ເລຂາໜ່ວຍພັກ ກົງສູນໃຫຍ່ ແຫ່ງ ສປປ ລາວ ທີ່ນະຄອນໂຮ່ຈິມິນ ແລະ ປະທານຮ່ວມຂອງສະຫາຍ ນາງ ຄໍາເພົາ ເອີນທະວັນ ເລຂາຄະນະພັກຮາກຖານສະຖານທູດ ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ, ມີແຂກຮັບເຊີນ, ຜູ້ຕາງໜ້າຈາກ 3 ອົງການຈັດຕັ້ງມະຫາຊົນຄື: ຄະນະໜ່ວຍຊາວໜຸມປະຊາຊົນປະຕິວັດລາວ, ໜ່ວຍສະຫະພັນກໍາມະບານລາວ, ໜ່ວຍສະຫະພັນແມ່ຍິງລາວ ແລະ ສະມາຊິກພັກສົມບູນ ແລະ ສໍາຮອງຂອງໜ່ວຍພັກເຂົ້າຮ່ວມທັງໝົດ 14 ສະຫາຍ ຍິງ 4 ສະຫາຍ.ກອງປະຊຸມສະຫາຍ ພອນສີ ບຸນມີໄຊເລຂາໜ່ວຍພັກໄດ້ຜ່ານບົດລາຍງານການເມືອງຂອງໜ່ວຍພັກ, ບົດສະຫຼຸບການຈັດຕັ້ງປະຕິບັດວຽກງານວິຊາສະເພາະ, ຜ່ານບົດສໍາຫຼວດຂອງໜ່ວຍພັກແລະ ຜ່ານມະຕິຂອງກອງປະຊຸມໃຫຍ່ຄັ້ງທີ IIIຂອງໜ່ວຍພັກ.
ຕອນທ້າຍຂອງກອງປະຊຸມໄດ້ຮັບຟັງການໂອ້ລົມຈາກສະຫາຍ ນາງ ຄໍາເພົາ ເອີນທະວັນ ໂດຍໄດ້ເນັ້ນໜັກບາງຈຸດທີ່ສໍາຄັນ ໃນການເຄື່ອນໄຫວຂອງໜ່ວຍພັກ 5 ປີຕໍ່ໜ້ານີ້ ດັ່ງນີ້:
1. ການປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ;“ເຖິງວ່າຜ່ານມາຍັງບໍ່ທັນໄດ້ຮັບນາມມະຍົດກໍຕາມແຕ່ກໍບໍ່ຕ້ອງທໍ້ຖອຍ ທຸກຢ່າງບໍ່ເໜືອຄວາມພະຍາຍາມບຸກບືນຂອງສະມາຊິກພັກພວກເຮົາ”;
2. ບັນດາສະຫາຍຄະນະໜ່ວຍພັກ ສືບຕໍ່ຊີ້ນໍາ-ນໍາພາສະມາຊິກພັກ, ພະນັກງານໃນສະຖານກົງສຸນໃຫຍ່ ໃຫ້ເຊື່ອມຊຶມ, ກໍາແໜ້ນແນວທາງ ແລະ ນະໂຍບາຍການຕ່າງປະເທດຂອງພັກ, ທັດສະນະຕ່າງໆຂອງລັດ, ມີສະຕິລະວັງຕົວສູງ ຈໍາແນກໄດ້ເລກົນ ແລະ ກົນອຸບາຍຫັນປ່ຽນໂດຍສັນຕິຂອງຄົນບໍ່ດີ ແລະ ອິດທິກໍາລັງປໍລະປັກທີ່ຫວັງຈະມ້າງທໍາລາຍລະບອບໃໝ່ຂອງພວກເຮົາ;
3. ເຮັດໜ້າທີ່ເປັນໃຈກາງປະສານງານລະຫວ່າງກະຊວງ, ອົງການທີ່ກ່ຽວຂ້ອງຕ່າງໆ ໃຫ້ມີກົນໄກປະສານງານທີ່ຄ່ອງຕົວ, ມີປະສິດທິຜົນ, ມີການສະຫຼຸບຕີລາຄາຖອດຖອນບົດຮຽນເປັນປົກກະຕິ ເພື່ອໃຫ້ມີຄວາມເປັນເອກະພາບ, ສາມາດນໍາເອົາຜົນປະໂຫຍດມາໃຫ້ແກ່ປະເທດຊາດນັບມື້ຫຼາຍຂຶ້ນ;
4. ເປັນເສນາທິການໃຫ້ແກ່ຂັ້ນເທິງ ໃນການເຄື່ອນໄຫວຕ່າງປະເທດຂອງພັກ - ລັດໃນແຕ່ລະໄລຍະ ຢ່າງເປັນເຈົ້າການ ແລະ ມີຫົວຄິດປະດິດສ້າງ, ເອົາໃຈໃສ່ປະກອບສ່ວນສຸມທຸກເຫື່ອແຮງ ຄວາມຮູ້, ຄວາມສາມາດຂອງຕົນ ເຂົ້າໃນການເສີມຂະຫຍາຍສາຍພົວພັນອັນມີມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງ ສອງພັກ-ສອງລັດ ເວົ້າລວມ, ເວົ້າສະເພາະ ໃນຂົງເຂດຄວາມຮັບຜິດຊອບຂອງຕົນໃຫ້ນັບມື້ແຕກດອກອອກຜົນຍິ່ງຂຶ້ນ;
5. ຊຸກຍູ້ການໄປມາຫາສູ່ຂອງຄະນະຜູ້ແທນຂັ້ນສູງ, ພົວພັນແລກປ່ຽນບົດຮຽນ, ສືບຕໍ່ປະຕິບັດບັນດາຂໍ້ຕົກລົງທີ່ໄດ້ລົງນາມຮ່ວມກັນ ໃຫ້ປະກົດຜົນເປັນຈິງ ແລະ ມີປະສິດທິພາບສູງ, ສືບຕໍ່ຍາດແຍ່ງເອົາການຮ່ວມມື, ການສະໜັບສະໜູນຊ່ວຍເຫຼືອຈາກເພື່ອນມິດ, ຍົກສູງວຽກງານໂຄສະນາຂົນຂວາຍບັນດານັກລົງທຶນ, ນັກທຸລະກິດ, ນັກທ່ອງທ່ຽວຕ່າງປະເທດ ໃຫ້ເຂົ້າມາ ສປປ ລາວ ຫຼາຍຂຶ້ນ ແລະ ນໍາເອົາຄວາມສົມບູນພູນສຸກມາສູ່ປະຊາຊົນບັນດາເຜົ່າ;
6. ສະມາຊິກພັກ ໃນໜ່ວຍພັກສະຖານກົງສູນໃຫຍ່ຂອງພວກເຮົາ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງໃຫ້ມີທັດສະນະການເມືອງໜັກແໜ້ນ, ຄວາມສາມັກຄີພາຍໃນໃຫ້ໜັກແໜ້ນ ແລະ ຄວາມສາມັກຄີພາຍນອກໃຫ້ ກວ້າງຂວາງ, ມີສະຕິຕໍ່ການຈັດຕັ້ງລະບຽບກົດໝາຍຢ່າງເຂັ້ມງວດ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງກຸ່ມຄົນບໍ່ຫວັງດີ, ມີຄຸນສົມບັດສິນທໍາປະຕິວັດ, ມີຫຼັກໝັ້ນ, ຮູ້ຈໍາແນກມິດ - ສັດຕູຢ່າງຈະແຈ້ງ, ປົກປັກຮັກສາຄວາມລັບພາຍໃນ, ກໍາໄດ້ແນວທາງການຕ່າງປະເທດຂອງພັກ - ລັດ, ແຜນພັດທະນາເສດຖະກິດ-ສັງຄົມຂອງປະເທດເຮົາໃນແຕ່ລະໄລຍະ, ມີແບບແຜນການດໍາລົງຊີວິດທີ່ໂປ່ງໃສ, ຮູ້ຖະໜອມ ຖອມຕົນບໍ່ອວດອົ່ງທະນົງຕົວ ບໍ່ຄິດເຫັນແຕ່ຜົນປະໂຍດສ່ວນຕົວ, ມີທັດສະນະມະຫາຊົນ, ກ້າຄິດກ້າທໍາ ແລະ ມີຄວາມຮັບຜິດຊອບ, ກໍາໄດ້ 9 ຂໍ້ຫ້າມຂອງສະມາຊິກພັກ. ເຜີຍແຜ່ໂຄສະນາຄວາມເປັນຈິງຂອງປະເທດເຮົາຕໍ່ເພື່ອນມິດສາກົນ, ຝຶກຝົນຫຼໍ່ຫຼອມຕົນເອງທາງດ້ານວິຊາສະເພາະ ໂດຍສະເພາະດ້ານຄົ້ນຄວ້າຕີລາຄາສະພາບການພົ້ນເດັ່ນໃນແຕ່ລະໄລຍະຂອງບັນດາຂົງເຂດທີ່ຕົນເອງຮັບຜິດຊອບໃຫ້ວ່ອງໄວ ແລະ ທັນການ.
ນອກຈາກນັ້ນ, ກໍໃຫ້ຍົກລະດັບພາສາຕ່າງປະເທດ ເພື່ອໃຫ້ການເຄື່ອນໄຫວຂອງເຮົາມີຄວາມຄ່ອງແຄ້ວ ແລະ ໄດ້ຮັບຜົນສໍາເລັດສູງ.ກອງປະຊຸມໄດ້ດຳເນີນເປັນເວລາ1ວັນ.
ຂ່າວ: ກະຊວງການຕ່າງປະເທດ
ຄໍາເຫັນ