ກົງ​ໂກ ສະຫຼຸບພະ​ຍາດ​ແປ​ກ​ໃໝ່ X ແມ່ນ​ພະ​ຍາດ​ໄຂ້​ຍຸງປະເພດ​ຮ້າຍແຮງ

ຂ່າວຕ່າງປະເທດລາຍງານ ໃນວັນທີ 19 ມີນາ ຜ່ານມາວ່າ: ທ່ານ ຄຣິສໂຕເຟີ ລູຊອນ ນາຍົກລັດຖະມົນຕີນູແວນເຊລັງ ໄດ້ເຕືອນວ່າ: ຂໍ້ຂັດແຍ່ງທີ່ຍືດເຍື້ອໃນຕາເວັນອອກກາງອາດຈະສົ່ງຜົນກະທົບຕໍ່ການສະໜອງນໍ້າມັນທົ່ວໂລກ ແລະ ລັດຖະບານນູແວນເຊລັງ ກຳລັງພິຈາລະນາເພີ່ມມາດຕະການຕອບໂຕ້ໃນອາທິດໜ້າ.

ຂ່າວຕ່າງປະເທດລາຍງານຫວ່າງມໍ່ໆມານີ້ວ່າ: ທ່ານ ເຊີເກ ໂຊເບຍນິນ ເຈົ້າຄອງນະຄອນຫຼວງມົສກູ ໄດ້ປະກາດວ່າ, ຣັດເຊຍ ໄດ້ເປີດສູນທົດສອບເຕັກໂນໂລຊີຫຸ່ນຍົນ ແລະ ລະບົບຂັບຂີ່ອັດຕະໂນມັດຢ່າງເຕັມຮູບແບບແຫ່ງທຳອິດຂອງຣັດເຊຍໃນນະຄອນຫຼວງມົສກູ ຊຶ່ງອອກແບບມາເພື່ອທົດສອບເຕັກໂນໂລຊີດັ່ງກ່າວທັງໃນດ້ານໂລຈິສຕິກ, ການຂົນສົ່ງ, ການກໍ່ສ້າງ ແລະ ການເຝົ້າລະວັງ.

ຂ່າວສານຊີອາໄອລາຍງານວ່າ: ເມື່ອບໍ່ດົນມານີ້, ກອງ​ປະ​ຊຸມ​ຄັ້ງ​ທີ 61 ຂອງ​ສະ​ພາສິດ​ທິ​ມະ​ນຸດ​​ອົງ​ການ​ສະ​ຫະ​ປະ​ຊາ​ຊາດ​ ໄດ້​ຈັດ​ກອງ​ປະ​ຊຸມ​ອະ​ພິ​ປາຍ​ທົ່ວ​ໄປ​ກ່ຽວ​ກັບ​ບັນ​ຫາ​ສິດ​ທິ​ມະ​ນຸດ​ຂອງ​ປະ​ເທດ​ຕ່າງ​ໆ, ທ່ານ​ນາງ ຫຼີ​ຊ້ຽວ​ເມີຍ ຮອງ​ຫົວ​ໜ້າ​ຄະ​ນະ​ຜູ້​ແທນ​ຈີນ​ໄດ້​ກ່າວ​ຄຳ​ປາ​ໄສ​ໂດຍ​ເນັ້ນ​ໜັກ​ວ່າ: ວັນ​ທີ 15 ມີ​ນາ​ ​​ແມ່ນ​ວັນ​ຄົບ​ຮອບ 20 ປີ​ທີ່​ສະ​ມັດ​ຊາ​ໃຫຍ່ອົງ​ການ​ສະ​ຫະ​ປະ​ຊາ​ຊາດ​ໄດ້​ຮັບ​ຮອງ​ເອົາ​ມະ​ຕິ​ວ່າ​ດ້ວຍ​ການ​ສ້າງ​ຕັ້ງ​ສະ​ພາ​ສິດ​ທິ​ມະ​ນຸດ, ແຕ່​ປັດ​ຈຸ​ບັນ ລັດ​ທິ​ຫຼາຍ​ຝ່າຍ ​ແລະ ​ວຽກ​ງານ​ສິດ​ທິ​ມະ​ນຸດ​ທົ່ວ​ໂລກ​ກຳ​ລັງຜະ​ເຊີນ​ໜ້າ​ກັບ​ສິ່ງ​ທ້າ​ທາຍ​ທີ່​ບໍ່​ເຄີຍ​ມີ​ມາ​ກ່ອນ​ໃນ​ປະ​ຫວັດ​ສາດ, ສະ​ຖາ​ນະ​ການ​ຂອງ​ພາກ​ພື້ນ​ໄດ້​ສົ່ງ​ຜົນ​ກະ​ທົບ​ຕໍ່​ສັນ​ຕິ​ພາບ ​ແລະ​ ຄວາມ​ໝັ້ນ​ຄົງ​ສາ​ກົນ​ຢ່າງ​ເລິກ​ເຊິ່ງ ແລະ​ ໄດ້​ສ້າງ​ໄພ​ພິ​ບັດ​ດ້ານ​ສິດ​ທິ​ມະ​ນຸດ ​ແລະ​ ມະ​ນຸດ​ສະ​ທຳ.

ວິທະຍຸກະຈາຍສຽງຫວຽດນາມ ລາຍງານວ່າ: ຫວ່າງມໍ່ໆມານີ້ ຢູ່ສຳນັກງານລັດຖະບານ, ທ່ານ ຟ້າມມິງຈິງນາຍົກລັດຖະມົນຕີ ຫວຽດນາມ ໄດ້ໃຫ້ການຕ້ອນຮັບທ່ານ ຄາລິດ ອາລີ ອັບດູລາ ອາເບນ ເອກອັກຄະລັດຖະທູດ ລັດ ກາຕາ ປະຈຳ ຫວຽດນາມ.

ຂ່າວຕ່າງປະເທດລາຍງານໃນວັນທີ 18 ມີນາ ຜ່ານມາວ່າ: ສາຍການບິນທົ່ວໂລກກຳລັງຄ່ອຍໆຂຶ້ນລາຄາໂດຍສານ ແລະ ຫຼຸດຖ້ຽວບິນໃນບາງເສັ້ນທາງ ຫຼັງຈາກລາຄານໍ້າມັນເຊື້ອໄຟເຮືອບິນເພີ່ມຂຶ້ນສູງ ຍ້ອນຂໍ້ຂັດແຍ້ງລະຫວ່າງສະຫະລັດ ອາເມຣິກາ, ອິສຣາເອນ ແລະ ອີຣານ ສ້າງຄວາມກົດດັນຢ່າງຫຼວງຫຼາຍຕໍ່ຄ່າໃຊ້ຈ່າຍໃນການດຳເນີນງານຂອງອຸດສາຫະກຳການບິນ.

ຂ່າວຕ່າງປະເທດລາຍງານໃນວັນທີ 17 ມີນາ ຜ່ານມາວ່າ: ທ່ານ ເຈ ແທວອນ ປະທານບໍລິສັດ SK Hynix ໄດ້ເປີດເຜີຍໃນວັນທີ 16 ມີນາ ຜ່ານມາວ່າ, ການຂາດແຄນຊິບໜ່ວຍຄວາມຈຳມີທ່າອ່ຽງທີ່ຈະສືບຕໍ່ໄປຈົນຮອດປີ 2030 ເນື່ອງຈາກຄວາມຕ້ອງການດ້ານປັນຍາປະດິດ (AI) ເພີ່ມຂຶ້ນຢ່າງຫຼວງຫຼາຍ.

ຂ່າວຕ່າງປະເທດລາຍງານວ່າ: ອົງການມະນຸດສະທຳຂອງສະຫະປະຊາຊາດ (UN) ໄດ້ເຕືອນໃນວັນທີ 17 ມີນາ ຜ່ານມາວ່າ, ຈຳນວນປະຊາກອນທົ່ວໂລກທີ່ປະເຊີນກັບຄວາມອຶດຫິວຢ່າງຮຸນແຮງອາດຈະເພີ່ມຂຶ້ນອີກຫຼາຍສິບລ້ານຄົນ ທ່າມກາງຄວາມພະຍາຍາມຮຽກຮ້ອງໃຫ້ມີການແກ້ໄຂທາງການທູດຕໍ່ສະຖານະການໃນຕາເວັນອອກກາງ.

ຂ່າວຕ່າງປະເທດລາຍງານໃນວັນທີ 18 ມີນາ ຜ່ານມາວ່າ: ທ່ານ ມາຍູຣາ ເນທິກຸມາຣາເກ ຜູ້ອຳນວຍການຝ່າຍບໍລິຫານຂອງບໍລິສັດນ້ຳມັນເຊລອນ (Ceylon Petroleum Corporation) ໄດ້ເປີດເຜີຍວ່າ: ສີລັງກາ ໄດ້ເລີ່ມບໍລິການຂາຍນ້ຳມັນເຊື້ອໄຟໂດຍອີງໃສ່ລະບົບເລກທະບຽນຍານພາຫະນະ ຄູ່-ຄີກ ໃນວັນທີ 18 ມີນາ ຜ່ານມາ, ໂດຍພາຫະນະທີ່ມີເລກທະບຽນລົງທ້າຍດ້ວຍເລກຄູ່ ຫຼື ສູນ ສາມາດຊື້ນ້ຳມັນເຊື້ອໄຟໃນມື້ທີ່ມີເລກຄູ່ ແລະ ພາຫະນະທີ່ມີເລກທະບຽນເລກຄີກ ສາມາດຊື້ນ້ຳມັນເຊື້ອໄຟໃນມື້ທີ່ມີເລກຄີກ.

ຂ່າວສານຊີອາໄອລາຍງານໃນວັນທີ 18 ມີນາ ຜ່ານມາວ່າ: ປີ​ນີ້​ແມ່ນ​ປີ​ເລີ່ມ​ຕົ້ນ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມແຫ່ງ​ຊາດ 5 ປີ​ຄັ້​ງ​ທີ 15, ຈີນ​ຈະ​ສືບ​ຕໍ່​ປະ​ຕິ​ບັດ​ນະ​ໂຍ​ບາຍ​ການ​ເງິນ​ທີ່​ຕັ້ງ​ໜ້າກວ່າ​ເກົ່າ. ຕົ້ນ​ຕໍ​ຈະ​​ສຸມ​ໃສ່ສະ​ໜັບ​ສະ​ໜູນ​ການ​ສ້າງ​ຕະ​ຫຼາດ​ພາຍ​ໃນ​ປະ​ເທດ​ທີ່​ເຂັ້ມ​ແຂງ; ສະ​ໜັບ​ສະ​ໜູນ​ການ​ເລັ່ງ​​ການ​ບົ່ມ​ເພາະ​​ ແລະ​ ການ​ຂະ​ຫຍາຍ​ຕົວ​ຂອງ​ຕົວ​ຂັບ​ເຄື່ອນ​ການ​ເຕີບ​ໂຕ, ປະ​ຕິ​ບັດ​ການ​ເຄື່ອນ​ໄຫວ​ການ​ພັດ​ທະ​ນາ​ທີ່​ມີ​ຄຸນ​ນະ​ພາບ​ສູງ​ຂອງ​ຕ່ອງ​ໂສ້​ການ​ຜະ​ລິດ​ທີ່​ສຳ​ຄັນ​ຂອງ​ອຸດ​ສາ​ຫະ​ກຳ​ການ​ຜະ​ລິດ​ຕາມ​ລຳ​ດັບ, ຈັດ​ຕັ້ງ​ປະ​ຕິ​ບັດ​ຕົວ​ເມືອງ​ທົດ​ລອງ​ຊຸດ​ທີ 3 ສໍາລັບ​ການ​ຫັນ​ເປັນ​ເຕັກ​ໂນ​ໂລ​ຊີ​ແບບ​ໃໝ່​ໃນ​ອຸດ​ສາ​ຫະ​ກຳ​ການ​ຜະ​ລິດ, ສືບ​ຕໍ່​ປະ​ຕິ​ບັດ​ນະ​ໂຍ​ບາຍ​ໃຫ້​ລາງວັນ​ ແລະ​ ໃຫ້​ການ​ອຸດ​ໜູນ​ດ້ານ​ການ​ເງິນ​ຕໍ່​ວິ​ສາ​ຫະ​ກິດ​ຂະ​ໜາດ​ກາງ​ ແລະ​ ນ້ອຍ​ທີ່​ມີ​ຄວາມ​ຊ່ຽວ​ຊານ, ມີ​ຄຸນ​ນະ​ພາບ​ສູງ ​ແລະ​ ມີ​ຫົວ​ຄິດ​ປະ​ດິດ​ສ້າງ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 18 ມີນາ ຜ່ານມາ ຢູ່ສຳນັກງານສູນກາງພັກ ທີ່ນະຄອນຫຼວງຮ່າໂນ້ຍ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ເປັນປະທານກອງປະຊຸມກ່ຽວກັບເຕັກໂນໂລຊີຍຸດທະສາດຂອງຄະນະຊີ້ນຳສູນກາງ ແລະ ການພັດທະນາວິທະຍາສາດ, ເຕັກໂນໂລຊີ, ນະວັດຕະກຳ ແລະ ການຫັນເປັນດີຈີຕອນ. ເຂົ້າຮ່ວມກອງປະຊຸມຍັງມີທ່ານ ຟ້າມມິນຈິງ ນາຍົກລັດຖະມົນຕີ.