ມີແຂກຖືກເຊີນ ແລະ ຜູ້ແທນສົມບູນ 125 ສະຫາຍ ຍິງ 38 ສະຫາຍ, ຊຶ່ງເປັນຕົວແທນໃຫ້ແກ່ສະມາຊິກກໍາມະບານ, ກໍາມະກອນ, ຜູ້ອອກແຮງງານໃນທົ່ວແຂວງເຂົ້າຮ່ວມ.
ກອງປະຊຸມຄັ້ງນີ້, ຈະໄດ້ຮັບຟັງຮ່າງລາຍງານການເມືອງ ຊຶ່ງຕີລາຄາຄືນການນໍາພາ - ຊີ້ນໍາການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກໍາມະບານທົ່ວແຂວງຄັ້ງທີ IX 2019 - 2024 ແລະ ທິດທາງແຜນການຄາດໝາຍສູ້ຊົນວຽກງານຈຸດສຸມໃນ 5 ປີຕໍ່ໜ້າ (2025-2029), ຮ່າງແຜນພັດທະນາວຽກງານກໍາມະບານ 5 ປີ ຄັ້ງທີ II ແລະ ແຜນພັດທະນາວຽກງານກໍາມະບານ 5 ປີ ຄັ້ງທີ III, ຮ່າງບົດສໍາຫຼວດການນໍາພາລວມຂອງຄະນະບໍລິຫານງານສະຫະພັນກໍາມະບານແຂວງ ສະໄໝທີ IX ພ້ອມທັງຮັບຟັງການປະກອບຄໍາເຫັນ ຈາກຜູ້ຕ່າງໜ້າຄະນະບໍລິຫານງານສະຫະພັນກໍາມະບານແຂວງໄຊຍະບູລີ, ສະຫະພັນກໍາມະບານເມືອງຮຸນ ໃນການຂະຫຍາຍ, ການຄຸ້ມຄອງນໍາໃຊ້ເງິນກອງທຶນຊ່ວຍເຫຼືອເຊິ່ງກັນ ແລະ ກັນ, ຄອບຄົວຕົວແບບຫັດຖະກໍາໄຕລື້ໃນການຜະລິດ ແລະ ຈໍາໜ່າຍແຜ່ນແພເປັນສິນຄ້າ ທີ່ສ້າງລາຍຮັບໃຫ້ແກ່ຄອບຄົວ ແລະ ບັນດາຜູ້ແທນກອງປະຊຸມຍັງໄດ້ຄົ້ນຄວ້າປະກອບຄໍາຄິດເຫັນຕໍ່ບັນດາຮ່າງເນື້ອໃນຕ່າງໆຢ່າງກົງໄປ - ກົງມາ ເຮັດໃຫ້ບັນດາເນື້ອໃນດັ່ງກ່າວມີເນື້ອໃນຄວາມໝາຍເລິກເຊິ່ງ, ຄົບຖ້ວນສາມາດຮັບຮອງ ແລະ ນໍາໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈິງ. ຈາກນັ້ນ, ຜູ້ແທນສົມບູນຍັງຈະໄດ້ໃຊ້ສິດ ປະຊາທິປະໄຕ ຂອງຕົນເອງ ໃນການປ່ອນບັດເລືອກຕັ້ງເອົາຄະນະບໍລິຫານງານສະຫະພັນກໍາມະບານແຂວງຊຸດໃໝ່ ເພື່ອສືບຕໍ່ນໍາພາ-ຊີ້ນໍາວຽກງານກໍາມະບານໃນ 5 ປີຕໍ່ໜ້າ.
ກອງປະຊຸມ, ຍັງໄດ້ຮັບຟັງການມີຄໍາເຫັນຊີ້ນໍາຂອງສະຫາຍ ບຸນຄົງ ຫຼ້າຈຽມພອນ ແລະ ສະຫາຍ ເລັດ ໄຊຍະພອນ ຊຶ່ງເປັນທິດຊີ້ນໍາ, ເປັນບ່ອນອີງໃນການເຄື່ອນໄຫວຈັດຕັ້ງປະຕິບັດວຽກງານກໍາມະບານໃນຊຸມປີຕໍ່ໜ້າ.
(ຂ່າວ: ແສງອາທິດ)
ຄໍາເຫັນ