ແຂວງວຽງຈັນ ທົບທວນ ແຜນຍຸດທະສາດການຫຼຸດຜ່ອນຄວາມສ່ຽງໄພພິບັດ

ທ່ານ ສີສະໄຫວ ແກ້ວດາລາວິນ ໄດ້ກ່າວເປີດກອງປະຊຸມບາງຕອນວ່າ: ແຂວງວຽງຈັນ ກໍເປັນແຂວງໜຶ່ງທີ່ມີຄວາມຫຼໍ່ແຫຼມຈາກການເກີດໄພພິບັດນໍ້າຖ້ວມຊຸ ຫຼື ລົມພາຍຸພັດ. ຜ່ານມາກໍເຄີຍໄດ້ຮັບຜົນກະທົບຈາກສະພາບໄພພິບັດ ເຮັດໃຫ້ກະທົບຕໍ່ໂຄງລ່າງພື້ນຖານ ແລະ ຊີວິດການເປັນຢູ່ຂອງປະຊາຊົນພາຍໃນແຂວງ ເຮັດໃຫ້ຖ່ວງດຶງການພັດທະນາເສດຖະກິດສັງຄົມຂອງ ບ້ານ, ເມືອງ ກໍຄືແຂວງວຽງຈັນ ແຕ່ຖ້າທຽບກັບແຂວງອື່ນໆ ກໍບໍ່ຮຸນແຮງເທົ່າໃດ ແຕ່ເນື່ອງຈາກສະພາບການປ່ຽນແປງດິນຟ້າອາກາດບໍ່ໄປຕາມລະດູການ ການຜັນປ່ຽນສະພາບບໍ່ປົກກະຕິແນວນີ້ ຕ້ອງໄດ້ມີການລະມັດລະວັງປ້ອງກັນ ແລະ ກຽມພ້ອມທຸກເວລາ. ຕໍ່ກັບສະພາບການດັ່ງກ່າວນັ້ນ ລັດຖະບານ ສປປ ລາວ ໄດ້ມີຄວາມຮັບຮູ້ສູງ ແລະ ໃຫ້ຄວາມສຳຄັນທີ່ສຸດ ຕໍ່ວຽກງານຄຸ້ມຄອງໄພພິບັດ ໂດຍສະເພາະ ໄດ້ຊຸກຍູ້ໃຫ້ແຕ່ລະພາກສ່ວນ ຈັດຕັ້ງຜັນຂະຫຍາຍຍຸດທະສາດຫຼຸດຜ່ອນໄພພິບັດ ເຂົ້າສູ່ແຜນງານ ແລະ ການປະຕິບັດຕົວຈິງ ໂດຍການເຊື່ອມເອົາວຽກງານຫຼຸດຜ່ອນຄວາມສ່ຽງໄພພິບັດ ເຂົ້າໃນແຜນງານ ແລະ ໂຄງການພັດທະນາເສດຖະກິດ-ສັງຄົມ ທັງຢູ່ລະດັບຊາດ ແລະ ທ້ອງຖິ່ນ, ເພີ່ມທະວີຄວາມເຂັ້ມແຂງໃຫ້ແກ່ລະບົບການພະຍາກອນ ແລະ ການເຕືອນໄພລ່ວງໜ້າ, ຍົກລະດັບຂີດຄວາມສາມາດ ໃຫ້ແກ່ກົນໄກການຈັດຕັ້ງປະຕິບັດວຽກງານຄຸ້ມຄອງໄພພິບັດ ລົງຮອດຊຸມຊົນຂັ້ນບ້ານ,ເພີ່ມທະວີວຽກງານໂຄສະນາສຶກສາອົບຮົມ ແລະ ສ້າງຈິດສຳນຶກຊຸມຊົນ ທົ່ວສັງຄົມ ໄດ້ຮັບຮູ້ເຖີງຄວາມສ່ຽງໄພພິບັດ ແລະ ປະກອບສ່ວນເຂົ້າໃນການກຽມຄວາມພ້ອມຮັບມືກັບໄພພິບັດ. ຄະນະກຳມະການຄຸ້ມຄອງໄພພິບັດຂັ້ນແຂວງ ກໍໄດ້ເອົາໃຈໃສ່ໃນການປະຕິບັດ ມາດຕະການປ້ອງກັນໄພພິບັດ ໂດຍຖືເອົາຫຼັກການກໍ່ສ້າງຄືນໄໝ່ໃຫ້ດີກວ່າເກົ່າ ເຂົ້າໃນຂະບວນການຟື້ນຟູ ແລະ ກໍ່ສ້າງຄືນໄໝ່ຫຼັງໄພພິບັດ; ສ້າງຄວາມພະຍາຍາມໃນການປ້ອງກັນ ແລະ ປົກປັກຮັກສາສິ່ງແວດລ້ອມທຳມະຊາດ ໂດຍສະເພາະ ສຸມໃສ່ໃນການປົກປັກຮັກສາປ່າໄມ້ ແລະ ພື້ນທີ່ສັນກັນນໍ້າ ຊຶ່ງເປັນມາດຕະການທີ່ມີປະສິດທິຜົນ ເພື່ອຫຼຸດຜ່ອນໄພພິບັດຈາກທຳມະຊາດ ແລະ ຜົນກະທົບຈາກການປ່ຽນແປງ ຂອງດິນຟ້າອາກາດ. ຄະນະກຳມະການຄຸ້ມຄອງໄພພິບັດຂັ້ນແຂວງ ກໍໄດ້ກະກຽມໃນການສ້າງ ແຜນຍຸດທະສາດການຫຼຸດຜ່ອນຄວາມສ່ຽງໄພພິບັດແຂວງວຽງຈັນ 2026-2030. ຈົນສາມາດເປີດກອງປະຊຸມທົບທວນ ແລະ ຈະໄດ້ເຊັນຮັບຮອງ ເປັນນິຕິກໍາຄັ້ງທໍາອິດຂອງ ແຂວງວຽງຈັນ ກ່ຽວກັບວຽກງານໄພພິບັດ ຮັບປະກັນໃຫ້ການເຄື່ອນໄຫວວຽກງານປ້ອງກັນ, ຄວບຄຸມ ແລະ ຟື້ນຟູຫຼັງໄພພິບັດ, ມີຄວາມວ່ອງໄວ, ສະດວກ ແລະ ມີປະສິດທິຜົນຂຶ້ນ.

ກອງປະຊຸມຄັ້ງນີ້, ສຸດທີ່ມີຄວາມໝາຍສໍາຄັນ ຊຶ່ງບັນດາທ່ານທີ່ເຂົ້າຮ່ວມ ຈະມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ກັບເນື້ອໃນ ຂອງແຜນຍຸດທະສາດສະບັບນີ້, ພ້ອມທັງ ໄດ້ມີໂອກາດແລກປ່ຽນ ແລະ ສົນທະນາຮ່ວມກັນ ຕໍ່ກັບເນື້ອໃນ ຂອງແຜນຍຸດທະສາດຢູ່ໃນແຕ່ລະ ຫົວຂໍ້ ທີ່ຍັງບໍ່ທັນເລິກເຊິ່ງ ເພື່ອຈະໄດ້ນຳເອົາເນື້ອໃນແຜນຍຸດທະສາດນີ້ໄປຈັດຕັ້ງຜັນຂະຫຍາຍນໍາໃຊ້ ຢູ່ໃນຂະແໜງການຄວາມຮັບຜິດຊອບຂອງຕົນ ແລະ ຢູ່ບັນດາເມືອງ ໃຫ້ມີປະສິດທິພາບ ແລະ ປະສິດທິຜົນ.

(ພາບ-ຂ່າວ: ບຸນມາ ແກ້ວບຸດດາ)