 |
ກອງປະຊຸມໃນຄັ້ງນີ້, ເພື່ອປຶກສາຫາລື ແລະ ຊອກຫາມາດຕະການຮ່ວມກັນ ໃນການປົກປ້ອງເດັກ, ສຸມໃສ່ການປ້ອງກັນ ແລະ ຫຼຸດຜ່ອນບັນຫາການໃຊ້ແຮງງານເດັກ ຢູ່ໃນແຂວງຫຼວງພະບາງ ໃຫ້ມີປະສິດທິຜົນສູງສຸດ, ໂດຍເນັ້ນໃສ່ເດັກ ຢູ່ເຂດຫ່າງໄກສອກຫຼີກ ພາຍໃນ 30 ບ້ານ ຂອງ 6 ເມືອງ ຄື: ເມືອງນໍ້າບາກ, ງອຍ, ວຽງຄໍາ, ໂພນທອງ, ໂພນໄຊ ແລະ ເມືອງປາກແຊງ, ໂດຍມີກິດຈະກໍາຮ່ວມກັບຄະນະກໍາມະການ 3 ຝ່າຍ ຂັ້ນແຂວງ ຄື: ຂະແໜງແຮງງານ, ກໍາມະບານແຂວງ ແລະ ສະພາການຄ້າແຂວງ.
ທ່ານ ມີໄຊ ໄຊເກີຢາຈົງຕົວ ໄດ້ມີຄໍາເຫັນ ກ່າວວ່າ: ບັນຫາການໃຊ້ແຮງງານເດັກ ແມ່ນສິ່ງທ້າທາຍລະດັບຊາດ ທີ່ສົ່ງຜົນກະທົບໂດຍກົງຕໍ່ການພັດທະນາທາງດ້ານຮ່າງກາຍ, ຈິດໃຈ ແລະ ການເຂົ້າເຖິງການສຶກສາຂອງເດັກ, ພັກ-ລັດ ກໍຄືກະຊວງແຮງງານ ແລະ ສະຫວັດດີການສັງຄົມ ຈຶ່ງໄດ້ຮ່ວມມືກັບ ອົງການຊ່ວຍເຫຼືອເດັກສາກົນ ປະຈຳ ສປປ ລາວ ໄດ້ໃຫ້ຄວາມສໍາຄັນ ແລະ ມີຄວາມມຸ່ງໝັ້ນຢ່າງແຮງກ້າ ໃນການລົບລ້າງການໃຊ້ແຮງງານເດັກໃນທຸກຮູບແບບ ໂດຍຜ່ານການສ້າງນິຕິກຳ ແລະ ກົນໄກການປົກປ້ອງ.
ກອງປະຊຸມຄັ້ງນີ້, ເປັນການເປີດໂອກາດໃນການສົນທະນາ-ວາງແຜນຮ່ວມກັນ ລະຫວ່າງ ໂຄງການ ແລະ ຄະນະກຳມະການ ໂດຍສະເພາະການອໍານວຍຄວາມສະດວກໃນການເຄື່ອນໄຫວວຽກງານ ແລະ ສ້າງຄວາມເຂັ້ມແຂງ ໃຫ້ແກ່ຄະນະກຳມະການ 3 ຝ່າຍ ເພື່ອເປັນກົນໄກໃນການກວດກາ ຕິດຕາມ ສະພາບການຈ້າງງານ, ປົກປ້ອງແຮງງານ ແລະ ການປະຕິບັດນິຕິກຳທີ່ກ້ຽວຂ້ອງ, ແນວທາງໃນການຮັບມື ແລະ ວິທີການຫຼຸດຜ່ອນ ການໃຊ້ແຮງງານເດັກພາຍໃນແຂວງຫຼວງພະບາງ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການນໍາສະເໜີ ເປົ້າໜາຍໂຄງການ ແລະ ກິດຈະກໍາ, ທົບທວນພາລະບົດບາດສິດ ແລະ ໜ້າທີ່ ໃນການຄຸ້ມຄອງແຮງງານເດັກ, ບັນຫາຂໍ້ກໍານົດ, ຂໍ້ຫ້າມ ແລະ ການປະກອບຄໍາເຫັນ ກ່ຽວກັບພາລະບົດບາດຂອງຂະແໜງການທີ່ກ່ຽວຂ້ອງ, ຊຶ່ງບັນດາວຽກງານທີ່ໄດ້ຈັດຕັ້ງປະຕິບັດ ແມ່ນອົງການຊ່ວຍເຫຼືອເດັກສາກົນປະຈຳແຂວງຫຼວງພະບາງ ເປັນເຈົ້າການຮ່ວມກັບພາກສ່ວນກ່ຽວຂ້ອງ, ໂດຍໄດ້ຮັບທືນສະໜັບສະໜູນຈາກ ສະຫະພາບເອີຣົບ ຫຼື ອົງການ ອີຢູ.
(ຂ່າວ-ພາບ: ທະນູສີນ ອິດທິພົນ)
ຄໍາເຫັນ