບຂັນລາງວັນພ້ອມຂອງທີ່ລະນຶກໃຫ້ກຽດມອບລາງວັນໂດຍ ທ່ານ ກອງແກ້ວໄຊສົງຄາມ, ທ່ານຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ, ທ່ານວັນວິໄລແດນພູຫຼວງ ຮອງເລຂາພັກແຂວງບໍລິຄຳໄຊ, ທ່ານ ສຸວັນນີໄຊຊະນະ ຕາມລຳດັບ. ພ້ອມນີ້, ໃນພິທີບັນດາບໍລິສັດ-ວິສາຫະກິດທີ່ເຂົ້າຮ່ວມໃນການແຂ່ງຂັນຍັງໄດ້ຜັດປ່ຽນກັນມອບເງິນປະກອບສ່ວນສົມທົບທຶນເຂົ້າໃນການຊົມເຊີຍວັນສ້າງຕັ້ງແຂວງບໍລິຄໍາໄຊຄົບຮອບ 40 ປີ ຕື່ມອີກ.
(ຂ່າວ-ພາບ: ວັນເພັງ)