ທີ່ຫ້ອງວ່າການແຂວງຈຳປາສັກ ພາຍໃຕ້ການເປັນປະ ທານຂອງທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ, ມີບັນດາທ່ານຫົວໜ້າພະແນກການ, ກົມກອງອ້ອມຂ້າງແຂວງ, ອົງການທຽບເທົ່າຂັ້ນແຂວງ, ເຈົ້ານະຄອນປາກເຊ ແລະ ບັນດາເຈົ້າເມືອງເຂົ້າຮ່ວມ.
ໂອກາດນີ້, ທ່ານ ຮອງເຈົ້າແຂວງຈຳປາສັກ ໄດ້ກ່າວບາງຕອນວ່າ: ກອງປະຊຸມຄັ້ງນີ້ ພວກເຮົາໄດ້ສະຫຼຸບ-ຕີລາຄາຄືນ ຜົນການຈັດຕັ້ງປະຕິບັດວຽກງານຂອງອົງການປົກຄອງແຂວງ ໃນໄລຍະ 9 ເດືອນຜ່ານມາ, ພ້ອມທັງແຜນການຈຸດສຸມໃນ 3 ເດືອນທ້າຍປີ ໃຫ້ບັນລຸຕາມແຜນການທີ່ໄດ້ກຳນົດໄວ້ ແລະ ການວາງແຜນການໃນປີ 2025 ຢ່າງມີຈຸດສຸມ ເພື່ອເຮັດໃຫ້ແຜນພັດທະນາເສດຖະກິດ-ສັງຄົມ ແລະ ວຽກງານຮອບດ້ານຂອງແຂວງບັນລຸຕາມຈຸດປະສົງທີ່ວາງໄວ້. ກອງປະຊຸມຄັ້ງນີ້, ຈະໄດ້ລົງເລິກຄົ້ນຄວ້າປຶກສາຫາລື ໃນບາງຂົງເຂດວຽກງານຈໍານວນໜຶ່ງ ຕາມຫົວຂໍ້ ທີ່ກໍານົດໃນວາລະຂອງກອງປະຊຸມ ທີ່ພະແນກການ, ກົມກອງ, ນະຄອນ ແລະ ບັນດາເມືອງ ໄດ້ກະກຽມເນື້ອໃນລາຍງານ ຕໍ່ກອງປະຊຸມໃນເທື່ອນີ້. ທ່ານຮອງເຈົ້າແຂວງຍັງໄດ້ຮຽກຮ້ອງມາຍັງບັນດາ ຜູ້ແທນກອງປະຊຸມ ຈົ່ງໄດ້ເອົາໃຈໃສ່ຕິດຕາມ, ສຸມໃສ່ການປະກອບຄຳຄິດເຫັນ ດ້ວຍຄວາມຮັບຜິດຊອບສູງ ແລະ ບັນດາທ່ານຈະພ້ອມກັນ ເສີມຂະຫຍາຍຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ ປະກອບຄຳຄິດເຫັນຕໍ່ເນື້ອໃນຕ່າງໆ ຂອງກອງປະຊຸມ, ປຶກສາຫາລື ແລະ ແລກປ່ຽນຄໍາຄິດ-ຄໍາເຫັນ ຊອກໃຫ້ເຫັນສາເຫດ ເພື່ອຄວາມເປັນເອກະພາບໃນດ້ານທັດສະນະແນວຄິດ, ມີຄວາມບຸກບືນຕັດສິນໃຈ, ຄວາມຮັບຜິດຊອບໃນການເຮັດວຽກງານຕົວຈິງ, ສູ້ຊົນຜ່ານຜ່າແກ້ໄຂຄວາມຫຍຸ້ງຍາກ, ຈຳກັດຂໍ້ຂາດຕົກບົກຜ່ອງ, ເພື່ອເຮັດໃຫ້ການຈັດຕັ້ງປະຕິບັດຄາດໝາຍສູ້ຊົນ ທີ່ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ທີ່ວາງອອກໃຫ້ມີປະສິດທິຜົນສູງ.
(ແຫຼ່ງຂ່າວ: ແຂວງຈໍາປາສັກ)
ຄໍາເຫັນ