ກຽມຍົກລະດັບດ່ານທ້ອງຖິ່ນປາກຕາພານ ຂຶ້ນເປັນດ່ານສາກົນ

ໃນວັນທີ 9 ເມສາຜ່ານມາ, ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະຈາກສູນກາງ ໄດ້ລົງໄປພົບປະເຮັດວຽກຮ່ວມກັບ ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ພ້ອມດ້ວຍຄະນະ ເພື່ອຮ່ວມກັນລົງກວດກາ, ເກັບກໍາຂໍ້ມູນ ແລະ ປຶກສາຫາລືກ່ຽວກັບ ຄວາມຄືບໜ້າໃນການກໍ່ສ້າງພື້ນຖານໂຄງລ່າງຂອງດ່ານທ້ອງຖິ່ນປາກຕາພານ ເມືອງລະຄອນເພັງ ແຂວງສາລະວັນ ເພື່ອກະກຽມຄວາມພ້ອມໃນການຍົກຂຶ້ນເປັນດ່ານສາກົນ.
ການລົງໄປກວດກາຄັ້ງນີ້, ເປັນການປະຕິບັດຕາມກົດໝາຍວ່າດ້ວຍຊາຍແດນແຫ່ງຊາດ, ດໍາລັດວ່າດ້ວຍດ່ານຊາຍແດນ ແລະ ສະໜາມບິນສາກົນ ສະບັບເລກທີ 558/ລບ, ລົງວັນທີ 31 ທັນວາ 2018, ມາດຕາ 25 ແລະ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1581/ຫສນຍ, ລົງວັນທີ 24 ສິງຫາ 2023 ເຫັນດີອະນຸມັດໃຫ້ອົງການປົກຄອງຂອງແຂວງສາລະວັນ ສືບຕໍ່ປັບປຸງໂຄງລ່າງພື້ນຖານ ເພື່ອກະກຽມຍົກລະດັບດ່ານທ່ອງຖີ່ນປາກຕາພານ ຂຶ້ນເປັນດ່ານສາກົນ. ຊຶ່ງດ່ານດັ່ງກ່າວ ເປັນດ່ານຊາຍແດນທາງແມ່ນໍ້າຂອງ, ຕັ້ງຢູ່ຊຶ່ງໜ້າກັບຈຸດຜ່ານແດນຖາວອນ (ດ່ານສາກົນ) ປາກແຊງ ຕໍາບົນພະລານ ອໍາເພີນາຕານ ຈັງຫວັດອຸບົນຣາຊະທານີ, ມີເສັ້ນທາງເຊື່ອມຕໍ່ກັບເສັ້ນທາງຫຼວງແຫ່ງຊາດເລກທີ 13 ໃຕ້, ຊຶ່ງເປັນທາງປູຢາງສອງຊັ້ນເລກທີ 2.6901 ຢູ່ຈຸດຕັດກັບສາມແຍກບ້ານຖໍ້າພວງ, ເມືອງລະຄອນເພັງ ລວງຍາວປະມານ 17,5 ກິໂລແມັດ. 
ຜ່ານການລົງສໍາຫຼວດ, ເກັບກໍາຂໍ້ມູນເຫັນວ່າ ເປັນຈຸດຍຸດທະສາດທີ່ມີຄວາມສໍາຄັນໃຫ້ແກ່ການປະກອບສ່ວນອຳນວຍຄວາມສະດວກໃນການບໍລິການ, ການຂົນສົ່ງສິນຄ້າ ລະຫວ່າງ ປະເທດ, ຜູ້ໂດຍສານ, ນັກທ່ອງທ່ຽວ, ການເຂົ້າ-ອອກຂອງປະຊາຊົນ, ປະກອບສ່ວນສ້າງສາຍພົວພັນມິດຕະພາບທີ່ດີກັບປະເທດເພື່ອນບ້ານ, ບັນດາປະເທດໃນພາກພື້ນ ແລະ ສາກົນ ແນໃສ່ເຮັດໃຫ້ການພັດທະນາເສດຖະກິດ ແລະ ສັງຄົມແຫ່ງຊາດໃຫ້ມີການຂະຫຍາຍຕົວ ແລະ ຍືນຍົງ, ໂດຍສະເພາະຊີວິດການເປັນຢູ່ຂອງປະຊາຊົນແຂວງສາລະວັນ ກໍຄືປະຊາຊົນລາວບັນດາເຜົ່າໃຫ້ມີຄວາມສົມບູນພູນສຸກຂຶ້ນໄປເລື້ອຍໆ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດໃຫ້ມີຄວາມຮຸ່ງເຮືອງສີລິວິໄລ. ມາເຖິງປັກຈຸບັນການກໍ່ສ້າງພື້ນຖານໂຄງລ່າງຂອງດ່ານແມ່ນມີຄວາມພ້ອມ ແລະ ສຳເລັດໃນຫຼາຍດ້ານ, ໂດຍສະເພາະແຜນຜັງລວມຂອງດ່ານ, ເສັ້ນທາງຄົມມະນາຄົມ, ຕຶກອາຄານ ຫ້ອງການຂອງເຈົ້າໜ້າທີ່ກວດກາຄົນເຂົ້າ-ອອກເມືອງ, ເຈົ້າໜ້າທີ່ພາສີ, ເຮືອນພັກພະນັກງານ, ບຸກຄະລາກອນ ແລະ ດ້ານອື່ນໆເຫັນວ່າມີຄວາມພ້ອມ. ຊຶ່ງຈະນຳສະເໜີຕໍ່ລັດຖະບານພິຈາລະນາອະນຸມັດເປັນດ່ານສາກົນໃນຂັ້ນຕໍ່ໄປ.
(ຂ່າວ: ກະຊວງການຕ່າງປະເທດ)