ພິທີມອບ-ຮັບ ໄດ້ຈັດຂຶ້ນ ໃນວັນທີ 28 ເມສາຜ່ານມາ ທີ່ສຳນັກງານ ກຸ່ມບໍລິສັດຮຸ້ນສ່ວນພາກໃຕ້ລາວ ຈຳກັດ, ໂດຍການມອບຂອງ ທ່ານ ດວງຕາ ສະໝິງວົງສາ ປະທານ ກຸ່ມບໍລິສັດ ຮຸ້ນສ່ວນພາກໃຕ້ລາວ ຈຳກັດ ແລະ ກ່າວຮັບໂດຍ ທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ. ເຄື່ອງທີ່ນຳມາມອບໃນຄັ້ງນີ້, ປະກອບມີ Drone DJI Matrice ລຸ້ນ 30T 1 ຊຸດ, Drone DJI Matrice 4T 2 ຊຸດ, Galaxy Tab S10 Ultra 5G 1 ເຄື່ອງ ແລະ ອຸປະກອນເສີມຈໍານວນໜຶ່ງ ລວມມູນຄ່າທັງໝົດ 700 ລ້ານກວ່າກີບ.
 |
ໂອກາດນີ້, ທ່ານເຈົ້າແຂວງຈຳປາສັກ ໄດ້ກ່າວສະແດງຄວາມຂອບໃຈ ແລະ ຊົມເຊີຍ ທ່ານ ດວງຕາ ສະໝິງວົງສາ ປະທານ ພ້ອມຄະນະ ທີ່ໄດ້ມອບໂດຼນ Drone DJI Matrice ພ້ອມດ້ວຍອຸປະກອນເສີມໃຫ້ແຂວງຈຳປາສັກ ຊຶ່ງທ່ານເຫັນໄດ້ເຖິງຄວາມສຳຄັນໃນວຽກງານອັນລວມຂອງຄະນະພັກ-ອົງການປົກຄອງແຂວງ, ເຫັນໄດ້ເຖິງຄວາມສຳຄັນຂອງນະໂຍບາຍຂອງພັກ-ລັດຖະບານ ໃນການຫັນໄປສູ່ທັນສະໄໝ, ໂດຍສະເພາະ ຮັບໃຊ້ເຂົ້າໃນການວາງແຜນແກ້ໄຂສະພາບໄພພິບັດໃຫ້ທັນການ, ໃຊ້ເຂົ້າໃນວຽກງານການສຳຫຼວດ, ຕິດຕາມກວດກາ ແລະ ວຽກງານອື່ນໆ. ເປັນການປະກອນສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງແຂວງຈຳປາສັກ, ຄະນະພັກ-ອົງການປົກຄອງແຂວງຈຳປາສັກຈະ ຄຸ້ມຄອງ ແລະ ນຳໃຊ້ອຸປະກອນດັ່ງກ່າວໃຫ້ເກິດປະໂຫຍດສູງສູດ.
(ແຫຼ່ງຂ່າວ: ແຂວງຈໍາປາສັກ)
ຄໍາເຫັນ