ໂດຍການເປັນປະທານ ຂອງທ່ານ ກອງແກ້ວ ໄຊສົງຄາມກຳມະການສູນກາງພັກເລຂາຄະນະພັກປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດຫົວໜ້າຄະນະສະເພາະກິດ 83/ນຍ. ທ່ານ ກິແກ້ວ ຈັນທະບູຣີຮອງເລຂາຄະນະພັກ ຮອງປະທານ ສວສສຊຮອງຫົວໜ້າ(ຜູ້ປະຈຳການ) ຄະນະສະເພາະກິດ 83/ນຍ, ທ່ານຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານຮອງລັດຖະມົນຕີກະຊວງ ອຸດສາຫະກຳ ແລະ ການຄ້າ, ທ່ານຮອງຜູ້ວ່າການທະນາຄານແຫ່ງ ສປປ ລາວ, ໃນນາມຮອງຫົວໜ້າຄະນະສະເພາະກິດ 83/ນຍ, ບັນດາທ່ານຫົວໜ້າກົມ, ຮອງກົມ, ຫົວໜ້າ-ຮອງຫົວໜ້າສະຖາບັນຄົ້ນຄວ້າ, ກອງເລຂາ ຄະນະສະເພາະກິດ ເຂົ້າຮ່ວມຢ່າງພ້ອມພຽງ.
ໃນວາລະ, ທ່ານ ກອງແກ້ວ ໄຊສົງຄາມ ກ່າວວ່າ: ໄລຍະ 1 ປີຜ່ານມາ ພວກເຮົາໄດ້ມີຜົນສຳເລັດຫຼາຍດ້ານ ເປັນຕົ້ນແມ່ນ: ໄດ້ຈັດກອງປະຊຸມແລກປ່ຽນຄໍາເຫັນກັບພາກທຸລະກິດ; ແລກປ່ຽນຄໍາເຫັນ ກັບ ການນໍາພັກ-ລັດ, ອະດີດການນໍາຂັ້ນສູງ ແລະ ຊ່ຽວຊານອາວຸໂສ ຈໍານວນໜຶ່ງ; ນອກຈາກນັ້ນ ກໍຍັງໄດ້ມີການຄົ້ນຄວ້າ ລົງເລິກເພື່ອກຳນົດມາດຕະການ ແກ້ໄຂບັນຫາ ລາຄາສິນຄ້າ ແລະ ອັດຕາເງິນເຟີ້ ທີ່ເພີ່ມສູງຂຶ້ນ ແລະ ໄດ້ມີການລາຍງານ ໃຫ້ແກ່ລັດຖະບານເພື່ອເປັນຂໍ້ມູນທາງວິທະຍາສາດ ໃນການກຳນົດມາດຕະການແກ້ໄຂບັນຫາ ດ້ານລາຄາສິນຄ້າ ແລະ ອັດຕາເຟີ້ ຢ່າງເປັນລະບົບ, ມາຮອດປັດຈຸບັນ ສາມາດສັງເກດໄດ້ວ່າ ອັດຕາເງິນເຟີ້ ແລະ ອັດຕາການແລກປ່ຽນໄດ້ຖືກແກ້ໄຂຢ່າງຖືກທິດ ແລະ ເປັນຮູບປະທຳ, ສະພາບເງິນເຟີ້ ນັບມື້ນັບຫຼຸດລົງ, ອັດຕາແລກປ່ຽນ ຢູ່ໃນສະພາບດີຂຶ້ນ, ເງິນກີບແຂງຄ່າຂຶ້ນເທື່ອລະກ້າວ, ບັນຫາລາຄາສິນຄ້າ ໃນທ້ອງຕະຫຼາດ ກໍໄດ້ຮັບການແກ້ໄຂເປັນເທື່ອລະກ້າວ.
ຄຽງຄູ່ກັບຜົນສໍາເລັດດັ່ງກ່າວນັ້ນ, ຄະນະສະເພາະກິດ 83/ນຍ ຍັງຕີລາຄາຕໍ່ສິ່ງທ້າທາຍຫຼາຍປະການ, ເປັນຕົ້ນແມ່ນສະພາບການຂອງໂລກ ແລະ ພາກພື້ນ ມີການຜັນແປຢ່າງສະຫຼັບສັບຊ້ອນ ໂດຍສະເພາະແມ່ນການປ່ຽນ ປະທານາທິບໍດີຂອງສະຫະລັດອາເມຣິກາ ໄດ້ມີການປັບນະໂຍບາຍຫຼາຍຢ່າງ ຊຶ່ງຈະສົ່ງຜົນກະທົບໃສ່ເສດຖະກິດຂອງໂລກ ຢ່າງມະຫາສານ ແລະ ແນ່ນອນ ສປປ ລາວ ຂອງພວກເຮົາ ກໍຕ້ອງໄດ້ຮັບຜົນກະທົບ ຢ່າງຫຼີກລ່ຽງບໍ່ໄດ້; ບັນຫາສົງຄາມ ແລະ ສັນຕິພາບ, ການແຂ່ງຂັນ ແລະ ສົງຄາມການຄ້າ, ນະໂຍບາຍ ທາງພາສີ-ອາກອນ ແລະ ອື່ນໆ; ສະພາບດັ່ງກ່າວຈະເຮັດໃຫ້ຄ່າຂອງເງິນ, ລາຄາສິນຄ້າ ແລະ ຄ່າບໍລິການ ມີການປ່ຽນແປງໄປແບບຄາດຄະເນໄດ້ຍາກ, ການຊົມໃຊ້ ແລະ ຕ່ອງໂສ້ການຜະລິດ, ອຸປະສົງ ແລະ ອຸປະທານຕ່າງໆ ຈະມີການຜັນຜວນ, ຄາດຄະເນໄດ້ຍາກ, ສະນັ້ນ, ໃນຕໍ່ໜ້າ ຄະນະ ສະເພາະກິດ 83/ນຍ ຈະໄດ້ສືບຕໍ່ກຳນົດ ກ່ຽວກັບຫົວຂໍ້ ແລະ ຈຸດສຸມ ຂອງການຄົ້ນຄວ້າ ໃຫ້ມີຄວາມເໝາະສົມກັບ ສະພາບການປັດຈຸບັນ ແລະ ທ່າອ່ຽງໃນອະນາຄົດ, ແນໃສ່ເຮັດໃຫ້ຜົນການຄົ້ນຄວ້າ ກາຍເປັນປະໂຫຍດສູງສຸດ ໃຫ້ແກ່ ລັດຖະບານ ໃນການກຳນົດມາດຕະການແກ້ໄຂບັນຫາ ຢ່າງມີຈຸດສຸມ ແລະ ຖືກເປົ້າໝາຍ, ຊັດເຈນ ແລະ ທັນເວລາ.
(ຂ່າວ-ພາບ: ແສງຈັນ)
ຄໍາເຫັນ