ກອງປະຊຸມວຽກງານໄອຍະການປະຊາຊົນທົ່ວປະເທດ ປະຈໍາປີ 2023

ອົງການໄອຍະການປະຊາຊົນສູງສຸດ (ອອປສ) ໄດ້ຈັດກອງປະຊຸມສະຫຼຸບວຽກງານໄອຍະການປະຊາຊົນທົ່ວປະເທດ ປະຈໍາປີ 2023ຂຶ້ນຢ່າງເປັນທາງການ ໃນວັນທີ 25 ມັງກອນ ນີ້ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC)ນະຄອນຫຼວງວຽງຈັນ ໂດຍພາຍໃຕ້ການເປັນປະທານຂອງ ທ່ານ ໄຊຊະນະ ໂຄດພູທອນ ກໍາມະການສູນກາງພັກ ເລຂາຄະນະບໍລິຫານງານພັກ ຫົວໜ້າ ອອປສ, ມີບັນດາຮອງຫົວໜ້າ ອອປວ, ຫົວໜ້າອົງການໄອຍະການທະຫານຂັ້ນສູງ, ຄະນະນຳຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ, ບັນດາກົມ ອົງການໄອຍະການປະຊາຊົນສູງສຸດ, ອົງການໄອຍະການປະຊາຊົນພາກ, ແຂວງ, ນະຄອນຫຼວງວຽງຈັນ, ອົງການໄອຍະການປະຊາຊົນເຂດ ໃນຂອບເຂດທົ່ວປະເທດ  ແລະ ແຂກທີ່ຖືກເຊີນເຂົ້າຮ່ວມ.
ທ່ານ ບຸນທັນ ບຸນທະວິໄລ ຮອງເລຂາຄະນະບໍລິຫານງານພັກ ຮອງຫົວໜ້າ ອອປສ ໄດ້ລາຍງານສະຫຼຸບການເຄື່ອນໄຫວວຽກງານໄອຍະການປະຊາຊົນທົ່ວປະເທດ ປະຈໍາປີ 2023 ແລະ ທິດທາງວຽກງານຈຸດສຸມ ປີ 2024ໂດຍຍົກໃຫ້ເຫັນຜົນສໍາເລັດ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ໃນໄລຍະຜ່ານມາ ທີ່ມີຜົນສຳເລັດຫຼາຍດ້ານ ເປັນຕົ້ນແມ່ນໄດ້ເອົາໃຈໃສ່ປັບປຸງລະບົບກົງຈັກການຈັດຕັ້ງ   ຂອງອົງການໄອຍະການປະຊາຊົນທຸກຂັ້ນໃຫ້ສອດຄ່ອງກັບຕໍາແໜ່ງງານຕົວຈິງ, ໄດ້ສ້າງຕັ້ງຫ້ອງການອົງການໄອຍະການປະຊາຊົນເຂດປະຈຳເມືອງຕື່ມ 8 ເມືອງ, ປັດຈຸບັນມີ ຫ້ອງການອົງການໄອຍະການປະຊາຊົນເຂດ ປະຈໍາເມືອງທັງໝົດ 16 ເມືອງແລະ ໄດ້ສ້າງຕັ້ງຫ້ອງໃຫ້ຄໍາປຶກສາທາງດ້ານກົດໝາຍແກ່ປະຊາຊົນຢູ່ ອອປສ ເພື່ອສ້າງເງື່ອນໄຂອໍານວຍຄວາມສະດວກໃຫ້ປະຊາຊົນໄດ້ເຂົ້າເຖິງຂະບວນການຍຸຕິທໍາຫຼາຍຂຶ້ນ, ໄດ້ຈັດຝຶກອົບຮົມທິດສະດີການເມືອງ-ການປົກຄອງຂັ້ນຕົ້ນ3ເດືອນໃຫ້ແກ່ພະນັກງານຫຼັກແຫຼ່ງອົງການໄອຍະການປະຊາຊົນ 1 ຊຸດ. ໃນໜຶ່ງປີຜ່ານມາໄດ້ຕິດຕາມກວດກາການອອກຄໍາສັ່ງຕ່າງໆ ຂອງອົງການສືບສວນ-ສອບສວນ ເຊັ່ນ:ຄໍາສັ່ງເປີດການສືບສວນ-ສອບສວນ  870 ສະບັບ; ຄໍາສັ່ງກວດຄົ້ນເຄຫາສະຖານ 803 ສະບັບ; ຄໍາສັ່ງຢຶດ ແລະ ອາຍັດຊັບ 16 ສະບັບ;ຄໍາສັ່ງຈັບຕົວ 3.178 ສະບັບ; ຄໍາສັ່ງກັກຂັງພາງ  11.536 ສະບັບ; ຄໍາສັ່ງຕໍ່ກໍານົດເວລາການກັກຂັງພາງ 7.847 ສະບັບ; ຄໍາສັ່ງປ່ອຍຕົວພາງ 902 ສະບັບ;ຄໍາສັ່ງປ່ອຍຕົວກ່ອນກໍານົດ  ໂດຍມີເງື່ອນໄຂ ຕາມຄໍາຕັດສິນຂອງສານ  478 ສະບັບ ແລະ ຄໍາແນະນໍາ ກ່ຽວກັບການດໍາເນີນຄະດີອາຍາ ຈໍານວນ 2.243 ສະບັບ. ການແກ້ໄຂຄະດີອາຍາຂັ້ນຕົ້ນ ໄດ້ຮັບສໍານວນຄະດີເຂົ້າໃໝ່ ຈໍານວນ 12.932 ເລື່ອງ ແລະ ມີສໍານວນຄະດີຄ້າງມາແຕ່ປີ 2022 ຈຳນວນ 450 ເລື່ອງ ລວມທັງໝົດ 13.382 ເລື່ອງ,ໄດ້ແກ້ໄຂແລ້ວ 12.296ເລື່ອງ ເທົ່າກັບ 91,88%ແລະ ກໍາລັງຄົ້ນຄວ້າ 1.086 ເລື່ອງ. ຂັ້ນອຸທອນ ໄດ້ຮັບສໍານວນຄະດີ ຈໍານວນ569 ເລື່ອງ, ໄດ້ແກ້ໄຂ ແລະ ສົ່ງໃຫ້ສານແລ້ວ 526 ເລື່ອງ ເທົ່າກັບ 92,44%,ກໍາລັງຄົ້ນຄວ້າ43 ເລື່ອງ, ເຂົ້າຮ່ວມປະຊຸມສານເພື່ອຖະແຫຼງ 325 ເລື່ອງ, ສານພິພາກສາເອົາຕາມຄໍາຖະແຫຼງ ຈໍານວນ 295 ເລື່ອງ ເທົ່າກັບ 90,76%, ສານພິພາກສາເອົາຕາມຄໍາຖະແຫຼງບາງສ່ວນ 10 ເລື່ອງເທົ່າກັບ 3,38%, ສານພິພາກສາບໍ່ເອົາຕາມຄໍາຖະແຫຼງ 20 ເລື່ອງເທົ່າກັບ 6,77%. ຂັ້ນລົບລ້າງ ໄດ້ຮັບສໍານວນຄະດີ ຈໍານວນ 173 ເລື່ອງ, ແກ້ໄຂ ແລະ ສົ່ງໃຫ້ສານແລ້ວ ຈໍານວນ 165ເລື່ອງ ເທົ່າກັບ 95,38%,ໃນຈໍານວນທີ່ແກ້ໄຂນັ້ນໄດ້ເຂົ້າຮ່ວມປະຊຸມສານເພື່ອຖະແຫຼງ 89 ເລື່ອງ, ສານພິພາກສາເອົາຕາມຄໍາຖະແຫຼງຈໍານວນ87 ເລື່ອງ ເທົ່າກັບ 97,75%, ສານພິພາກສາບໍ່ເອົາຕາມຄໍາຖະແຫຼງ 1 ເລື່ອງ ແລະ ເອົາຕາມຄໍາຖະແຫຼງບາງສ່ວນ 1 ເລື່ອງ.
ໃນໂອກາດດັ່ງກ່າວ, ກອງປະຊຸມຍັງໄດ້ຮັບກຽດຟັງການໂອ້ລົມຂອງ ທ່ານ ໄຊຊະນະ ໂຄດພູທອນ ທ່ານໄດ້ສະແດງຄວາມຍ້ອງຍໍຊົມເຊີຍຜົນສຳເລັດຂອງອົງການໄອຍະການປະຊາຊົນທົ່ວປະເທດ ໃນປີ 2023ແລະ ເຫັນວ່າ ກອງປະຊຸມວຽກງານໄອຍະການປະຊາຊົນທົ່ວປະເທດຄັ້ງນີ້ ເປັນກອງປະຊຸມທີ່ມີຄວາມໝາຍ, ຄວາມສໍາຄັນ ທີ່ໄດ້ເປີດຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ໄດ້ສະເຫຼີມສະຫຼອງວັນສຳຄັນຂອງພັກ, ຂອງຊາດ ຄື ວັນຊາດ ທີ 2 ທັນວາ ຄົບຮອບ 48 ປີ, ວັນສ້າງຕັ້ງອົງການໄອຍະການປະຊາຊົນ ຄົບຮອບ 34 ປີ ແລະ ວັນສ້າງຕັ້ງກອງທັບປະຊາຊົນລາວ ຄົບຮອບ 75ປີ. ພ້ອມດຽວກັນນັ້ນ ທ່ານຍັງຮຽກຮ້ອງໃຫ້ຄະນະນຳອົງການໄອຍະການປະຊາຊົນ ແລະ ອົງການໄອຍະການທະຫານແຕ່ລະຂັ້ນ ຈົ່ງພ້ອມກັນເອົາໃຈໃສ່ການກໍ່ສ້າງພັກ-ພະນັກງານ, ການປັບປຸງກົງຈັກການຈັດຕັ້ງ ເປັນຕົ້ນອົງການໄອຍະການປະຊາຊົນເຂດປະຈຳເມືອງ, ຍົກລະດັບບຸກຄະລາກອນ ໃຫ້ມີຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຮູ້-ຄວາມສາມາດດ້ານວິຊາສະເພາະ, ການປະຕິບັດສິດ ແລະ ພາລະບົດບາດ ໃນການຕິດຕາມກວດກາການປະຕິບັດກົດໝາຍ ເປັນຕົ້ນການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນຂອງເຈົ້າໜ້າທີ່ພາສີ, ປ່າໄມ້, ອົງການກວດກາລັດ ແລະ ການສັ່ງຟ້ອງຜູ້ຖືກຫາຂຶ້ນສານ ຕາມທີ່ກົດໝາຍກໍານົດໄວ້ ຢ່າງມີຜົນສັກສິດ, ຕັ້ງໜ້າປະຕິບັດແນວທາງການຕ່າງປະເທດຂອງພັກ ແລະ ລັດ ຢ່າງເປັນເຈົ້າການ ແລະ ມີຜົນສຳເລັດຕາມສິດ ແລະ ໜ້າທີ່ການເມືອງທີ່ພັກ ແລະ ລັດມອບໝາຍໃຫ້.

ຂ່າວ-ພາບ: ອານຸສັກ ກວາງວັນ