ໂດຍການເປັນປະທານ ຂອງທ່ານເພັດ ພົມພິພັກລັດຖະມົນຕີກະຊວງແຜນການ ແລະການລົງທຶນ, ເຂົ້າຮ່ວມມີບັນດາທ່ານຄະນະນໍາກະຊວງຜທ, ບັນດາຮອງລັດຖະມົນຕີ, ຫົວໜ້າຫ້ອງການ,ກົມ ແລະ ພະແນກແຜນການ ແລະການລົງທຶນທົ່ວປະເທດ.
ໃນວາລະ, ທ່ານ ນາງພອນວັນ ອຸທະວົງ ຮອງລັດຖະມົນຕີກະຊວງ ຜທ ໄດ້ສະຫຼຸບລາຍງານການຈັດຕັ້ງປະຕິບັດວຽກງານແຜນການ ແລະ ການລົງທຶນ ປະຈໍາປີ 2024 ແລະກໍານົດທິດທາງແຜນການ ປີ 2025 ໂດຍຍົກໃຫ້ເຫັນຈຸດດີ, ຜົນງານ ກໍຄືຈຸດອ່ອນຂໍ້ຄົງຄ້າງ, ສາເຫດຕ່າງໆ ແລະບົດຮຽນຖອດຖອນໄດ້,ໂດຍສະເພາະບັນຫາທີ່ພົ້ນເດັ່ນຕິດພັນກັບການຈັດຕັ້ງປະຕິບັດກຸ່ມວຽກຄື: (1) ກຸ່ມແຜນການຄຸ້ມຄອງໂຄງການລົງທຶນຂອງລັດ, ການປະເມີນຜົນໂຄງການລົງທຶນຂອງລັດ ວຽກງານຄຸ້ມຄອງທຶນຊ່ວຍເຫຼືອທາງການເພື່ອການພັດທະນາ (ຊກພ) ປີ 2024 ແລະທິດທາງແຜນການ ປີ 2025; (2) ກຸ່ມວຽກສົ່ງເສີມການລົງທຶນ ແລະເຂດເສດຖະກິດພິເສດ ໂດຍຈະເນັ້ນໜັກໃຫ້ເຫັນເຖິງເນື້ອໃນສຳຄັນຂອງກົດໝາຍວ່າດ້ວຍສົ່ງເສີມການລົງທຶນ ສະບັບປັບປຸງ ໂດຍສະເພາະການປັບປຸງກົນໄກໃນການພິຈາລະນາອະນຸມັດໂຄງການລົງທຶນ ໃນບັນຊີກິດຈະການສຳປະທານ ແລະກິດຈະການຄວບຄຸມໃຫ້ມີຄວາມວ່ອງໄວ ແລະ ຮັດກຸມຂຶ້ນ. ພ້ອມນັ້ນກໍຈະໄດ້ຍົກໃຫ້ເຫັນສະພາບພົ້ນເດັ່ນໃນການຈັດຕັ້ງປະຕິບັດວຽກງານສົ່ງເສີມການລົງທຶນ ແລະ ການຄຸ້ມຄອງ ໃນການພັດທະນາເຂດເສດຖະກິດພິເສດ ຢູ່ ສປປລາວ ປະຈຳປີ 2024 ແລະ ທິດທາງແຜນການ ປີ 2025; (3) ຈະໄດ້ຮັບຟັງການນຳສະເໜີ ວຽກງານຍົກສູງບົດບາດ ການປະສານງານໃນລະບົບສະຖິຕິແຫ່ງຊາດ ຕໍ່ການຜະລິດຂໍ້ມູນສະຖິຕິ ແລະ ຕົວຊີ້ບອກ ເພື່ອວາງນະໂຍບາຍ, ຕິດຕາມ ແລະ ປະເມີນແຜນພັດທະນາເສດຖະກິດ-ສັງຄົມແຫ່ງຊາດປະຈໍາປີ; (4)ຈະໄດ້ຮັບຟັງການລາຍງານສະພາບວຽກງານພົ້ນເດັ່ນຂອງການຮ່ວມມືລາວ-ຫວຽດນາມ ແລະ ລາວ-ຈີນ ປະຈຳປີ 2024 ແລະ ທິດທາງປີ 2025; ແລະ (5)ຈະໄດ້ຮັບຟັງການລາຍງານການສະຫຼຸບຕີລາຄາ ການຈັດຕັ້ງປະຕິບັດວຽກງານຄຸ້ມຄອງ-ກໍ່ສ້າງພະນັກງານ ແລະ ການປັບປຸງກົງຈັກການຈັດຕັ້ງ ຂະແໜງແຜນການ ແລະ ການລົງທຶນ.
ນອກຈາກນີ້,ຍັງຈະໄດ້ຮັບຟັງການເຜີຍແຜ່ມະຕິຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2024 ແລະ ທິດທາງແຜນການປີ 2025 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ແຜນການລົງທຶນຂອງລັດ ປະຈຳປີ 2025, ການຈັດຕັ້ງປະຕິບັດວຽກງານຈຸດສຸມ ຂອງສູນສະຖິຕິແຫ່ງຊາດ ປີ 2025, ຮັບຟັງການເຜີຍແຜ່ ດຳລັດຂອງທ່ານ ນາຍົກລັດຖະມົນຕີ ວ່າດ້ວຍການກຳນົດໜ້າວຽກ ແລະ ແບ່ງຄວາມຮັບຜິດຊອບ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ປະຈຳປີ 2025 ແລະແຜນການແກ້ໄຂຜົນການກວດສອບ,(ຮ່າງ) ບົດແນະນຳຂອງທ່ານລັດຖະມົນຕີ ກະຊວງແຜນການ ແລະ ການລົງທຶນ, ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະແຜນການລົງທຶນຂອງລັດ ປະຈຳປີ 2025 ລວມທັງບັນດາຫົວຂໍ້ຈຳນວນໜຶ່ງ ທີ່ພົວພັນເຖິງທາງດ້ານວິຊາສະເພາະ ຂອງບັນດາກົມກອງພາຍໃນ ກຜທ ແລະ ບົດຄໍາເຫັນຂອງບັນດາຂະແໜງການ ແລະ ທ້ອງຖິ່ນຈໍານວນໜຶ່ງ ທີ່ຕິດພັນກັບວຽກງານແຜນການ ແລະ ການລົງທຶນ.
(ຂ່າວ-ພາບ: ແສງຈັນ)
ຄໍາເຫັນ