ຄຸນຄ່າແນວຄິດຊີ້ນໍາ ຂອງປະທານ ຄໍາໄຕ ສີພັນດອນ ໃນວຽກງານແນວໂຮມ ແລະ ວຽກງານມະຫາຊົນ

ໂດຍ: ສ.ບຸດປະຊາ
ພັກປະຊາຊົນປະຕິວັດລາວ ຍາມໃດກໍຖືວຽກງານແນວໂຮມ ແລະ ວຽກງານມະຫາຊົນ ເປັນຍຸດທະສາດສຳຄັນຂອງການປະຕິວັດ, ຖືມະຫາຊົນເປັນບໍ່ເກີດ, ເປັນບ່ອນອີງ, ເປັນກໍາລັງແຮງຕົ້ນຕໍ ຂອງພັກ ຊຶ່ງຕະຫຼອດໄລຍະຜ່ານມາ ປະທານຄຳໄຕສີພັນດອນ ໜຶ່ງໃນບັນດາທ່ານຜູ້ນຳທີ່ມີຄວາມໂດດເດັ່ນຢູ່ປະເທດເຮົາ ກໍໄດ້ປະກອບສ່ວນອັນສຳຄັນ ແລະ ໃຫຍ່ຫຼວງເຂົ້າໃນການຈັດຕັ້ງນຳພາ ພາລະກິດຂອງພັກ ໃນນັ້ນແນວຄິດຊີ້ນໍາ ກ່ຽວກັບວຽກງານແນວໂຮມ ແລະ ວຽກງານມະຫາຊົນໄດ້ມີຄຸນຄ່າຢ່າງຫຼວງຫຼາຍ ຊຶ່ງຄຸນຄ່າທີ່ກ່າວມານີ້ ທ່ານ ຄໍາໄຫຼ ສີປະເສີດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ໄດ້ສະເໜີຕໍ່ກອງປະຊຸມສຳມະນາວິທະຍາສາດລະດັບຊາດ ໃນໂອກາດລະນຶກ ວັນເກີດຂອງປະທານ ຄໍາໄຕ ສີພັນດອນ ຄົບຮອບ 100 ປີ (8/2/1924-8/2/2024) ໄດ້ຈັດຂຶ້ນເປັນຄັ້ງທີ 3ທີ່ນະຄອນຫຼວງວຽງຈັນ ໃນວັນທີ 24 ມັງກອນຜ່ານມາ.
ຄຸນຄ່າແນວຄິດຊີ້ນໍາ ຂອງປະທານຄໍາໄຕ ສີພັນດອນ ທີ່ໄດ້ລວບລວມນີ້ ແມ່ນເປັນການສັງລວມເອົາ ໃນໄລຍະແຫ່ງການດໍາລົງຕໍາແໜ່ງ ເປັນນາຍົກລັດຖະມົນຕີ, ເປັນປະທານຄະນະບໍລິຫານງານສູນກາງພັກປະຊາຊົນ ປະຕິວັດລາວ ແລະ ປະທານປະເທດ ແຫ່ງ ສປປ ລາວ ໄລຍະປີ 1993-2006 ເຖິງວ່າຈະມີໄລຍະເວລາສັ້ນ ແຕ່ວ່າແນວຄິດຊີ້ນໍາຂອງເພິ່ນ ມີຄວາມໝາຍທີ່ອຸດົມສົມບູນ, ເປັນພື້ນຖານໃຫ້ພັກ-ລັດ ກໍຄື ແນວລາວສ້າງຊາດ ແລະ ອົງການຈັດຕັ້ງມະຫາຊົນ ນໍາເອົາທິດຊີ້ນໍາເຫຼົ່ານັ້ນມາຜັນຂະຫຍາຍ, ສ້າງເປັນໂຄງການດໍາເນີນງານ, ແຜນພັດທະນາໃນແຕ່ລະໄລຍະ, ສ້າງເປັນນິຕິກໍາ ແລະ ຫັນເປັນກົດໝາຍ ຂອງແຕ່ລະອົງການ ເພື່ອເປັນບ່ອນອີງ ແລະ ຮັບຮອງແບບແຜນການຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ຂອງຕົນ ໄດ້ຮັບໝາກຜົນ ຊຶ່ງມີບາງເນື້ອໃນທີ່ສະແດງໃຫ້ເຫັນດັ່ງນີ້:
1. ມີຄຸນຄ່າສຳຄັນໃຫ້ແກ່ແນວລາວສ້າງຊາດ ແລະ ອົງການຈັດຕັ້ງມະຫາຊົນ ນໍາເອົາໄປຕັ້ງໜ້າສຶກສາອົບຮົມ, ປຸກລະດົມ  ແລະ  ເຕົ້າໂຮມຄວາມສາມັກຄີປະຊາຊົນບັນດາເຜົ່າ,ຊັ້ນຄົນ,  ສາສະໜາ,ເພດ ແລະ ໄວ ໃຫ້ເປັນປຶກແຜ່ນແໜ້ນໜາພາຍໃຕ້ການນຳພາຂອງພັກ; ປຸກລະດົມຂົນຂວາຍພີ່ນ້ອງຊາວລາວຢູ່ຕ່າງປະເທດ ທີ່ມີນ້ຳໃຈຮັກເຊື້ອແພງຊາດ ເຂົ້າຮ່ວມການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ລັດ ປະກອບສ່ວນສະຕິປັນຍາ, ທຶນຮອນ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຢ່າງເປັນຂະບວນກວ້າງຂວາງ, ເຮັດໃຫ້ຄວາມສາມັກຄີປອງດອງພາຍໃນຊາດລາວເຮົາ ມີຄວາມເປັນປຶກແຜ່ນ, ໝັ້ນໜຽວເປັນອັນໜຶ່ງອັນດຽວໃນວົງຄະນາຍາດແຫ່ງຊາດລາວ.
2. ຄຸນຄ່າໃນການສົ່ງເສີມໃຫ້ເສີມຂະຫຍາຍມູນເຊື້ອໃນການສ້າງ, ປັບປຸງພັນທະພາບ ແລະ ຄວາມສາມັກຄີປະຊາຊົນບັນດາເຜົ່າ, ຊັ້ນຄົນຕ່າງໆ ບົນພື້ນຖານກຳມະກອນ, ຊາວກະສິກອນ  ແລະ ປັນຍາຊົນປະຕິວັດ ເປັນຫຼັກແຫຼ່ງ ຕາມທິດທາງການກ້າວເດີນສູ່ຈຸດໝາຍສັງຄົມນິຍົມ ຢູ່ປະເທດເຮົາ.
3. ມີຄຸນຄ່າດ້ານແບບແຜນວິທີ ທີ່ເປັນບົດຮຽນສໍາຄັນໃນການຕັ້ງໜ້າຫັນລົງຮາກຖານ ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ ຢ່າງເປັນຂະບວນຟົດຟື້ນ ແລະ ຕໍ່ເນື່ອງ ເພື່ອຊອກຮູ້ຄວາມມຸ້ງມາດປາຖະໜາ ແລະ ຄວາມຂັດຂ້ອງໝອງໃຈ ຂອງປະຊາຊົນບັນດາເຜົ່າ, ທັງຊອກຮູ້ຜົນກະທົບດ້ານດີ ແລະ ດ້ານອ່ອນ ຂອງການປະຕິບັດນະໂຍບາຍດ້ານຕ່າງໆ ແນໃສ່ຜັນຂະຫຍາຍດ້ານດີ ແລະ ຈຳກັດດ້ານຂາດຕົກບົກຜ່ອງ ໃຫ້ທັນເວລາ.
4. ຄຸນຄ່າທີ່ເປັນແບບຢ່າງໃນການຕັ້ງໜ້າຊຸກຍູ້ການເຕົ້າໂຮມຄວາມສາມັກຄີ ໃນການປະຕິບັດແນວທາງ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ປົກປ້ອງເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ ໄວ້ໃຫ້ໝັ້ນຄົງ.
5. ຄຸນຄ່າດ້ານບົດຮຽນທີ່ສຳຄັນໃນການເປີດກວ້າງການທູດປະຊາຊົນ, ການພົວພັນຮ່ວມມືສາກົນ ຕາມແນວທາງການຕ່າງປະເທດຂອງພັກ, ເສີມຂະຫຍາຍຄວາມສາມັກຄີ ລະຫວ່າງ ປະຊາຊົນລາວ ກັບ ປະຊາຊາດໃນໂລກ ບົນພື້ນຖານ ເຄົາລົບເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ, ບໍ່ແຊກແຊງເຂົ້າວຽກງານພາຍໃນ ຂອງກັນ ແລະ ກັນ ສະເໝີພາບຕ່າງຝ່າຍຕ່າງໄດ້ຮັບຜົນປະໂຫຍດ.
ບັນດາຄຸນຄ່າທີ່ຍົກຂຶ້ນນັ້ນ, ສະແດງເຖິງຄວາມເອົາໃຈໃສ່ຊີ້ນຳ ຂອງການນຳພັກ-ລັດ ກ່ຽວກັບວຽກງານແນວໂຮມ ແລະ ວຽກງານມະຫາຊົນ ເວົ້າລວມ, ເວົ້າສະເພາະ ແມ່ນການຊີ້ນຳໂດຍກົງຂອງ ປະທານ ຄຳໄຕ ສີພັນດອນເຖິງຈະຢູ່ໃນຖານະ ແລະ ຄວາມຮັບຜິດຊອບໃດກໍຕາມ ເພິ່ນລ້ວນແຕ່ໃຫ້ຄວາມສຳຄັນ, ໃກ້ຊິດຕິດແທດ ແລະ ຊີ້ນຳຢ່າງຕໍ່ເນື່ອງ ບັນດາຄຸນຄ່າທັງຢູ່ໃນການປະພຶດຕົວຈິງຂອງເພິ່ນ ແລະ ສະແດງອອກໃນບັນດານິຕິກຳສຳຄັນ ຂອງພັກ-ລັດ ຊຶ່ງໄດ້ສະແດງເຖິງຄວາມເປັນຫ່ວງເປັນໃຍ, ການຊີ້ທິດເຍື້ອງທາງ ກໍຄືການອຸທິດຕົນໃຫ້ແກ່ປະເທດຊາດ, ໃຫ້ແກ່ພັກ, ໃຫ້ແກ່ການປະຕິວັດ ແລະ ຄວາມຢູ່ດີກິນດີ ຂອງປະຊາ ຊົນບັນດາເຜົ່າ.