ທີ່ໄດ້ຮັບການຊຸກຍູ້ຊ່ວຍເຫຼືອສົ່ງເສີມຈາກອົງການແຄຣນາໆຊາດ ປະຈໍາລາວ ກໍຄື ໂຄງການສ້າງຄວາມເຂັ້ມແຂງໃຫ້ແກ່ແມ່ຍິງຊົນເຜົ່າ ເພື່ອປັບໂຕເຂົ້າກັບການປ່ຽນແປງຂອງສະພາບດິນຟ້າອາກາດແບບຍືນຍົງ (WECR) ນັບແຕ່ ປີ 2022 ເປັນຕົ້ນມາ ຈຶ່ງເຮັດໃຫ້ຊີວິດການເປັນຢູ່ພາຍໃນຄອບຄົວຄ່ອຍໆດີຂຶ້ນ ແລະ ມີຄວາມໝັ້ນຄົງຂຶ້ນເທື່ອລະກ້າວ.
ເມື່ອບໍ່ດົນມານີ້, ສະມາຄົມນັກຂ່າວແຫ່ງ ສປປ ລາວ ຮ່ວມກັບອົງການແຄຣນາໆຊາດ ປະຈໍາ ສປປ ລາວ ນໍາໂດຍ ທ່ານ ນາງ ບົວຄໍາດວງປັນຍາ ຫົວໜ້າໂຄງການ GAMCIL ອົງການແຄຣນາໆຊາດ ປະຈໍາລາວ ພ້ອມຄະນະ ໄດ້ນໍາພາສື່ມວນຊົນທັງສູນກາງ ແລະ ທ້ອງຖິ່ນ ພາຍໃຕ້ໂຄງການສ້າງຄວາມເຂັ້ມແຂງ ໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອພັດທະນາສີຂຽວໃນ ສປປ ລາວ ຊຶ່ງໂຄງການດັ່ງກ່າວ ໄດ້ຮັບທຶນສະໜັບສະໜູນຈາກ ສະຫະພາບ ເອີຣົບ ໄປທັດສະນະສຶກສາ ແລະ ຢ້ຽມຢາມ ກິດຈະກຳໂຄງການທີ່ຈັດຕັ້ງປະຕິບັດ ຢູ່ເມືອງຂວາ ແຂວງຜົ້ງສາລີ. ໃນໂອກາດນີ້, ສື່ມວນຊົນກໍໄດ້ສໍາພາດ ທ່ານ ນາງ ຮັກ ສີວິໄລ ອາຍຸ 28 ປີ ຄອບຄົວຕົວແບບ ໃນການຜະລິດກະສິກໍາແບບປະສົມວ່າ: ໃນຄອບຄົວມີສະມາຊິກ 5 ຄົນ, ແຮງງານຕົ້ນຕໍ 3 ຄົນຊຶ່ງໃນເມື່ອກ່ອນຄອບຄົວ ໄດ້ຖືເອົາການຖາງປ່າເຮັດໄຮ່ແບບເລື່ອນລອຍເປັນຫຼັກ ສະພາບຄອບຄົວເວລານັ້ນທຸກຍາກຂາດເຂີນ ຍ້ອນການຜະລິດອີງໃສ່ທຳມະຊາດຕົ້ນຕໍ. ມາຮອດປີ 2022ມີໂຄງການWECR ໄດ້ໃຫ້ການຊ່ວຍເຫຼືອປະຊາຊົນບ້ານກຸງເກືອຍ ດ້ວຍການຊຸກຍູ້ສົ່ງເສີມເຕັກນິກການຜະລິດ, ວັດຖຸອຸກອນ, ເມັດພັນ ແລະ ອື່ນໆ ບວກກັບຄອບຄົວມີພື້ນທີ່ທີ່ເໝາະສົມກວ້າງຂວາງ ແລະ ບໍ່ກະທົບຕໍ່ສະພາບແວດລ້ອມອ້ອມຂ້າງ. ດັ່ງນັ້ນ, ທາງຄອບຄົວ ຈຶ່ງໄດ້ຫັນປ່ຽນຈາກການຖາງປ່າເຮັດໄຮ່ແບບເລື່ອນລອຍ ມາຜະລິດກະສິກໍາແບບປະສົມເປັນອາຊີບຫຼັກ. ໃນນັ້ນ, ມີການປູກຜັກບົ່ວ, ຜັກກາດ, ລ້ຽງໝູ, ລ້ຽງໄກ່ ແລະ ລ້ຽງປາ, ສ່ວນລາຄາຜັກແມ່ນອີງຕາມລະດູການ ເຊັ່ນວ່າ: ຜັກບົ່ວ ແລະ ຫອມປ້ອມ 10,000 ກີບຕໍ່ກິໂລ, ຜັກກາດ 5,000 ກີບຕໍ່ກິໂລ; ໃນໄລຍະລະດູຝົນ ຜັກບົ່ວ ແລະ ຫອມປ້ອມ 40,000 ກີບຕໍ່ກິໂລ, ຜັກກາດ 8,000 ກີບຕໍ່ກິໂລ. ການຂາຍຜົນຜະລິດແມ່ນເປັນທີ່ໜ້າເພິ່ງພໍໃຈສົມຄວນ ສາມາດສ້າງລາຍຮັບເຂົ້າຄອບຄົວ, ມີລາຍໄດ້ດີ, ການຕະຫຼາດກໍບໍ່ຫຍຸ້ງຍາກ ເພາະມີແມ່ຄ້າມາຊື້ຢູ່ກັບສວນ, ບາງເທື່ອກໍໄດ້ໄປສົ່ງຕາມຮ້ານອາຫານ ແລະ ຕະຫຼາດບ້ານສະເລ່ຍແລ້ວສາມາດສ້າງລາຍຮັບໄດ້ 30-36 ລ້ານກີບຕໍ່ປີ.
ທ່ານ ນາງ ຮັກ ສີວິໄລ ໃຫ້ຮູ້ຕື່ມວ່າ: ຜ່ານການບຸກບືນສູ້ຊົນຂະຫຍັນອົດທົນ, ມາຮອດປັດຈຸບັນ ຊີວິດການເປັນຢູ່ຂອງຄອບຄົວໄດ້ພັດທະນາດີຂຶ້ນເປັນກ້າວໆ ແລະ ມີຄວາມໝັ້ນຄົງ ຊຶ່ງໄດ້ມີເຮືອນຢູ່ຖາວອນ 1 ຫຼັງ, ມີເງິນໝູນໃຊ້ພາຍໃນຄອບຄົວ, ມີເງິນທຶນແຮໄວ້ໃຊ້ຈ່າຍໃນເວລາເຈັບເປັນ, ມີເງິນທຶນການສຶກສາຈຳນວນໜຶ່ງໄວ້ໃຫ້ລູກຮຽນໜັງສື ແລະ ມີເງິນຝາກທະນາຄານຈຳນວນໜຶ່ງ. ສ່ວນແຜນການໃນຕໍ່ໜ້າ ຈະຂະຫຍາຍການຜະລິດເພື່ອຕອບສະໜອງຄວາມຕ້ອງການຂອງຕະຫຼາດ ແລະ ພ້ອມຈະໃຫ້ຄໍາແນະນໍາແກ່ບຸກຄົນ ຫຼື ຄອບຄົວ ທີ່ມີຄວາມສົນໃຈໃນການຜະລິດສິນຄ້າກະສິກໍາແບບຍືນຍົງນໍາອີກ.ທ່ານ ນາງ ຮັກ ສີວິໄລ ຍັງເວົ້າດ້ວຍຄວາມດີໃຈວ່າ: ຂໍຂອບໃຈທາງອົງການແຄຣນາໆຊາດ ປະຈໍາ ລາວ ກໍຄື ໂຄງການ ທີ່ເຂົ້າມາຊຸກຍູ້ຊ່ວຍເຫຼືອ ເຮັດໃຫ້ຄອບຄົວມີຊີວິດການເປັນຢູ່ທີ່ດີຂຶ້ນ ແລະ ມີອາຊີບທີ່ໝັ້ນຄົງສາມາດສ້າງລາຍຮັບໃຫ້ແກ່ຄອບຄົວເປັນຢ່າງດີ.
ຄໍາເຫັນ