ກອງປະຊຸມສົ່ງເສີມສຸຂະພາບເດັກ ໂດຍຜ່ານການໃຫ້ວັກຊິນກັນພະຍາດ

ທ່ານ ວັນດີ ຈັນສົມບັດ ກ່າວວ່າ: ກອງປະຊຸມຄັ້ງນີ້, ເປັນກອງປະຊຸມຕໍ່ຍອດຈາກທີ່ໄດ້ປະຊຸມຮ່ວມກັນຢູ່ໂຮງແຮມແລນມາກ ນະຄອນຫຼວງວຽງຈັນໃນວັນທີ 18 ມີນາ 2026 ຜ່ານມາ, ໂດຍ ສນຊ ແລະ ກະຊວງສາທາ ລະນະສຸກ ໄດ້ມີບົດບັນທຶກຮ່ວມມືກັນນັບແຕ່ປີ 2017 ເປັນຕົ້ນມາ ເພື່ອພ້ອມກັນປະຕິບັດກົດໝາຍ ວ່າດ້ວຍການໃຫ້ວັກຊິນກັນພະຍາດ ເລກທີ 52/ສພຊ, ລົງວັນທີ 25 ສິງຫາ 2018, ມາດຕາ 37 ໄດ້ລະບຸແຈ້ງເຖິງຄວາມຮັບຜິດ ຊອບຂອງແນວລາວສ້າງຊາດ, ສະຫະພັນນັກຮົບເກົ່າລາວ, ອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມ ໃຫ້ມີຄວາມຮັບຜິດຊອບໃນການສຶກສາອົບຮົມ, ປຸກລະດົມ, ໂຄສະນາ, ເຜີຍແຜ່, ສະໜອງຂໍ້ມູນຂ່າວສານໃຫ້ສຸຂະສຶກສາ ປະຊາຊົນລາວບັນດາເຜົ່າໃຫ້ຮັບຮູ້, ເຂົ້າໃຈຄວາມສໍາຄັນ ແລະ ເຂົ້າຮ່ວມວຽກງານໃຫ້ວັກຊິນກັນພະຍາດ ຊຶ່ງ ສນຊ ໄດ້ຮ່ວມມືກັບອົງການອຸຍນີເຊັບປະຈໍາ ສປປ ລາວ ເພື່ອຜັນຂະຫຍາຍກອບການຮ່ວມມື ລະຫວ່າງລັດຖະບານແຫ່ງ ສປປ ລາວ ແລະ ອົງການອຸຍນີເຊັບປະຈໍາລາວ ໂດຍມີຫຼາຍໂຄງການ, ຫຼາຍກິດຈະກໍາໄດ້ເຮັດຮ່ວມກັບຝ່າຍລັດຖະ ບານ ກໍຄືເຮັດຮ່ວມກັບບັນດາກະຊວງ-ອົງການ, ສະເພາະກໍແມ່ນ ກະຊວງສາທາລະນະສຸກ, ວຽກງານການສ້າງພູມຄຸ້ມກັນ ໂດຍຜ່ານການໃຫ້ວັກຊິນກັນພະຍາດ ຊຶ່ງເປັນວຽກບຸລິມະສິດໜຶ່ງຂອງລັດຖະບານ ກໍຄືຂະແໜງສາທາລະນະສຸກ ເພື່ອປົກປ້ອງເດັກນ້ອຍຈາກພະຍາດ ທີ່ສາມາດປ້ອງກັນໄດ້ດ້ວຍວັກຊິນ ບໍ່ພຽງແຕ່ແມ່ນການຮັກສາຊີວິດເທົ່ານັ້ນ ແຕ່ຍັງແມ່ນການສ້າງພື້ນຖານທີ່ແຂງແຮງໃຫ້ການພັດທະນາຊັບພະຍາກອນມະນຸດຂອງຊາດໃນອະນາຄົດ.

ໃນວາລະກອງປະຊຸມ, ໄດ້ກໍານົດເນື້ອໃນທີ່ສໍາຄັນຫຼາຍດ້ານ ເພື່ອຮ່ວມກັນຄົ້ນຄວ້າ ແລະ ແກ້ໄຂ ໂດຍສະ ເພາະດ້ານວິຊາການ ຊຶ່ງຈະໄດ້ຮັບຟັງການລາຍງານສະພາບລວມດ້ານສຸຂະພາບເດັກ ແລະ ສະພາບການໃຫ້ວັກຊິນ ປະຈໍາປີ 2026 ຂອງສູນສຸຂະພາບແມ່ ແລະ ເດັກ, ກະຊວງສາທາລະນະສຸກ ແລະ ພະແນກສາທາລະນະສຸກແຂວງເຊກອງ ເພື່ອຊອກຫາຂໍ້ສະດວກ ແລະ ຂໍ້ຫຍຸ້ງຍາກເພື່ອຊອກຫາວິທີແກ້ໄຂຮ່ວມກັນ; ດ້ານການເຕົ້າໂຮມ ແລະ ປຸກ ລະດົມ ກໍຈະໄດ້ຄົ້ນຄວ້າກ່ຽວກັບບົດບາດອັນສໍາຄັນຂອງແນວລາວສ້າງຊາດ ໃນການເຕົ້າໂຮມຄວາມສາມັກຄີຂອງປະຊາຊົນຊັ້ນຄົນຕ່າງໆ ແລະ ບົດບາດຂອງຄະນະໂຄສະນາອົບຮົມໃນການນໍາໃຊ້ສື່ມວນຊົນ ເພື່ອປຸກລະດົມທົ່ວສັງ ຄົມໃຫ້ເຫັນໄດ້ເຖິງຄວາມສໍາຄັນຂອງວຽກງານສາທາລະນະສຸກ ເພາະການໃຫ້ວັກຊິນກັນພະຍາດຈະປະສົບຜົນສໍາເລັດໄດ້ ບໍ່ແມ່ນແຕ່ໜ້າທີ່ຂອງຂະແໜງສາທາລະນະສຸກພຽງຢ່າງດຽວ ແຕ່ມັນຮຽກຮ້ອງໃຫ້ມີການຮ່ວມມືກັນຢ່າງແໜ້ນແຟ້ນ ລະຫວ່າງ ອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ບັນດາອົງການຈັດຕັ້ງສັງຄົມ, ອົງການພຸດທະສາສະໜາ, ສື່ມວນຊົນ ແລະ ຄວາມເປັນເຈົ້າການຂອງປະຊາຊົນບັນດາເຜົ່າ; ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ປະກອບຄຳເຫັນ ແລກປ່ຽນບົດຮຽນ ແລະ ວາງແຜນຮ່ວມກັນ ເພື່ອການເຂົ້າເຖິງການບໍລິການໃຫ້ວັກຊິນໃນເຂດຫ່າງໄກສອກຫຼີກຂອງປະຊາຊົນບັນດາເຜົ່າຊາວແຂວງເຊກອງ. ຂ່າວ: ອັດສະວິນ