ກອງປະຊຸມກຳມາທິການວຽກງານເສດຖະກິດ, ສັງຄົມ ແລະ ສິ່ງແວດລ້ອມ ຂອງສະມັດຊາລັດຖະສະພາປະເທດທີ່ໃຊ້ພາສາຝຣັ່ງ

(ສພຊ)- ໃນລະຫວ່າງວັນທີ 10-11 ເມສາ ນີ້ກໍາມາທິການການຕ່າງປະເທດສະພາແຫ່ງຊາດ ແຫ່ງ ສປປລາວ ໄດ້ຈັດກອງປະຊຸມກຳມາທິການວຽກງານເສດຖະກິດ, ສັງຄົມ ແລະ ສິ່ງແວດລ້ອມ ຂອງສະມັດຊາລັດຖະສະພາປະເທດທີ່ໃຊ້ພາສາຝຣັ່ງ ທີ່ນະຄອນ-ຫຼວງພະບາງ.
ກອງປະຊຸມໃນຄັ້ງນີ້ ໄດ້ຮັບກຽດເຂົ້າຮ່ວມ ແລະ ກ່າວເປີດຂອງ ທ່ານ ສົມມາດ ພົນເສນາຮອງປະທານສະພາແຫ່ງຊາດ ພ້ອມທັງໄດ້ໃຫ້ກຽດກ່າວຕ້ອນຮັບຜູ້ແທນກອງປະຊຸມ ໂດຍທ່ານ ວົງພະຈັນ ທິບພະຈັນປະທານສະພາປະຊາຊົນແຂວງຫຼວງພະບາງ ແລະ ມີບັນດາສະມາຊິກສະພາຂອງສະມັດຊາລັດຖະສະພາປະເທດທີ່ໃຊ້ພາສາຝຣັ່ງ(APF)ຈາກ 9 ປະເທດ ແລະ 2 ອົງການ ພ້ອມນີ້ກໍຍັງມີບັນດາທ່ານຮອງປະທານກໍາມາທິການ  ແລະ ກຳມະການຂອງກຳມາທິການກ່ຽວຂ້ອງຕ່າງໆ ພາຍໃນສະພາແຫ່ງຊາດລາວ ພ້ອມດ້ວຍແຂກຖືກເຊີນ ຈາກພາກສ່ວນກ່ຽວຂ້ອງຂອງແຂວງ ເຂົ້າຮ່ວມ.

ໃນພິທີກ່າວເປີດກອງປະຊຸມ, ທ່ານຮອງປະທານສະພາແຫ່ງຊາດໄດ້ເນັ້ນໜັກຫຼາຍບັນຫາທີ່ສໍາຄັນ, ໂດຍສະເພາະແມ່ນສະພາບການພາກພື້ນ ແລະ ສາກົນທີ່ຍັງສືບຕໍ່ເປັນທ່າອ່ຽງທາງດ້ານອຸປະສັກ ແລະ ສິ່ງທ້າທາຍຕໍ່ການກ້າວໄປຂ້າງໜ້າຂອງບັນດາປະເທດຕ່າງໆໃນທົ່ວໂລກ. ພ້ອມທັງໄດ້ເນັ້ນໜັກໃຫ້ຄະນະຜູ້ແທນທີ່ເຂົ້າຮ່ວມກອງປະຊຸມໄດ້ພ້ອມກັນແລກປ່ຽນບົດຮຽນໂດຍສະເພາະແມ່ນບັນຫາ ແລະ ອຸປະສັກທີ່ເປັນສິ່ງກີດຂວາງໃນການພັດທະນາເສດຖະກິດ-ສັງຄົມ ແລະ ບັນຫາສິ່ງແວດລ້ອມຂອງບັນດາປະເທດສະມາຊິກລັດຖະສະພາທີ່ໃຊ້ພາສາຝຣັ່ງ, ການຊຸກຍູ້ສົ່ງເສີມການນໍາໃຊ້ພາສາຝຣັ່ງທີ່ປັດຈຸບັນເຫັນວ່າ ມີທ່າອ່ຽງຫຼຸດລົງຫຼາຍຖ້າທຽບໃສ່ພາສາອັງກິດ ກອງປະຊຸມຍັງໄດ້ຮັບຟັງການສະເໜີບົດກ່ຽວກັບປະສົບການປະຕິບັດວຽກງານຕົວຈິງຈາກບັນດານັກຊ່ຽວຊານ ແລະ ແລກປ່ຽນບົດຮຽນທີ່ດີທີ່ສຸດຮ່ວມກັນຂອງສະມາຊິກສະພາແຫ່ງຊາດໃນບັນດາປະເທດສະມາຊິກ APF. ພ້ອມດຽວກັນນັ້ນ,ກອງປະຊຸມຍັງໄດ້ຮັບຮອງເອົາບົດບັນທຶກ ແລະ ຖະແຫຼງການຂອງກອງປະຊຸມສະໄໝສາມັນຄັ້ງຜ່ານມາ, ຮັບຟັງການປະກອບຄໍາເຫັນຂອງທ່ານປະທານກໍາມາທິການ, ປະທານກອງປະຊຸມ, ຮັບຟັງການລາຍງານຂອງຜູ້ຊ່ຽວຊານດ້ານນິຕິເວດວິທະຍາຂອງ AFDແລະ FAO,ຮັບຟັງການເຜີຍແຜ່ນິຕິກໍາກ່ຽວກັບນະໂຍບາຍດິນຟ້າອາກາດ, ກວດກາຮ່າງບົດລາຍງານ ແລະ ມະຕິເຊັ່ນ: ຮ່າງບົດລາຍງານຄວາມຫຼາກຫຼາຍທາງຊີວະພາບ, ການປົກປ້ອງ ແລະ ປົກປັກຮັກສາຄວາມຫຼາກຫຼາຍທາງຊີວະພາບ, ຮ່າງບົດລາຍງານກ່ຽວກັບຫົວຂໍ້ທີ່ງ່າຍດາຍສຳຫຼັບການມີເສລີພາບ ຂອງແມ່ຍິງໃນພາກພື້ນອາຟຣິກາທີ່ໃຊ້ພາສາຝຣັ່ງ, ສົນທະນາ ແລະ ປຶກສາຫາລືກ່ຽວກັບບົດລາຍງານການຕິດຕາມການເຈລະຈາການຄ້າສາກົນທີ່ດຳເນີນໃນຂອບຂອງອົງການການຄ້າໂລກ (OMC),ພ້ອມທັງໄດ້ປຶກສາຫາລືກ່ຽວກັບວຽກງານຂອງກໍາມາທິການໃນອະນາຄົດ, ຮ່າງຄໍາເຫັນຂອງຄະນະ APF ສຳລັບກອງປະຊຸມສຸດຍອດຂອງບັນດາປະເທດທີ່ໃຊ້ພາສາຝຣັ່ງ ປະຈໍາປີ 2024 ພາຍໃຕ້ຫົວຂໍ້: “ປັບປຸງການເຄື່ອນໄຫວຂອງພົນລະເມືອງຢູ່ບັນດາປະເທດທີ່ໃຊ້ພາສາຝຣັ່ງ ເພື່ອຊຸກຍູ້ຄວາມຄິດສ້າງສັນ, ນະວັດຕະກໍາ ແລະ ການປະກອບການ”; ສົນທະນາປິ່ນອ້ອມວຽກງານເສດຖະກິດ, ສົນທະນາກ່ຽວກັບການລຶບລ້າງມົນລະພິດຈາກພລາສຕິກ ແລະ ບັນຫາອື່ນໆ ແລະ ຮັບຮອງວັນເວລາຈັດກອງປະຊຸມຄັ້ງຕໍ່ໄປ.

ກ່ອນເປີດກອງປະຊຸມດັ່ງກ່າວ, ໃນວັນທີ 8 ແລະ 9ເມສາ2024ຄະນະຜູ້ແທນຂອງກອງປະຊຸມດັ່ງກ່າວ ຍັງໄດ້ເຄື່ອນໄຫວຢ້ຽມຢາມໂຮງຮຽນປະຖົມຫຼວງພະບາງ, ໂຮງຮຽນວິທະຍາໄລຄູຫຼວງພະບາງ, ພ້ອມທັງຮັບຟັງການລາຍງານຫຍໍ້ສະພາບການຮຽນການສອນພາສາຝຣັ່ງທົ່ວແຂວງຫຼວງພະບາງ ແລະ ໄດ້ເຄື່ອນໄຫວຢ້ຽມຢາມສວນກະເສດອິນຊີ (ສວນອຸ່ນເຮືອນ) ແລະ ຢ້ຽມ ແລະ ເຮັດວຽກທີ່ສວນຟາມອາຍອຸ່ນ ເພື່ອຮັບຟັງສະພາບການພັດທະນາການກະເສດສີຂຽວໃນເຂດດັ່ງກ່າວ ແລະ ພາຍຫຼັງທີ່ສຳເລັດການເຂົ້າຮ່ວມກອງປະຊຸມແລ້ວຄະນະຜູ້ແທນຍັງຈະໄດ້ຢ້ຽມຊົມຫໍພິພິທະພັນຫຼວງພະບາງ(ພະລາດຊະວັງເກົ່າ), ວັດຊຽງທອງ ແລະ ຕາດກວາງຊີ ຊຶ່ງເປັນສະຖານທີ່ທ່ອງທ່ຽວທີ່ສໍາຄັນດ້ານປະຫວັດສາດ ແລະ ທຳມະຊາດ ຂອງແຂວງຫຼວງພະບາງ.
(ຂ່າວ: ກໍາມາທິການການຕ່າງປະເທດ, ພາບ: ສອນສັກ ວັນວິໄຊ)