ໂອກາດດັ່ງກ່າວ, ທ່ານ ບົວລີ ເພັດມີໄຊ ໄດ້ແຈ້ງຈຸດປະສົງຕໍ່ກອງປະຊຸມ ກ່ຽວກັບການແຈ້ງຕອບ ແລະ ການພົບປະກັບປະຊາຊົນໃນຄັ້ງນີ້ ແມ່ນການຜັນຂະຫຍາຍ ຄໍາສັ່ງ ຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍການແຈ້ງຕອບ ແລະ ພົບປະກັບປະຊາຊົນ ສະບັບເລກທີ 028/ອອປສ, ລົງວັນທີ 25 ຕຸລາ 2023 ແລະ ແຈ້ງການ ຂອງຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ວ່າດ້ວຍການພົບປະກັບພະນັກງານໄອຍະການ ອົງການໄອຍະການປະຊາຊົນສູງສຸດ ສະບັບເລກທີ 002/ກຄສ, ລົງວັນທີ 30 ມັງກອນ 2025. ນອກຈາກນັ້ນ, ກອງປະຊຸມ ຍັງໄດ້ນຳສະເໜີບັນຫາ ກ່ຽວກັບການຄ້ຳປະກັນ ເພື່ອປ່ອຍຕົວພາງ ຕາມເງື່ອນໄຂ ແລະ ແຕ່ລະກໍລະນີ ທີ່ກໍານົດໄວ້ໃນກົດໝາຍ, ການຈັດຕັ້ງປະຕິບັດໂທດ, ການຄິດໄລ່ໂທດທາງອາຍາ ແມ່ນພາກສ່ວນໃດປະຕິບັດຕົວຈິງ. ນອກຈາກນີ້, ຍັງມີການຍົກເຫດຍົກຜົນ ແລະ ຊີ້ແຈງໃນກໍລະນີມີການກັກຂັງເກີນ ໃຫ້ພໍ່ແມ່ ແລະ ຍາດຕິພີ່ນ້ອງ ຜູ້ຖືກຫາຊາບເຖິງວິທີແກ້ໄຂ ແລະ ເຂົ້າໃຈບັນຫາດັ່ງກ່າວ. ໃນກອງປະຊຸມ ໄດ້ມີການຖອດຖອນບົດຮຽນ ແລະ ຟັງຄໍາຄິດເຫັນ ຈາກເຈົ້າຂອງຄໍາຮ້ອງ ແລະ ຜູ້ຕາງໜ້າ ກໍຄືປະຊາຊົນທີ່ເຂົ້າຮ່ວມ ໂດຍໄດ້ມີການແລກປ່ຽນຄໍາເຫັນ ຢ່າງກົງໄປກົງມາ ໂດຍອີງໃສ່ ກົດໝາຍ ແລະ ລະບຽບການ ທີ່ກ່ຽວຂ້ອງ.
ໃນຕອນທ້າຍ ປະທານກອງປະຊຸມ ຍັງໄດ້ມີຄໍາເຫັນວ່າ ການແຈ້ງຕອບ ແລະ ການພົບປະກັບປະຊາຊົນ ແມ່ນການເຄື່ອນໄຫວປະຕິບັດໜ້າທີ່ວຽກງານ ໃນລະບົບອົງການໄອຍະການປະຊາຊົນ ເພື່ອອໍານວຍຄວາມສະດວກ ແກ່ສັງຄົມຢ່າງໂປ່ງໃສ, ຍຸຕິທໍາ ແລະ ຮັບໃຊ້ປະຊາຊົນຢ່າງແທ້ຈິງ, ເຮັດໃຫ້ຜູ້ທີ່ມາພົວພັນວຽກງານກ່ຽວກັບຄະດີ ແລະ ຄໍາຮ້ອງ ເຂົ້າໃຈເຖິງຂັ້ນຕອນ ແລະ ກໍານົດເວລາການແກ້ໄຂຄະດີ ຂອງອົງການໄອຍະການປະຊາຊົນ ແລະ ເປັນການເພີ່ມທະວີຄວາມເຂັ້ມງວດໃຫ້ແກ່ພະນັກງານໄອຍະການປະຊາຊົນ ໃຫ້ປະຕິບັດໜ້າທີ່ຕາມກົດໝາຍ, ໃນຕໍ່ໜ້ານີ້ ສໍາລັບປະຊາຊົນ, ອົງການຈັດຕັ້ງລັດ, ສັງຄົມ, ນິຕິບຸກຄົນ ໃນທົ່ວສັງຄົມທີ່ມີຄວາມສົນໃຈ ໂດຍສະເພາະແມ່ນຂັ້ນຕອນການພິຈາລະນາແກ້ໄຂຄະດີ, ຄໍາຮ້ອງ ແລະ ບັນຫາອື່ນໆ ທີ່ກ່ຽວຂ້ອງກັບອົງການໄອຍະການປະຊາຊົນ ແມ່ນສາມາດຍື່ນຄໍາຮ້ອງ, ຄໍາສະເໜີຕໍ່ຫົວໜ້າອົງການໄອຍະການປະຊາຊົນສູງສຸດ ເພື່ອພົບປະໃນການຄົ້ນຄວ້າພິຈາລະນາບັນຫາຕ່າງໆຕາມກົດໝາຍ ແລະ ລະບຽບການທີ່ກໍານົດໄວ້.
(ຂ່າວ: ອອປສ)
ຄໍາເຫັນ