ໃນປະເທດແອັດສະປາຍ, ເຈົ້າໜ້າທີ່ກ່າວວ່າມີ 2 ຄົນເສຍຊີວິດຍ້ອນໄຟໄໝ້ປ່າໃນແຄວ້ນຄາຕາລູນຍາ ແລະ ຍັງມີລາຍງານການເສຍຊີວິດຈາກຄື້ນຄວາມຮ້ອນໃນເອຊເຕຣມາດູຣາ ແລະ ກໍໂດບາ ດ້ວຍ. ໃນປະເທດຝຣັ່ງ, ລັດຖະ ມົນຕີກະຊວງພະລັງງານ ກ່າວວ່າ: ມີ 2 ຄົນເສຍຊີວິດຍ້ອນຄື້ນຄວາມຮ້ອນ ແລະ ອີກ 300 ຄົນຖືກສົ່ງໄປໂຮງໝໍ, ສ່ວນປະເທດອີຕາລີ, ANSA ລາຍງານວ່າ: ມີຜູ້ຊາຍສອງຄົນທີ່ມີອາຍຸຫຼາຍກວ່າ 60 ປີ ເສຍຊີວິດຢູ່ຫາດຊາຍໃນ ຊາຣດິເນຍ ຂອງປະເທດແອັດສະປາຍ ເນື່ອງຈາກຄື້ນຄວາມຮ້ອນ. ທັງນີ້, ເຈົ້າໜ້າທີ່ອີຕາລີ ໄດ້ປະກາດແຈ້ງເຕືອນສີ ແດງສໍາລັບ 18 ເມືອງ, ໃນຂະນະທີ່ເຢຍລະມັນ ອຸນຫະພູມຄາດວ່າຈະສູງເຖິງ 40 ອົງສາ ໃນບາງພື້ນທີ່ ແລະ ເຮັດໃຫ້ເປັນມື້ທີ່ຮ້ອນທີ່ສຸດຂອງປີ.
ໃນຂະນະທີ່ຄື້ນຄວາມຮ້ອນໃນຕົ້ນລະດູຮ້ອນໄດ້ສືບຕໍ່ແຜ່ປົກຄຸມພື້ນທີ່ສ່ວນໃຫຍ່ຂອງເອີຣົບ ໃນວັນທີ 2 ກໍລະກົດ ຜ່ານມາ, ສົ່ງຜົນໃຫ້ເກີດການແຈ້ງເຕືອນດ້ານສຸຂະພາບ ແລະ ໄຟປ່າ.
ກົມອຸຕຸນິຍົມວິທະຍາຂອງຝຣັ່ງ ລະບຸວ່າ: ການແຈ້ງເຕືອນສີແດງຍັງຄົງຢູ່ໃນພາກກາງຂອງຝຣັ່ງ, ໂດຍມີຄວາມສ່ຽງສູງທີ່ສຸດສຳລັບປະຊາກອນທີ່ມີຄວາມສ່ຽງ. ຂະນະທີ່ເຈົ້າໜ້າທີ່ຍັງສືບຕໍ່ຕິດຕາມສະຖານະການຕໍ່ໄປ.
ອີຕາລີ, ຝຣັ່ງ ແລະ ເຢຍລະມັນ ໄດ້ເຕືອນເຖິງຄວາມສ່ຽງທີ່ຈະເກີດພາຍຸຮ້າຍແຮງຍ້ອນອຸນຫະພູມທີ່ເພີ່ມສູງຂຶ້ນ.
ໃນວັນທີ 1 ກໍລະກົດ ຜ່ານມາ ທີ່ປະເທດເຢຍລະມັນ ພາຍຸໝາກເຫັບໄດ້ພັດເຂົ້າເມືອງຕ່າງໆ ແລະ ຕອນກາງຄືນຂອງວັນທີ 30 ມິຖຸນາ ຜ່ານມາ ມີຝົນຕົກໜັກຢູ່ເຂດພູ Alps ຂອງຝຣັ່ງ ຊຶ່ງເຮັດໃຫ້ເກີດດິນເຈື່ອນ ແລະ ສົ່ງຜົນເຮັດໃຫ້ການຈາລະຈອນທາງລົດໄຟລະຫວ່າງນະຄອນຫຼວງປາຣີ ແລະ ມິລານ ຢຸດສະງັກ.
ໃນປະເທດສະວິດ, ບໍລິສັດ Axpo ໄດ້ປິດເຕົາປະຕິກອນໜຶ່ງໜ່ວຍທີ່ໂຮງງານໄຟຟ້ານິວເຄລຍ Beznau ແລະ ຫຼຸດກຳລັງການຜະລິດລົງເຄິ່ງໜຶ່ງ ໃນວັນທີ 1 ກໍລະກົດ ຜ່ານມາເນື່ອງຈາກອຸນຫະພູມຂອງແມ່ນໍ້າຢູ່ໃນລະດັບສູງ. ທັງນີ້, ໂຮງງານນິວເຄລຍນໍາໃຊ້ນໍ້າໃນການລະບາຍຄວາມຮ້ອນ ແລະ ຈຸດປະສົງອື່ນໆ ແລະ ຄາດວ່າຈະຍັງຄົງມີການຈຳກັດການໃຊ້ງານຕໍ່ໄປໃນຂະນະທີ່ມີການຕິດຕາມກວດສອບອຸນຫະພູມ.
ບັນດາຜູ້ຊ່ຽວຊານກ່າວວ່າ: ການປ່ຽນແປງຂອງດິນຟ້າອາກາດເປັນສາເຫດທີ່ເຮັດໃຫ້ຄື້ນຄວາມຮ້ອນຮຸ່ນແຮງຂຶ້ນ, ພ້ອມທັງເຕືອນເຖິງຜົນກະທົບທາງດ້ານເສດຖະກິດ ແລະ ຄວາມຈຳເປັນໃນການຮັບມືກັບສະພາບອາກາດຮ້ອນແຮງ.
ຄໍາເຫັນ