ໃນກອງປະຊຸມ, ທ່ານ ຄຳຢາດ ຣາຊດາວົງ ຄະນະພັກຫົວໜ້າກົມຈັດຕັ້ງ-ພະນັກງານ ໄດ້ຜ່ານມະຕິຕົກລົງວ່າດ້ວຍການແຕ່ງຕັ້ງພະນັກງານຫຼັກແຫຼ່ງ ຂອງ ສນຊ ລົງຮາກຖານໄລຍະສັ້ນ-ກັບທີ່ ຢູ່ ນະຄອນຫຼວງວຽງຈັນ ແລະ ແຂວງວຽງຈັນ ຊຶ່ງໄດ້ແຕ່ງຕັ້ງພະນັກງານລົງຮາກຖານກັບທີ່ ມີ ທັງໝົດ 24ທ່ານ ແລະ ລົງຮາກຖານໄລຍະສັ້ນ 6ທ່ານ ເພື່ອລົງໄປຊຸກຍູ້ແບບແຜນວິທີເຮັດວຽກຂອງບ້ານ. ການແຕ່ງຕັ້ງພະນັກງານຫຼັກແຫຼ່ງ ຂອງ ສນຊ ລົງຮາກຖານໃນຄັ້ງນີ້ແມ່ນເພື່ອການກໍ່ສ້າງພະນັກງານ ສືບທອດປ່ຽນແທນ ຢູ່ ສນຊ ໃຫ້ຕິດພັນກັບຮາກຖານຕົວຈິງ ແລະ ພຶດຕິກຳຕົວຈິງ, ເພື່ອຊຸກຍູ້ການຈັດຕັ້ງຜັນຂະຫຍາຍມະຕິ XI ຂອງພັກ ແລະ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ, ຫັນເອົາແຜນງານວຽກງານຈຸດສຸມລົງສູ່ໜ້າວຽກຕົວຈິງ ຂອງຂະບວນການແຂ່ງຂັນຮັກຊາດ ແລະ ພັດທະນາໃຫ້ໄດ້ຮັບຜົນດີ ໂດຍເນັ້ນໃສ່ 4 ການເສີມສ້າງ, 4 ການຫັນປ່ຽນ, 9 ຂໍ້ແຂ່ງຂັນຂອງແນວລາວສ້າງຊາດ ພ້ອມທັງຊຸກຍູ້ຂະບວນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ.
ພ້ອມກັນນີ້, ທ່ານຮອງປະທານຜູ້ປະຈຳການໄດ້ເນັ້ນໃຫ້ບັນດາສະຫາຍທີ່ໄດ້ຮັບການ ແຕ່ງຕັ້ງລົງຮາກຖານຈົ່ງກຳແໜ້ນແນວທາງ, ນະໂຍບາຍ, ພາລະບົດບາດ, ສິດ ແລະ ໜ້າທີ່ຂອງແນວ ລາວສ້າງຊາດ ເພື່ຶອນຳໄປຜັນຂະຫຍາຍຢູ່ຮາກຖານທີ່ຕົນເອງລົງ, ເອົາໃຈໃສ່ຕິດຕາມການພັດທະນາ ຂອງບ້ານ, ເມືອງ ໃນການຜັນຂະຫຍາຍມະຕິກອງປະຊຸມຂອງແນວລາວສ້າງຊາດ ແລະ ແຜນພັດທະນາຂອງບ້ານ, ເພື່ອກຳໄດ້ຈຸດພິເສດໂດຍສະເພາະແມ່ນຂໍ້ສະດວກ, ຂໍ້ຫຍຸ້ງຍາກ ຂອງຮາກຖານ ຕິດພັນກັບການເຮັດໜ້າທີ່ເຕົ້າໂຮມຄວາມສາມັກຄີປອງດອງກັນກັບພະນັກງານຂັ້ນຮາກຖານ ແລະ ປະຊາຊົນລາວ ບັນດາເຜົ່າ; ນຳເອົາບັນດາຂໍ້ແຂ່ງຮັກຊາດ ແລະ ພັດທະນາ ຂອງແນວສ້າງຊາດ ລົງໄປເຜີຍແຜ່ສູ່ຮາກຖານເພື່ອແນໃສ່ຮັບປະກັນຄວາມສະຫງົບປອດໄພ,ຄວາມສະອາດງາມຕາໃນການເປັນເຈົ້າພາບກອງປະຊຸມສຸດຍອດອາຊຽນທີ່ຈະຈັດຂຶ້ນໃນປີ 2024 ນີ້. ພາຍຫຼັງສຳເລັດລົງຮາກຖານແລ້ວໃຫ້ແຕ່ລະທ່ານເຮັດບົດລາຍງານເພື່ອເປັນຕົວຊີ້ວັດ ໃນການຈັດຕັ້ງປະຕິບັດ.
(ຂ່າວ-ພາບ: ເລົ່າລໍ່)
ຄໍາເຫັນ