ມີສະມາຄົມທະນາຄານລາວ, ບໍລິສັດ LAPNet, ບັນດາທະນາຄານທຸລະກິດທີ່ດຳເນີນທຸລະກິດຢູ່ ສປປ ລາວ, ຕາງໜ້າຈາກບັນດາຮ້ານຄ້າໃຫຍ່ພາຍໃນນະຄອນຫຼວງວຽງຈັນ ແລະ ບັນດາກົມພາຍໃນ ທຫລ ເຂົ້າຮ່ວມ.
ໃນກອງປະຊຸມດັ່ງກ່າວ, ທ່ານ ສຸລິສັກ ທໍານຸວົງ ໄດ້ມີຄຳເຫັນຕໍ່ກອງປະຊຸມເຜີຍແຜ່ວຽກງານການຊໍາລະດ້ວຍ QR Code ຂອງ ສປປ ລາວ ແມ່ນເພື່ອໂຄສະນາ, ສ້າງຄວາມຮັບຮູ້ ແລະ ຄວາມເຂົ້າໃຈໃຫ້ແກ່ສັງຄົມ, ຜູ້ໃຫ້ບໍລິການຊໍາລະເງິນ ແລະ ພາກສ່ວນກ່ຽວຂ້ອງອື່ນໆ ໃນວຽກງານການຊໍາລະດ້ວຍ QR Code ຂອງ ສປປ ລາວ ຢູ່ພາຍໃນ ແລະ ຂ້າມແດນ ໂດຍສະເພາະນະໂຍບາຍມະຫາພາກຂອງລັດຖະບານໃນການສົ່ງເສີມການພັດທະນາລະບົບການຊໍາລະ, ການສົ່ງເສີມການຊໍາລະແບບດີຈີຕອນເພື່ອຫຼຸດຜ່ອນການນໍາໃຊ້ເງິນສົດ ແລະ ການນໍາໃຊ້ເງິນສົດທີ່ເປັນເງິນຕາ ຫຼີກລ່ຽງການແລກປ່ຽນເງິນຕາແບບຊະຊາຍ, ການແກ້ໄຂບັນຫາການເຂົ້າເຖິງການບໍລິການທາງດ້ານການເງິນໃນເຂດຕົວເມືອງ ແລະ ເຂດຫ່າງໄກສອກຫຼີກ, ການຄຸ້ມຄອງ ແລະ ການເຊື່ອມໂຍງລະບົບການຊໍາລະຂອງບັນດາຜູ້ໃຫ້ບໍລິການຊໍາລະເງິນທັງພາຍໃນ ແລະ ຂ້າມແດນ, ສ້າງຄວາມເຂົ້າໃຈຕໍ່ການນໍາໃຊ້ຕໍ່ສັງຄົມ, ການປົກປ້ອງຜູ້ຊົມໃຊ້ ແລະ ການແກ້ໄຂບັນຫາຂໍ້ຜິດພາດໃນການດໍາເນີນທຸລະກໍາການຊໍາລະແບບດີຈີຕອນຂອງແຕ່ລະພາກສ່ວນ.
ຫຼັງຈາກນັ້ນ, ກອງປະຊຸມກໍໄດ້ຈັດເວທີ ສົນທະນາແລກປ່ຽນຄຳເຫັນ “ການຊໍາລະຜ່ານ QR Code ຂອງ ສປປ ລາວ” ໂດຍສະເພາະການຊໍາລະຜ່ານ QR Code ລະຫວ່າງ ທະນາຄານທຸລະກິດດ້ວຍກັນ ແລະ ການຊໍາລະຍ່ອຍຂ້າມແດນ ພ້ອມທັງການຄຸ້ມຄອງກຳນົດວົງເງິນການຊໍາລະ, ເງື່ອນໄຂການເຂົ້າຮ່ວມຂອງທະນາຄານທຸລະກິດ ແລະ ວິທີການແກ້ໄຂບັນຫາຕ່າງໆທີ່ກ່ຽວຂ້ອງກັບການຊໍາລະລະຫວ່າງສະມາຊິກດ້ວຍກັນ, ຄ່າທໍານຽມ ແລະ ການນໍາໃຊ້ QR Code ຮ່ວມກັນຂອງບັນດາຜູ້ໃຫ້ບໍລິການຊໍາລະ ຕາມມາດຕະຖານລາວຄິວອາ ຂອງ ສປປ ລາວ ເພື່ອແລກປ່ຽນຄໍາເຫັນກັບວິທະຍາກອນ ໂດຍການໃຫ້ກຽດເຂົ້າຮ່ວມຂອງ ທ່ານ ມະໂນລິດ ຊຸມພົນພັກດີ ວ່າການຫົວໜ້າກົມຄຸ້ມຄອງລະບົບການຊໍາລະ ທຫລ, ທ່ານ ນາງ ຈັນເທວິວັນ ແກ້ວບຸນພັນ ຮອງຫົວໜ້າກົມຄຸ້ມຄອງເງິນຕາຕ່າງປະເທດ ທຫລ, ທ່ານ ສີສະໝອນ ສຣິດທິລາດ ຜູ້ອຳນວຍການບໍລິສັດ LAPNet, ທ່ານ ນະຣິນ ພົມມະຣາຊ ຕາງໜ້າທະນາຄານການຄ້າຕ່າງປະເທດລາວ ມະຫາຊົນ ແລະ ທ່ານ ໄຊທອງ ພົມພິທັກ ຕາງໜ້າສະມາຄົມທະນາຄານລາວ ຊຶ່ງດຳເນີນລາຍການ ໂດຍ ທ່ານ ຫຸມແພງ ວິໄລພອນ ຈາກໂທລະພາບແຫ່ງຊາດລາວ. ຜ່ານການສົນທະນາ ແລກປ່ຽນຄຳຄິດຄຳເຫັນ ແລະ ການຕອບຄຳຖາມ ຂອງຜູ້ເຂົ້າຮ່ວມ ເຫັນວ່າ ມີຄວາມສົນໃຈຫຼາຍຕໍ່ກັບ ການກໍານົດຄ່າທໍານຽມຂອງການນໍາໃຊ້ລະບົບການຊໍາລະ ຢູ່ພາຍໃນ ແລະ ຂ້າມແດນ, ເງື່ອນໄຂການເຂົ້າຮ່ວມເປັນສະມາຊິກຂອງບໍລິສັດ LAPNetຂອງບັນດາຜູ້ໃຫ້ບໍລິການຊໍາລະ ທີ່ບໍ່ແມ່ນທະນາຄານ, ການເຂົ້າຮ່ວມການຊໍາລະຂ້າມແດນຂອງບັນດາທະນາຄານທີ່ເປັນສະມາຊິກ, ການແກ້ໄຂບັນຫາຂໍ້ຜິດພາດຈາກການຊໍາລະ, ການນໍາໃຊ້ QR Code ຂອງບຸກຄົນ ແລະ ນິຕິບຸກຄົນ ຂອງຮ້ານຄ້າທີ່ຮັບຊໍາລະຄ່າສິນຄ້າ ແລະ ບໍລິການ, ທິດທາງການນໍາໃຊ້ QR Code ຮ່ວມກັນຂອງບັນດາຜູ້ໃຫ້ບໍລິການຊໍາລະ ຕາມມາດຕະຖານລາວຄິວອາ ຂອງ ສປປ ລາວ ແລະ ອື່ນໆ.
ໂອກາດນີ້, ທ່ານ ສຸລິສັກ ທຳນຸວົງ ໄດ້ມີຄຳເຫັນວ່າ: ຮຽກຮ້ອງມາຍັງທຸກພາກສ່ວນໃນສັງຄົມ ພ້ອມທັງພາກລັດ ແລະ ເອກະຊົນ ຈົ່ງພ້ອມກັນ ສືບຕໍ່ຄົ້ນຄວ້າການປະກອບສ່ວນໃນການພັດທະນາ ແລະ ຊົມໃຊ້ລະບົບການຊໍາລະ ຂອງ ສປປ ລາວ ເພື່ອຊຸກຍູ້ສົ່ງເສີມການເຂົ້າເຖິງການບໍລິການທາງດ້ານການເງິນ, ຫຼຸດຜ່ອນການນໍາໃຊ້ເງິນສົດທັງສະກຸນເງິນກີບ ແລະ ສະກຸນເງິນຕາຕ່າງປະເທດ ໂດຍສະເພາະການເປີດໂອກາດໃຫ້ບັນດາຜູ້ໃຫ້ບໍລິການຊໍາລະ ທີ່ບໍ່ແມ່ນທະນາຄານໄດ້ເຂົ້າຮ່ວມການໃຫ້ບໍລິການຊໍາລະຂ້າມທະນາຄານ ຜ່ານບໍລິສັດ LAPNet, ການຫຼຸດຜ່ອນການຄ່າທໍານຽມຂອງການໃຫ້ບໍລິການຊໍາລະ, ການເຊື່ອມໂຍງລະບົບການຊໍາລະຂ້າມແດນກັບບັນດາປະເທດຕ່າງໆໃຫ້ມີຄວາມຫຼາກຫຼາຍ ດ້ວຍການນໍາໃຊ້ສະກຸນເງິນທ້ອງຖິ່ນເຂົ້າໃນການຊໍາລະ, ການນໍາໃຊ້ QR Code ຕາມມາດຕະຖານ LAO QR, ການນໍາໃຊ້ QR Code ຂອງບຸກຄົນ ແລະ ນິຕິບຸກຄົນ ໃຫ້ສອດຄ່ອງກັບຈຸດປະສົງຂອງການຊໍາລະທີ່ຖືກຕ້ອງ, ການໃຫ້ຄວາມຮູ້ແກ່ຜູ້ຊົມໃຊ້ ແລະ ຮ້ານຄ້າຕ່າງໆ ເພື່ອເຮັດໃຫ້ລະບົບການຊໍາລະຂອງ ສປປ ລາວ ມີຄວາມສະດວກ, ວ່ອງໄວ, ປອດໄພ, ຕົ້ນທຶນຕໍ່າ ແລະ ສາມາດເຊື່ອມໃຊ້ຮ່ວມກັນໄດ້ ທັງພາຍໃນ ແລະ ຂ້າມແດນ.
(ຂ່າວ:ທຫລ)
ຄໍາເຫັນ