ກອງພັນ 410 ສະຫຼຸບວຽກງານຮອບດ້ານ ປະຈຳປີ 2023.

ວັນທີ 27 ກຸມພາ ນີ້, ກອງພັນ 410 ປະຈໍາຢູ່ເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມສະຫຼູບວຽກງານຮອບດ້ານ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂຶ້ນຢູ່ທີ່ສະໂມສອນຂອງກອງພັນດັ່ງກ່າວ. ໂດຍການເປັນປະທານຂອງສະຫາຍ ພັທ ໄມໄຊ ແກ້ວແກ່ນຈັນ ເລຂາຄະນະພັກຮາກຖານ ຫົວໜ້າການເມືອງກອງພັນ 410, ມີສະຫາຍ ພັທ ຄຳຜາຍ ແກ່ນບົວຈັນ ຮອງເລຂາຄະນະພັກຮາກຖານ ຫົວໜ້າການທະຫານກອງພັນ 410 ແລະ ໃຫ້ກຽດເຂົ້າຮ່ວມ ຂອງສະຫາຍ ຄໍາຫຼ້າ ຜີວວັນນາ ກໍາມະການພັກແຂວງ ເລຂາພັກເມືອງ ເຈົ້າເມືອງ ປະທານປ້ອງກັນຊາດ-ປ້ອງກັນຄວາມສະຫງົບເມືອງຫົງສາ, ມີແຂກຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ, ສະຫາຍ ພັຕ ຄຳຈັນ ລັດທະພອນ ຮອງຫົວໜ້າການເມືອງກອງພັນ 410 ໄດ້ຜ່ານບົດສະຫຼູບການນຳພາ-ຊີ້ນຳຂອງຄະນະພັກ-ຄະນະບັນຊາໃນປີຜ່ານມາວ່າ: ຄະນະພັກ-ຄະນະບັນຊາ ໄດ້ເອົາໃຈໃສ່ສຶກສາອົບຮົມພະນັກງານ-ນັກຮົບພາຍໃນກົມກອງຢ່າງຕໍ່ເນື່ອງດ້ວຍຫຼາຍຮູບການ, ຫຼາຍເນື້ອໃນເປັນຕົ້ນແມ່ນໄດ້ຈັດຕັ້ງເຜີຍແຜ່ເຊື່ອມຊຶມມະຕິ, ຄໍາສັ່ງ, ເອກະສານຕ່າງໆ ຂອງພັກ-ລັດ, ຟັງປາຖະກະຖາວັນປະຫວັດສາດທີ່ສໍາຄັນຂອງຊາດ ແລະ ຂອງສາກົນ. ໄດ້ສຸມໃສ່ຫັນລົງກໍ່ສ້າງຮາກຖານການເມືອງຕິດພັນກັບວຽກງານ 3 ສ້າງ ແລະ ການສ້າງທ່າສະໜາມ ສົງຄາມປະຊາຊົນ 3 ຂັ້ນ ຢູ່ບັນດາຈຸດທີ່ຫຼໍ່ແຫຼມພາຍໃນ 4 ເມືອງເໜືອເປັນປົກກະຕິ, ສຸມໃສ່ວຽກງານເຄື່ອນໄຫວແກ້ໄຂໜໍ່ແໜງທີ່ຈະກໍໃຫ້ເກີດຄວາມບໍ່ສະຫງົບ, ຊີ້ນໍາບັນດາກົມກອງເອົາໃຈໃສ່ຕິດຕາມກໍາແໜ້ນສະພາບການເຄື່ອນໄຫວ ຂອງກຸ່ມຄົນບໍ່ດີຢູ່ 4 ເມືອງເໜືອພາຍໃນ ແລະ ນອກຊາຍແດນ, ຈັດຕັ້ງກໍາລັງ, ພາຫະນະຫັນເຂົ້າປະຈໍາການກຽມພ້ອມສູ້ຮົບໃນ 3 ພາວະຢ່າງເຂັ້ມງວດ, ເອົາໃຈໃສ່ກໍ່ສ້າງພັກໃຫ້ປອດໄສ, ເຂັ້ມແຂງ ຕາມ 5 ຫຼັກການ, 3 ທິດນໍາຂອງພັກ. ໄດ້ຖືສໍາຄັນການກໍ່ສ້າງພະນັກງານທັງ 3 ຮຸ່ນໄປພ້ອມໆກັນ ເພື່ອສືບທອດປ່ຽນແທນ. ທົ່ວກອງພັນໄດ້ຮັບຫຼຽນໄຊພິລະອາດຫານ ຊັ້ນ II, ຊັ້ນ III ໃຫ້ບຸກຄົນ 9 ໜ່ວຍ, ໃບຍ້ອງຍໍກະຊວງປ້ອງກັນປະເທດ 23 ໃບ, ໃບຍ້ອງຍໍກົມໃຫຍ່ການເມືອງ 18 ໃບ. ພ້ອມນີ້ ຕາງໜ້າແຕ່ລະກົມກອງກໍໄດ້ຂຶ້ນປະກອບຄຳຄິດຄໍາເຫັນຕໍ່ກອງປະຊຸມ ແລະ ສະເໜີບັນຫາທີ່ເປັນຈຸດອ່ອນ, ຂໍ້ຄົງຄ້າງເພື່ອພ້ອມກັນພິຈາລະນາແກ້ໄຂຕາມຄວາມເໝາະສົມ.
ໃນໂອກາດນີ້, ກໍໄດ້ຈັດພິທີມອບຫຼຽນດັ່ງກ່າວ ໃຫ້ກັບຜູ້ທີ່ມີຜົນງານດີເດັ່ນໃນການປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະ 5 ປີຜ່ານມາຢ່າງສົມກຽດ.
(ພາບ-ຂ່າວ: ກິດຕິສັກ ບົວໄລ)