ກອງປະຊຸມໃຫຍ່ຄັ້ງທີ I ຂອງສະພາການຄ້າ ແລະ ອຸດສະຫະກໍາເມືອງຊະນະຄາມ

ກອງປະຊຸມໃຫຍ່ຄັ້ງທີ I ຂອງສະພາການຄ້າ ແລະ ອຸດສະຫະກໍາເມືອງຊະນະຄາມໄດ້ຈັດຂຶ້ນໃນວັນທີ 14 ມີນານີ້, ທີ່ສະໂມສອນໃຫຍ່ຂອງເມືອງດັ່ງກ່າວ ໂດຍການໃຫ້ກຽດເຂົ້າຮ່ວມຂອງທ່ານ ບຸນຊ່ວງ ວັນສີ ຮອງເຈົ້າເມືອງຊະນະຄາມ, ທ່ານ ບຸນພຽນ ວໍລະວົງ ຮອງຫົວໜ້າພະແນກອຸດສະຫະກໍາ ແລະ ການຄ້າແຂວງວຽງຈັນ, ມີແຂກຖືກເຊີນ ແລະ ພາກສ່ວນກ່ຽວຂອງເຂົ້າຮ່ວມ.
ທ່ານ ຄໍາພຸ່ງ ພອນປະດິດ ປະທານສະພາການຄ້າ ແລະ ອຸດສະຫະກຳເມືອງຊະນະຄາມ ໄດ້ຂຶ້ນລາຍງານການ ເຄື່ອນໄຫວວຽກງານຂອງສະພາການຄ້າ ແລະ ອຸດສະຫະກໍາເມືອງຊະນະຄາມ ຊຸດທີ I (2021-2023) ແລະ ທິດທາງແຜນການຂອງສະພາການຄ້າ ແລະ ອຸດສະຫະກໍາເມືອງຊະນະຄາມ ຊຸດທີ II (2024- 2027), ໃນໄລຍະຜ່ານມາ ສະພາການຄ້າ ແລະ ອຸດສະຫະກໍາເມືອງຊະນະຄາມ ໄດ້ຈັດຕັ້ງເຄື່ອນໄຫວວຽກງານແຕ່ລະດ້ານ ໂດຍສະເພາະດ້ານການປຸກລະດົມລາຍຮັບຈາກບັນດາສະມາຊິກ ໄດ້ເປັນຈໍານວນເງິນທັງໝົດ 19.200.000 ກີບ, ໄດ້ປຸກລະດົມທຶນສົມທົບໃນການສ້າງທາງເວັ້ນ ຂົວບ້ານຫ້ວຍຕາວ-ໂນນຫົວຊ້າງເປັນຈໍານວນເງິນ 1.850.000 ກີບ ແລະ ສ້ອມແປງເສັ້ນທາງແຕ່ບ້ານໂນນສະຫວັນ ຫາ ບ້ານນາສົມບູນເປັນຈໍານວນເງິນທັງໝົດ 15.000.000 ກີບ; ໄດ້ຈັດຕັ້ງກອງປະຊຸມປຶກສາຫາລືກ່ຽວກັບການສົ່ງອອກສິນຄ້າກະສິກໍາຈໍານວນ 5 ຄັ້ງ, ເຂົ້າຮ່ວມການຝຶກອົບຮົມເພື່ອສ້າງຄວາມເຂັ້ມແຂງໃຫ້ແກ່ສະມາຊິກພາຍໃນກຸ່ມທາງດ້ານວິຊາການ ແລະ ການບໍລິຫານກຸ່ມ ແລະ ວຽກງານດ້ານອື່ນໆ ເພື່ອນໍາເຂົ້າໃນການປັບປຸງອົງກອນ ໃຫ້ມີຄວາມເຂັ້ມແຂງຂຶ້ນເລື້ອຍໆ. ຈາກນັ້ນ, ກອງປະຊຸມ ໄດ້ເປີດໂອກາດໃຫ້ບັນດາຜູ້ແທນເຂົ້າຮ່ວມໄດ້ປະກອບຄໍາເຫັນແລກປ່ຽນໃສ່ບົດລາຍທັງສອງພາກ ເພື່ອຄວາມເປັນເອກະພາບ ແລະ ຈັດຕັ້ງປະຕິບັດໃນຕໍ່ໜ້າ.
ໃນກອງປະຊຸມຍັງໄດ້ປ່ອນບັດຄັດເລືອກເອົາຄະນະບໍລິຫານງານສະພາການຄ້າ ແລະ ອຸດສະຫະກໍາເມືອງຊຸດທີ II, ເຊິ່ງໄດ້ເຫັນດີເປັນເອກະພາບເລືອກເອົາທ່ານ ຄໍາພຸ່ງ ພອນປະດິດ ເປັນປະທານ ແລະ ເປັນເອກະພາບ ເລືອກເອົາ ທ່ານ ສະເຫຼີມກຽດ ສົງອົບປານີ ເປັນເລຂາພັກ. ພ້ອມນັ້ນ ຍັງໄດ້ເອົາຄະນະທີ່ປືກສາ.
(ຂ່າວ: ເມືອງຊະນະຄາມ)