ສ້າງລາຍຮັບໃຫ້ຄອບຄົວ ໄດ້ຫຼາຍຮ້ອຍລ້ານກີບ.
ທ່ານ ອິນໝອນ ບົວມະນີສອນເລົ່າສູ່ຟັງວ່າ: ຄອບຄົວຂ້າພະເຈົ້າ ມີຈໍານວນພົນທັງໝົດ 9 ຄົນຍິງ 3 ຄົນ,ອາຊີບຕົ້ນຕໍແມ່ເຮັດນາ ແລະ ເຮັດໄຮ່, ປີໃດຝົນຕົກປົກກະຕິກໍໄດ້ຮັບຜົນດີ, ແຕ່ປີໃດແຫ້ງແລ້ງ ຜົນຜະລິດໄດ້ໜ້ອຍ. ເຮັດໃຫ້ຊີວິດການເປັນຢູ່ຂອງຄອບຄົວຂາດໆເຂີນໆ.
ມາຮອດ ປີ 2008 ຕົນເອງໄດ້ຕັດສິນໃຈຍົກຍ້າຍຄອບຄົວ ຈາກບ້ານຫ້ວຍຍາງມາຢູ່ໜ້ວຍແກ້ງເໝັ້ນ ແລະ ໄດ້ຊື້ດິນສວນໃນເນື້ອທີ່ 0.05 ເຮັກຕາ,ລົງມືປູກໝາກກ້ຽງ 200 ຕົ້ນ ແລະເອົາໃຈໃສ່ບົວລະບັດຮັກສາສວນໝາກກ້ຽງ 6-7 ປີ ຕໍ່ມາໝາກກ້ຽງເລີ່ມເປັນໝາກ ແຕ່ຜົນຜະລິດໄດ້ໜ້ອຍ, ແຕ່ຖ້າທຽບໃສ່ລາຍໄດ້ຈາກການເຮັດນາ ແລະ ໄຮ່ ຂາຍໝາກກ້ຽງກໍມີລາຍຮັບຫຼາຍກວ່າ.
ມາຮອດປີ 2022 ໄດ້ຮັບການຊີ້ນໍາຈາກພັກ ແລະ ລັດ ໂດຍສະເພາະແມ່ນຫ້ອງການກະສິກໍາ ແລະ ປ່າໄມ້ເມືອງນໍ້າບາກ ໄດ້ລົງຊຸກຍູ້ສົ່ງເສີມຂ້າພະເຈົ້າຈຶ່ງໄດ້ຊື້ດິນເພີ່ມອີກ 4,95 ເຮັກຕາ, ລວມທັງເນື້ອທີ່ເກົ່າ ລວມເປັນ 5 ເຮັກຕາ, ໃຫ້ໝາກແລ້ວ 1 ເຮັກຕາ.ຕໍ່ມາທາງວິຊາການຫ້ອງການກະສິກໍາ-ປ່າໄມ້ເມືອງໄດ້ລົງມາແນະນໍາດ້ານວິຊາການ ນໍາພາເຮັດຕົວຈິງຢູ່ກັບສວນ ແລະ ໄດ້ນໍາເອົາໂຄງການເຂົ້າມາສົ່ງເສີມທາງດ້ານເຕັກນິກ ແລະ ການຈັດຕັ້ງກຸ່ມຜະລິດໝາກກ້ຽງ ຕົນເອງໄດ້ສະໝັກໃຈເປັນສະມາຊິກຂອງກຸ່ມ, ໄດ້ມີໂອກາດເຂົ້າຮ່ວມການຝຶກອົບຮົມດ້ານວິຊາການ ນັບແຕ່ການຄັດເລືອກແນວພັນ, ການກ້າແກ່ນ, ການຂຸດຂຸມປູກ, ການບົວລະບັດຮັກສາ ຕະຫຼອດຮອດການເກັບກູ້ຜົນຜະລິດ.
ຫຼັງຈາກນັ້ນ, ກໍໄດ້ນໍາເອົາວິຊາການທີ່ໄດ້ຈາກການຝຶກອົບຮົມມາໝູນໃຊ້ ເປັນຕົ້ນແມ່ນການຕັດແຕ່ງກິ່ງງ່າ,ຫຼັງການໃສ່ຝຸ່ນ,ການຫົດນໍ້າ,ການອະນາໄມພື້ນທີ່, ທາຢາຂ້າເຊື້ອໃສ່ລໍາຕົ້ນ,ການພວນດິນແລະ ອື່ນໆ.ຍິ່ງໄປກວ່ານັ້ນ,ທາງກຸ່ມປູກໝາກກ້ຽງ ຍັງໃຫ້ໂອກາດໄປທັດສະນະສຶກສາ ເບິ່ງບົດຮຽນ ການປູກໝາກກ້ຽງຢູ່ແຂວງຫຼວງນໍ້າທາ ແລະ ແຂວງບໍ່ແກ້ວ, ເພື່ອແລກປ່ຽນບົດຮຽນດ້ານເຕັກນິກ, ການຜະລິດແບບໃໝ່, ການຄຸ້ມຄອງກຸ່ມ,ພົບປະກັບພໍ່ຄ້າ-ແມ່ຄ້າຂາຍໝາກກ້ຽງ ຢູ່ຕາມຕະຫຼາດນະຄອນ-ຫຼວງພະບາງ ແລະ ຍັງໃຫ້ໂອກາດຂ້າພະເຈົ້ານໍາເອົາໝາກກ້ຽງເຂົ້າຮ່ວມວາງສະແດງ ແລະ ຂາຍໃນວັນອາຫານໂລກທີ່ນະຄອນຫຼວງວຽງຈັນ.
ຜ່ານການເອົາໃຈໃສ່ບົວລະບັດສວນໝາກກ້ຽງ ຖືກຕ້ອງຕາມຫຼັກວິຊາາການ ໝາກກ້ຽງມີສີສັນງາມເປືອກບາງດີ, ມີນໍ້າຫຼາຍໃຫ້ຜົນຜະລິດຫຼາຍຂຶ້ນໃນແຕ່ລະປີ ຄື: ປີ 2022 ໄດ້ຜົນຜະລິດ 15 ໂຕນ, ຂາຍໄດ້ 50ລ້ານກີບ,ປີ 2023 ໄດ້ຜົນຜະລິດ 21 ໂຕນ,ຂາຍໄດ້ 100 ລ້ານກີບ.ປີ 2024 ໄດ້ຜົນຜະລິດ 23 ໂຕນຂາຍໄດ້ 180 ລ້ານກີບ.
ສໍາລັບການຈໍາໜ່າຍ ໃນເມື່ອກ່ອນ,ໝາກກ້ຽງບໍ່ທັນໃຫ້ຜົນຜະລິດຫຼາຍ ແມ່ນໄດ້ເກັບກູ້ ແລ້ວນໍາໄປຂາຍເອງ ແລະ ບາງປີກໍຂາຍແບບມອບເໝົາ. ໃນປັດຈຸບັນ,ມີແມ່ຄ້າມາຊື້ຢູ່ກັບບ້ານ, ແມ່ຄ້າສ່ວນຫຼາຍມາຈາກນະຄອນ-ຫຼວງພະບາງ, ຊຽງຂວາງ, ນະຄອນຫຼວງວຽງຈັນ ແລະ ແມ່ຄ້າຢູ່ພາຍໃນເມືອງນໍ້າບາກ.
ຍ້ອນຄວາມເປັນຫ່ວງເປັນໃຍ ຂອງພັກ,ລັດ.ໂດຍສະເພາະແມ່ນຂະແໜງການທີ່ກ່ຽວຂ້ອງ ໄດ້ນໍາເອົາບົດຮຽນທີ່ມີຄຸນຄ່າ,ມາຊຸກຍູ້ສົ່ງເສີມ ແລະ ໃຫ້ເຕັກນິກວິຊາການຕ່າງໆບວກກັບການດຸໝັ່ນຂະຫຍັນພຽນ, ຄວາມມານະອົດທົນຂອງຄອບຄົວຈຶ່ງເຮັດໃຫ້ຄອບຄົວຂ້າພະເຈົ້າມີອາຊີບທີ່ໝັ້ນຄົງມີຖານະດີຂຶ້ນເປັນລໍາດັບ.
ຄໍາເຫັນ