ເຈົ້າຄອງນະຄອນຫຼວງວຽງຈັນ, ທ່ານ ເຟເດຣິກ ວານລິເອຜູ້ແທນຂັ້ນສູງຂອງສະມາຄົມບັນດາເຈົ້າຄອງນະຄອນທີ່ນໍາໃຊ້ພາສາຝຣັ່ງAIMF,ທ່ານ ລີໂອນາດ ເນວ ຄະນະຜູ້ແທນສະຫະພາບເອີຣົບ, ມີຝຣັ່ງ, ສສຫວຽດນາມ, ຣາຊະອານາຈັກ ກໍາປູເຈຍ ແລະ ບັນດາຄະນະຜູ້ແທນຂອງແຂວງ, ນະຄອນ ເຂົ້າຮ່ວມ.
ທ່ານ ອາດສະພັງທອງ ສີພັນດອນ ກ່າວວ່າ: ກອງປະຊຸມເຄືອຂ່າຍບັນດານະຄອນອາຊີຕາເວັນອອກສ່ຽງໃຕ້ ຂອງສະມາຄົມບັນດາເຈົ້າຄອງນະຄອນທີ່ນໍາໃຊ້ພາສາຝຣັ່ງ AIMF ໄດ້ຈັດຂຶ້ນຄັ້ງທໍາອິດ ໃນປີ 2017 ໂດຍບັນດາອໍານາດການປົກຄອງທ້ອງຖິ່ນ ໃນພາກພື້ນອາຊີຕາເວັນອອກສ່ຽງໃຕ້ ໄດ້ມີການຈັດກອງປະຊຸມຮ່ວມກັນໃນກອບຂອງຄູ່ຮ່ວມຍຸດທະສາດ ລະຫວ່າງ ສະມາຄົມສາກົນເຈົ້າຄອງນະຄອນທີ່ນຳໃຊ້ພາສາຝຣັ່ງ (AIMF) ຮ່ວມກັບ ສະຫະພາບເອີຣົບ (EU), ໃນກອງປະຊຸມດັ່ງກ່າວໄດ້ຍົກໃຫ້ເຫັນເຖິງຄວາມສຳຄັນ ເເລະ ຄວາມຈຳເປັນຂອງການສ້າງຕັ້ງເຄືອຂ່າຍບັນດານະຄອນໃນພາກພື້ນອາຊີຕາເວັນອອກສຽງໃຕ້ (RVASE), ໂດຍມີຈຸດປະສົງ ເພື່ອການເສີມຂະຫຍາຍການຮ່ວມມື ແລະ ການແລກປ່ຽນແນວທາງການຈັດຕັ້ງປະຕິບັດທີ່ແທດເໝາະໃນການຮັບມືກັບວິກິດການ, ການເຊື່ອມໂຍງພົນລະເມືອງ ແລະ ການສົ່ງເສີມທາງດ້ານການພັດທະນາຕົວເມືອງ. ແຜນຈັດຕັ້ງປະຕິບັດງານເເມ່ນໄດ້ມີການຮັບຮອງ ໂດຍລະບຸຊັດເຈນດ້ານກອບຂອງການຮ່ວມມື ເພື່ອໃຫ້ບັນລຸເປົ້າໝາຍຮ່ວມກັນເຊັ່ນ: ການຄຸ້ມຄອງຂໍ້ມູນດ້ານເຕັກໂນໂລຊີ, ການຫັນເປັນນະຄອນອັດສະລິຍະ, ການຫັນເປັນຕົວເມືອງຕົວແບບມາດຖານ ແລະ ມີຄວາມເຂັ້ມແຂງ ໃນການຕ້ານກັບການປ່ຽນແປງທາງດ້ານດິນຟ້າອາກາດ.
ກອງປະຊຸມໃນຄັ້ງນີ້, ຈະກາຍເປັນຂີດໝາຍອັນສໍາຄັນເບື້ອງຕົ້ນທີ່ບັນດາທ່ານຄະນະຜູ້ແທນເຂົ້າຮ່ວມກອງປະຊຸມທັງໝົດໄດ້ປະກອບຄໍາເຫັນ, ປຶກສາຫາລື, ແລກປ່ຽນທັດສະນະຢ່າງເປັນຮູບປະທໍາ ແລະດ້ວຍເຫດຜົນຢ່າງເໝາະສົມ ແນໃສ່ເພື່ອເສີມສ້າງການພົວພັນ ແລະ ການຮ່ວມມືຂອງຂົງເຂດ. ພ້ອມນັ້ນ, ນວ ແມ່ນໄດ້ປະກອບສ່ວນອັນສໍາຄັນເຂົ້າໃນການເສີມສ້າງຄວາມສາມັກຄີ, ການພົວພັນຮ່ວມມື ຈະສືບຕໍ່ຊຸກຍູ້ນະໂຍບາຍແລະການຈັດຕັ້ງປະຕິບັດເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງ.ພ້ອມນີ້, ສປປລາວ ຍັງໄດ້ກຳນົດເອົາປີນີ້ເປັນ “ປີທ່ອງທ່ຽວລາວ 2024” ເພື່ອສົ່ງເສີມການທ່ອງທ່ຽວ ແລະສ້າງຄວາມເຂັ້ມແຂງໃຫ້ແກ່ການຮ່ວມມືທາງດ້ານເສດຖະກິດ-ສັງຄົມ ຮ່ວມກັບບັນດາປະເທດອາຊຽນໃນພາກພື້ນ ແລະໃນໂລກ ຊຶ່ງຈະນໍາເອົາຜົນປະໂຫຍດທາງດ້ານເສດຖະກິດໃນທາງກົງ ແລະທາງອ້ອມເຊື່ອມຈອດກັບພາກພື້ນແລະສາກົນ.
(ຂ່າວ: ວັນເພັງ-ພາບ: ສຸກສະຫວັນ)
ຄໍາເຫັນ