ບຸນໄຫວ້ພະຈັນແມ່ນບຸນປະເພນີທີ່ສໍາຄັນຂອງຊົນຊາດຈີນ ຊຶ່ງມີເລື່ອງລາວເລົ່າຂານທີ່ເກົ່າແກ ແລະ ນິທານທີ່ໜ້າປະທັບໃຈ, ເຕັມໄປດ້ວຍວິໄສທັດຂອງຜູ້ຄົນຕໍ່ຄວາມສາມັກຄີປອງດອງ ແລະ ການສະ ແຫວງຫາຊີວິດທີ່ດີງາມ. “ຊ່ວງເວລາດວງຈັນທີ່ໜ້າຈົດຈຳ-ບຸນໄຫວ້ພະຈັນ” ແມ່ນໜຶ່ງໃນສາມໂຄງການໃຫຍ່ທີ່ສໍາຄັນທີ່ສຸດ ໃນການແລກປ່ຽນວັດທະນະທໍາ ແລະ ການໂຄສະນາຂອງກະຊວງວັດທະນະທໍາ ແລະ ທ່ອງທ່ຽວ ແຫ່ງ ສປ ຈີນ.
ສູນວັດທະນະທໍາຈີນ ປະຈໍາ ສປປ ລາວ ຮ່ວມກັບ ພະແນກວັດທະນະທໍາ ວິທະຍຸ ໂທລະພາບ ທ່ອງທ່ຽວ ແລະ ກິລາ ນະຄອນເສິນເຈິ້ນ ໄດ້ຈັດງານຄອນເສີດ ປະສານສຽງທ່າມກາງດວງຈັນ - ສະເຫຼີມສະຫຼອງບຸນໄຫວ້ພະຈັນ ຊ່ວງເວລາດວງຈັນທີ່ໜ້າຈົດຈຳ ປະຈໍາປີ 2023 ຂຶ້ນໃນວັນທີ 23 ກັນຍາ 2023 ທີ່ຫໍວັດທະນະທໍາແຫ່ງຊາດ ໂດຍການເຂົ້າຮ່ວມຊົມຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ຜູ້ຊີ້ນໍາວຽກງານການປົກຄອງ ວັດທະນະທໍາ-ສັງຄົມ; ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ); ທ່ານ ຫວັງຊາງ ອຸປະທູດ ສະຖານທູດ ສປ ຈີນ ປະຈໍາ ສປປ ລາວ ພ້ອມດ້ວຍພະນັກງານການນຳ ແຂກ ຖືກເຊີນ ແລະ ມວນຊົນເຂົ້າຮ່ວມ.
ທ່ານ ນາງ ຫຼີຢີ່ຜີງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ ໄດ້ກ່າວວ່າ: ເພື່ອສະເຫຼີມສະຫຼອງວັນບຸນທີ່ແສນພິເສດນີ້, ນັບແຕ່ປີ 2016 ກະຊວງວັດທະນະທໍາ ແລະ ທ່ອງທ່ຽວ ແຫ່ງປະເທດຈີນໄດ້ເປີດຕົວກິດຈະກໍາ ຊ່ວງເວລາດວງຈັນທີໜ້າຈົດຈໍາ-ສະຫຼອງບຸນໄຫວ້ພະຈັນ ຢູ່ທົ່ວໂລກ ໂດຍຮ່ວມກັບສູນວັດທະນະທໍາຈີນ 47 ແຫ່ງ ແລະ ສໍານັກງານທ່ອງທ່ຽວ 23 ແຫ່ງຢູ່ທົ່ວໂລກ; ສູນວັດທະນະທໍາຈີນ ປະຈໍາ ສປປ ລາວ ແລະ ພະແນກວັດທະນະທໍາ ວິທະຍຸ ໂທລະພາບ ທ່ອງທ່ຽວ ແລະ ກິລາ ນະຄອນເສິນເຈິ້ນ ໄດ້ເຊີນນັກສິລະປິນ 40 ທ່ານ ຈາກຄະນະຮ້ອງປະສານສຽງຂອງໂຮງລະຄອນ ເສິນເຈີ້ນ ເດີນທາງມາສະແດງຢູ່ປະເທດລາວ, ບົດເພງທີ່ນໍາມາສະແດງຄັ້ງນີ້ ໄດ້ຄັດເລືອກເອົາຜົນງານຮ້ອງເພງປະສານສຽງ ທີ່ດີທີ່ສຸດຂອງຈີນໃນສະຕະວັດທີ່ຜ່ານມາ ແລະ ຜົນງານເພງປະສານສຽງທີ່ຕາງໜ້າໃຫ້ກັບປະເທດຈີນ, ນອກນີ້ຍັງໄດ້ ຄັດເລືອກຜົນງານການຮ້ອງເພງແບບຄລາສິິກຕາເວັນຕົກ ແລະ ໂອເປຣາສະໄໝ Renaissance ແລະ ຍັງຈະໄດ້ຊົມບົດເພງຍອດນິຍົມ, ຜົນງານຊໍເອີ້ຫູ, ບົດເພງລາວຄລາສສິກ ຈໍາປາເມືອງລາວ ຮ້ອງໂດຍ ນາງ ອານຸສອນ ໄພຍະສິດ ນັກຮ້ອງທີ່ມີຊື່ສຽງ ຈາກ ກອງສິລະປະກອນແຫ່ງຊາດລາວ ແລະ ນາງ ຟ້ານຢວນຢວນ ນັກຮ້ອງທີ່ມີຊື່ສຽງ ຈາກ ນະຄອນເສິນເຈິ້ນ ສປ ຈີນ, ບົດເພງຮ້ອງປະສານສຽງ ດວງຈັນທີ່ສ່ອງສະຫວ່າງມີມາແຕ່ຍາມໃດ ທີ່ເປັນເພງຫຼັກຂອງກິດຈະກໍາ ທີ່ຮ້ອງໂດຍນັກຮຽນຈາກ ໂຮງຮຽນລຽວໂຕວ໌ ແລະ ນັກສິລະປິນຈີນ. ນີ້ແມ່ນໜຶ່ງໃນບັນດາໂຄງການສຳຄັນໃນປີ 2023 ລະຫວ່າງສູນວັດທະນະທໍາຈີນ ປະຈໍາ ສປປ ລາວ ແລະ ພະແນກວັດທະນະທໍາ ວິທະຍຸ ໂທລະພາບ ທ່ອງທ່ຽວ ແລະ ກິລາ ນະຄອນເສິນເຈິ້ນ, ທັງເປັນທີມແລກປ່ຽນວັດທະນະທໍາ ແລະ ສິລະປະທີ່ມີມາດຕະຖານສູງຂອງຈີນ ທີ່ຈະມາຢ້ຽມຢາມ ສປປ ລາວ ຫຼັງຈາກການແຜ່ລະບາດຂອງພະຍາດໂຄວິດ-19 ໄດ້ສິ້ນສຸດລົງ, ຖືເປັນເຫດການອັນຍິ່ງໃຫຍ່ຂອງການພົບປະແລກປ່ຽນທາງວັດທະນະທໍາລະຫວ່າງລາວ - ຈີນ ປະຈໍາ ປີ 2023, ທີ່ຈະຊ່ວຍເພີ່ມທະວີຄວາມເຂົ້າໃຈ ແລະ ມິດຕະພາບອັນເປັນມູນເຊື້ອລະຫວ່າງປະຊາຊົນລາວ-ຈີນຢ່າງແນ່ນອນ ແລະ ຊ່ວຍເສີມສ້າງປະຊາຄົມຄູ່ຮ່ວມຊາຕາກໍາລາວ-ຈີນ.
ໃນໂອກາດດັ່ງກ່າວ ທ່ານ ນາງ ສວນສະຫວັນ ວິຍະເກດ ໄດ້ກ່າວວ່າ: ງານບຸນປະເພນີໄຫວ້ ເປັນງານໜຶ່ງທີ່ມີຄວາມໝາຍສໍາຄັນທາງດ້ານວັດທະນະທໍາຂອງ ສປ ຈີນ ຫຼື ມີຊື່ເອີ້ນອີກວ່າ: ບຸນກາງລະດູໃບໄມ້ຫຼົ່ນ ຊຶ່ງບຸນດັ່ງກ່າວມີຄວາມເຊື່ອຖືຂອງຊາວຈີນແລ້ວ ແມ່ນຈະປຽບເອົາດວງຈັນທີມົນກົມ ຄືດັ່ງຄວາມສາມັກຄີກົມກຽວຂອງຄົນໃນຄອບຄົວ ແລະ ອີກດ້ານໜຶ່ງແມ່ນບຸນແຫ່ງຄວາມພ້ອມໜ້າພ້ອມຕາຂອງຄົນໃນຄອບຄົວໂດຍທຸກຄົນຈະມາເຕົ້າໂຮມກັນຮ່ວມກັນສະເຫຼີມສະຫຼອງ ໂດຍການໃຕ້ໂຄມໄຟທີ່ມີລວດລາຍສີສັນ ແລະ ຮັບປະທານເຂົ້າໜົມໄຫວ້ພະຈັນ ພ້ອມກັນຊົມດວງຈັນທີ່ສະຫວ່າງສະໄຫວ, ໃນໂອກາດນີ້ ຂ້າພະເຈົ້າຕາງໜ້າໃຫ້ລັດຖະບານລາວ ກໍຄືປະຊາຊົນລາວບັນດາເຜົ່າ ຂໍສະແດງຄວາມຮູ້ບຸນຄຸນຢ່າງສູງຕໍ່ພັກ, ລັດຖະບານ ສປ ຈີນ ທີ່ເວລາໃດກໍໃຫ້ການສະໜັບສະໜູນຊ່ວຍເຫຼືອແກ່ພັກ, ລັດຖະບານຕະຫຼອດມາ, ຂໍຍອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນແບບຄູ່ຮ່ວມຊາຕາກໍາສັງຄົມນິຍົມລະຫວ່າງສອງພັກ ສອງລັດ ແລະ ປະຊາຊົນສອງຊາດລາວ-ຈີນ ຈົ່ງໜັ້ນຄົງຂະໜົງແກ່ນ ແລະ ສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ.
ຂ່າວ: ຍຸພິນທອງ
ຄໍາເຫັນ