ກິດຈະກໍາ ປຸກລະດົມບໍລິຈາກເລືອດ, ໂຄສະນາຜົນຮ້າຍຢາເສບຕິດ ແລະ ຂັບຂີ່ປອດໄພ

ທ່ານ ໄຊຍະພອນ ວົງຫາຈັກ ກ່າວວ່າ: ການຈັດກິດຈະກໍາຄັ້ງນີ້, ກໍເພື່ອເປັນການສະເຫຼີມສະຫຼອງວັນສໍາຄັນຕ່າງໆ ຂອງພັກ-ຂອງຊາດ ໂດຍສະເພາະວັນສ້າງຕັ້ງຊາວໜຸ່ມ ປປ ລາວ ຄົບຮອບ 71 ປີ (14 ເມສາ 1955-14 ເມສາ 2026), ທັງເປັນການໂຄສະນາເຜີຍແຜ່ລະບຽບການໃຊ້ລົດໃຊ້ຖະໜົນ, ລະບຽບການສັນຈອນທາງຖະໜົນ, ລະບຽບການຂັບຂີ່ປອດໄພ, ຂໍ້ຄວນລະວັງໃນການຂັບຂີ່, ປ້າຍຫ້າມ, ປ້າຍບອກສິດ ແລະ ປ້າຍເຕືອນຕ່າງໆ; ຮູ້ຈັກປະເພດ ແລະ ຜົນຮ້າຍຂອງຢາເສບຕິດ (ປະເພດຢາບ້າ) ໂດຍສະເພາະຜົນຮ້າຍຕໍ່ຜູ້ເສບ, ຜູ້ຜະລິດ, ຄອບຄົວ, ສັງຄົມ ແລະ ຜົນຮ້າຍຕໍ່ປະເທດຊາດ. ທັງໝົດເຫຼົ່ານີ້, ກໍແມ່ນເປັນການປະກອບສ່ວນເຂົ້າໃນການແກ້ໄຂບັນຫາຢາບເສບຕິດ ກໍຄື ບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງເປັນກ້າວໆ. ພ້ອມນີ້, ຍັງເປັນການໂຄສະນາສຶກສາອົບຮົມປຸກລະດົມປູກຈິດສໍານຶກ ສະມາຊິກພັກ, ພະນັກງານ ກໍຄື ສະມາຊິກຊາວໜຸ່ມ-ໄວໜຸ່ມ ໃຫ້ມີນໍ້າໃຈເສຍສະຫຼະປະກອບສ່ວນຊ່ວຍເຫຼືອສັງຄົມ ໂດຍສະເພາະແມ່ນການບໍລິຈາກເລືອດ ທີ່ບໍ່ຫວັງສິ່ງຕອບແທນ, ເພາະເລືອດບໍ່ມີບໍລິສັດ ຫຼື ບຸກຄົນໃດຜະລິດໄດ້ ມີແຕ່ຄົນເຮົາເທົ່ານັ້ນທີ່ຈະເອົາເລືອດອອກ ເພື່ອຊ່ວຍເຫຼືອເຊິ່ງກັນ ແລະ ກັນໃຫ້ແກ່ຜູ້ປ່ວຍ, ຂາດເລືອດ, ການຜ່າຕັດ, ການເກີດອຸບັດເຫດ ແລະ ອື່ນໆ.

(ຂ່າວ: ສັນຍາ)