ກອງປະຊຸມປຶກສາຫາລືວຽກງານໂຄສະນາເຜີຍແຜ່ກົດໝາຍ

ກະຊວງຍຸຕິທຳ ໄດ້ຈັດກອງປະຊຸມປຶກສາຫາລືກ່ຽວກັບວຽກງານໂຄສະນາເຜີຍແຜ່ກົດ                 ໝາຍ ຂຶ້ນໃນວັນທີ 27 ມີນາ ນີ້ ທີ່ຫ້ອງປະຊຸມໃຫຍ່ຂອງກະຊວງດັ່ງກ່າວ ໂດຍການເປັນປະທານຂອງ ທ່ານ ບຸນທາ ຊົງເຢີທ່າວ ຮອງລັດຖະມົນຕີກະຊວງຍຸຕິທຳ; ມີທ່ານຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ຈາກບັນດາກະຊວງ, ອົງການຂັ້ນສູນກາງ ພ້ອມດ້ວຍຄະນະຮັບຜິດຊອບເຂົ້າຮ່ວມ ເພື່ອປຶກສາຫາລື ຕີລາຄາກ່ຽວກັບການຈັດຕັ້ງປະຕິບັດວຽກງານໂຄສະນາເຜີຍແຜ່ກົດໝາຍຂອງບັນດາກະຊວງ, ອົງການ ຂັ້ນສູນກາງ ໃນໄລຍະຜ່ານມາ.
ໃນກອງປະຊຸມ, ທ່ານ ນາງ ສີສຸດາ ໂສພາວັນດີ ຫົວໜ້າກົມໂຄສະນາເຜີຍແຜ່ກົດໝາຍກະຊວງຍຸຕິທຳ ໄດ້ຂຶ້ນຜ່ານບົດລາຍງານການຕີລາຄາປະເມີນວຽກງານໂຄສະນາເຜີຍແຜ່ກົດໝາຍຂອງຂະແໜງຍຸຕິທຳ ຊຶ່ງທ່ານໄດ້ຍົກໃຫ້ເຫັນສະພາບການຈັດຕັ້ງປະຕິບັດ ໃນໄລຍະຜ່ານມາ ລວມທັງດ້ານດີ, ດ້ານອ່ອນ, ບົດຮຽນທີ່ຖອດຖອນໄດ້ ພ້ອມທັງວາງທິດທາງ, ຄາດໝາຍສູ້ຊົນ ແລະ ວຽກງານຈຸດສຸມ ເພື່ອສືບຕໍ່ຈັດຕັ້ງປະຕິບັດວຽກງານໃນຕໍ່ໜ້າ. ນອກຈາກນັ້ນ, ຜູ້ເຂົ້າຮ່ວມ ຍັງໄດ້ຮັບຟັງການລາຍງານການຈັດຕັ້ງປະຕິບັດວຽກງານໂຄສະນາເຜີຍແຜ່ກົດໝາຍ ຂອງບັນດາກະຊວງ, ອົງການຂັ້ນສູນກາງຈຳນວນໜຶ່ງ ຊຶ່ງຍາມໃດກໍໄດ້ມີຄວາມພະຍາຍາມສູງ ໃນການໂຄສະນາເຜີຍແຜ່ກົດໝາຍຂອງຂະແໜງການຕົນ  ເຮັດໃຫ້ສະຕິເຄົາລົບ ແລະ ປະຕິບັດກົດໝາຍ ໃນທົ່ວສັງຄົມ ໃຫ້ໄດ້ຮັບການຍົກສູງຂຶ້ນ.
ໃນກອງປະຊຸມ, ທ່ານ ບຸນທາ ຊົງເຢີທ່າວ  ກໍໄດ້ມີຄຳເຫັນເນັ້ນໜັກວ່າ: ໃຫ້ບັນດາກະຊວງ, ອົງການຂັ້ນສູນກາງ ຈົ່ງພ້ອມກັນສືບຕໍ່ເພີ່ມທະວີອອກແຮງໃນການຈັດຕັ້ງປະຕິບັດວຽກງານໂຄສະນາເຜີຍແຜ່ກົດໝາຍໃນຂະແໜງການຕົນໃຫ້ມີຄວາມເລິກເຊິ່ງ, ກວ້າງຂວາງ; ເຮັດໃຫ້ໄດ້ຫຼາຍຮູບການ, ວິທີການ ເພື່ອເຮັດໃຫ້ສະຕິການເຄົາລົບ ແລະ ປະຕິບັດກົດໝາຍໃນທົ່ວສັງຄົມໃຫ້ນັບມື້ສູງຂຶ້ນ.
ຂ່າວ-ພາບ: ຊາຍພິມພອນ ສີຣິວົງໄຊ