ກປ ຄໍາມ່ວນສະຫຼູບຂະບວນການແຂ່ງຂັນ-ຍ້ອງຍໍ “ຮັກຊາດ ແລະ ພັດທະນາ” 

ກອງປະຊຸມສະຫຼູບຜົນການຈັດຕັ້ງປະຕິບັດຂະບວນການແຂ່ງຂັນ-ຍ້ອງຍໍພາຍໃຕ້ຄໍາຂວັນ “ຮັກຊາດ ແລະ ພັດທະນາ” ປະຈໍາປີ2023 ແລະ ເປີດຂະບວນການ ປະຈໍາປີ 2024 ຂອງພະແນກກະສິກໍາ ແລະ ປ່າໄມ້ (ກປ) ແຂວງຄໍາມ່ວນ ໄດ້ຈັດຂຶ້ນໃນວັນທີ 14 ມີນານີ້ ຢູ່ທີ່ສະໂມສອນຂອງພະແນກການດັ່ງກ່າວໂດຍການເຂົ້າຮ່ວມຂອງທ່ານ ສົມໃຈ ພານີຈັນ ຫົວໜ້າຄະນະຈັດຕັ້ງແຂວງ, ທ່ານ ບຸນຈັນ ໄຊປັນຍາ ຫົວໜ້າພະແນກ ກປ ແຂວງ, ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ .
ໃນພິທີ, ທ່ານ ສຸກັນ ອິນທະນູຮັກ ຮອງຫົວໜ້າພະແນກ ກປ ແຂວງກໍໄດ້ຜ່ານບົດສະຫຼູບຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ໂດຍໄດ້ຍົກໃຫ້ເຫັນຜົນງານການເຄື່ອນໄຫວທີ່ຍາດມາໄດ້ໃນແຕ່ລະດ້ານຕະຫຼອດໄລຍະ 1 ປີຜ່ານມາຊຶ່ງສາມາດຈັດຕັ້ງປະຕິບັດໄດ້ຕາມຄາດໝາຍ ແລະ ລື່ນຄາດໝາຍ.
ຜົນການປະເມີນຈັດຕັ້ງປະຕິບັດໜ້າທີ່ວຽກງານປະຈໍາປີ 2023 ຂອງພະແນກ ກປ ແຂວງ ສາມາດຈັດປະເພດພະນັກງານ - ລັດຖະກອນທີ່ມີຜົນງານດີເດັ່ນຄື: ປະເພດ 1 (ດີ ແລະ ດີຫຼາຍ) ມີ 144 ຄົນ ຍິງ 42 ຄົນ, ປະເພດ 2 (ກາງ) ມີ 25 ຄົນ ຍິງ 10 ຄົນ. 
ທ່ານ ສີລາ ຈັນທະລາວົງ ຄະນະພັກຮາກຖານ ຮອງຫົວໜ້າພະແນກ ກປ ແຂວງໄດ້ຜ່ານແຜນດໍາເນີນງານເປີດຂະບວນການແຂ່ງຂັນຍ້ອງຍໍຮັກຊາດ ແລະ ພັດທະນາຕິດພັນກັບ 3 ເນື້ອໃນ, 4 ຄາດໝາຍ, ຜ່ານຂໍ້ຕົກລົງຂອງທ່ານຫົວໜ້າພະແນກ ກະສິກໍາ ແລະ ປ່າໄມ້ແຂວງ ວ່າດ້ວຍການຮັບຮອງເນື້ອໃນຂໍ້ແຂ່ງຂັນຍ້ອງຍໍ . ຈາກນັ້ນບັນດາຕາງໜ້າຂະແໜງການ, ກອງ ແລະ ສູນອ້ອມຂ້າງພະແນກກໍໄດ້ພ້ອມກັນຂຶ້ນຈັບມືສູ້ຊົນຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ໃນປີ 2024 ໂດຍຍືດໝັ້ນ 3 ເນື້ອໃນຄື: ວຽກດີ, ພະນັກງານ ໜັກແໜ້ນ ແລະ ການຈັດຕັ້ງເຂັ້ມແຂງ. ພ້ອມນັ້ນແມ່ນປະຕິບັດຄາດໝາຍສູ້ຊົນການແຂ່ງຂັນຄື: ໃຫ້ໄວ, ໃຫ້ດີ , ໃຫ້ຫຼາຍ ແລະ ໃຫ້ຖືກກົດໝາຍ.
(ຂ່າວ-ພາບ : ແດງສະຫວັດ ແສນພານິດ).