ກຊສ ສຸມໃສ່ປະຕິບັດບັນດາໜ້າວຽກ ທີ່ກໍານົດໃນມະຕິເລກທີ 14/ລບ

ບົດສະຫຼຸບການຈັດຕັ້ງປະຕິບັດແຜນການປະຈໍາປີ 2023 ແລະ ທິດທາງແຜນການ ປີ 2024 ຂອງຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ (ຊສ) ໄດ້ເປີດເຜີຍວ່າ: ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ໄດ້ສຸມໃສ່ປະຕິບັດບັນດາໜ້າວຽກ ທີ່ກໍານົດໃນມະຕິ ສະບັບເລກທີ 14/ລບ, ລົງວັນທີ 18/12/2022 ວ່າດ້ວຍການກໍານົດໜ້າວຽກ ແລະ ແບ່ງຄວາມຮັບຜິດຊອບໃຫ້ບັນດາກະຊວງ ແລະ ອົງການປົກຄອງທ້ອງຖິ່ນ ໃນການຈັດຕັ້ງປະຕິບັດມະຕິຂອງຄະນະບໍລິຫານງານສູນກາງພັກ ສະບັບເລກທີ 26/ຄບສພ, ລົງວັນທີ 3/8/2017 ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃໝ່.
ປີ 2023 ຜ່ານມາ, ກຊສ ໄດ້ສ້າງ ແລະ ປັບປຸງນິຕິກໍາໃຕ້ກົດໝາຍຫຼາຍສະບັບເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານການຄຸ້ມຄອງທີ່ດິນ ຊຶ່ງໄດ້ສໍາເລັດການສ້າງນິຕິກຳດ້ານກົດໝາຍໃໝ່ ຈໍານວນ 3 ສະບັບຄື: (1) ດໍາລັດ ວ່າດ້ວຍຄອນໂດມີນຽມ ສະບັບ ເລກທີ 352/ສພ, ລົງວັນທີ 14/11/2023; (2) ຄໍາແນະນໍາຂອງລັດຖະມົນຕີ ວ່າດ້ວຍການປະເມີນ ທີ່ດິນ ສະບັບເລກທີ 0040/ກຊສ, ລົງວັນທີ 12/1/2023; (3) ຂໍ້ຕົກລົງວ່າດ້ວຍການຫັນປ່ຽນປະເພດທີ່ດິນ ສະບັບເລກທີ 3806/ກຊສ, ລົງວັນທີ 29/12/ 2023; ກໍາລັງສ້າງ ແລະ ປັບປຸງນິຕິກຳຈໍານວນ 9 ສະບັບ ຄື: (1) ຄູ່ມືແນະນໍາການສໍາຫຼວດວັດແທກ ແລະ ສ້າງແຜນທີ່ດິນ ສໍາເລັດ 90%); (2) ຄູ່ມືແນະນໍາການສ້າງແຜນຈັດສັນທີ່ດິນ ຂັ້ນເມືອງ (ສໍາເລັດ 80%); (3) ຮ່າງປັບປຸງຄໍາແນະນໍາວ່າດ້ວຍການຈົດທະບຽນການເຄື່ອນໄຫວ ແລະ ການປ່ຽນແປງສິດນໍາໃຊ້ທີ່ດິນ (ສະເໜີມີທ່ານ ລັດຖະມົນຕີ ພິຈາລະນາລົງລາຍເຊັນ). (4) ຮ່າງດໍາລັດວ່າດ້ວຍການຈັດສັນທີ່ດິນປຸກສ້າງຂອງລັດ ເພື່ອເປັນບ່ອນຢູ່ອາໄສ ແລະ ຊື້-ຂາຍ ທີ່ດິນຈັດສັນຂອງລັດ ແບບມີກໍານົດ (ກຽມສົ່ງທາບທາມຢູ່ຂັ້ນທ້ອງຖິ່ນ). (5) ຮ່າງຂໍ້ຕົກລົງວ່າດ້ວຍເງື່ອນໄຂການຮັບຮູ້ສິດນໍາໃຊ້ທີ່ດິນຂອງປະຊາຊົນ ທີ່ອາໄສ ແລະ ທໍາການຜະລິດ ຢູ່ໃນເຂດທີ່ດິນປ່າໄມ້; (6) ຮ່າງຂໍ້ຕົກລົງວ່າດ້ວຍ ການກຳນົດເນື້ອໃນແບບພິມໃບຢັ້ງຢືນການນໍາໃຊ້ທີ່ດິນຢູ່ໃນເຂດທີ່ດິນປ່າໄມ້ (ສຳເລັດໂດຍພື້ນຖານ); (7) ຂໍ້ຕົກລົງ ວ່າດ້ວຍລະບົບຂໍ້ມູນຂ່າວສານທີ່ດິນ (ກໍາລັງປັບປຸງຕາມຄໍາເຫັນ ຈາກການທາບທາມແຜນການ ຊສ ທົ່ວປະເທດ); (8) ຮ່າງປັບປຸງແຈ້ງການກ່ຽວກັບການອອກສໍາເນົາໃບຕາດິນຄືນໃໝ່ ເພື່ອທົດແທນໃບຕາດິນທີ່ຖືກເສຍຫາຍ ຫຼື ຖືກທໍາລາຍ ແລະ (9) ຮ່າງຄໍາແນະນໍາວ່າດ້ວຍການຊໍາລະເງິນຊື້-ຂາຍສິດນໍາໃຊ້ທີ່ດິນ ຜ່ານລະບົບທະນາຄານ (ສໍາເລັດໂດຍພື້ນຖານ);ພ້ອມນີ້, ກໍໄດ້ມອບໂອນວຽກງານຂຶ້ນທະບຽນອອກໃບຕາດິນ ໃຫ້ແກ່ຫ້ອງການ ຊສ (ໂດຍຜົນຂະຫຍາຍມາດຕາ 101 ຂອງກົດໝາຍວ່າດ້ວຍທີ່ດິນ) ທັງໝົດ 69 ເມືອງ, ຂອງ 12 ແຂວງ, ເທົ່າກັບ 47% ຂອງຈໍານວນເມືອງທັງໝົດ (ຍັງ 6 ແຂວງ ຄື ໄຊສົມບູນ, ສະຫວັນນະເຂດ, ບໍ່ແກ້ວ, ຫຼວງນໍ້າທາ, ໄຊຍະບູລີ ແລະ ຜົ້ງສາລີ); ໄດ້ມອບວຽກຈົດທະບຽນການເຄື່ອນໄຫວ ແລະ ປ່ຽນແປງສິດນໍາໃຊ້ທີ່ດິນ (ໂດຍຜັນຂະຫຍາຍມາດຕາ 104 ແລະ 105 ຂອງກົດໝາຍວ່າດ້ວຍທີ່ດິນ) ຈໍານວນ 50 ເມືອງ, ຂອງ 8 ແຂວງ, ເທົ່າກັບ 34% ຂອງຈໍານວນເມືອງທັງໝົດ (ຍັງ 10 ແຂວງ ຄື ນະຄອນຫຼວງວຽງຈັນ, ຜົ້ງສາລີ, ຫຼວງນໍ້າທາ, ບໍ່ແກ້ວ, ຫຼວງພະບາງ, ໄຊຍະບູລີ, ໄຊສົມບູນ, ບໍລິຄໍາໄຊ, ສະຫວັນນະເຂດ ແລະ ເຊກອງ); ໄດ້ດໍາເນີນວຽກງານການຄຸ້ມຄອງທີ່ດິນຫັນເປັນທັນສະໄໝ ໂດຍໄດ້ສ້າງຍຸດທະສາດການຫັນເປັນບ້ານທັນສະໄໝ, ປະກອບເປັນສະພາບລະບົບຄຸ້ມຄອງຖານຂໍ້ມູນທີ່ດິນ ແລະ ຄາດຄະເນແຜນການລົງທຶນ ການປັບປຸງຫັນເປັນທັນສະໄໝ, ໄດ້ປັບປຸງ ແລະ ສ້າງລະບົບໂຄງລ່າງພື້ນຖານຂອງ ICT (Server and Network) ເພື່ອຄຸ້ມຄອງຂໍ້ມູນທີ່ດິນ (LandDatabase), ລະບົບຄຸ້ມຄອງບໍລິຫານຈັດການວຽກງານທີ່ດິນ (Management and service) ແລະ ສໍາເລັດການສ້າງລະບົບເຄືອຂ່າຍສະຖານນີອ້າງອີງແບບຕໍ່ເນື່ອງ (CORS) ໃນຂອບເຂດທົ່ວປະເທດ ຊຶ່ງປັດຈຸບັນກໍໄດ້ມີການຮ່ວມມືກັບບໍລິສັດເອກະຊົນພາຍໃນ ເພື່ອສືບຕໍ່ພັດທະນາ ແລະ ຄຸ້ມຄອງລະບົບທະບຽນທີ່ດິນ (ລາວແລນເລັກ) ໂດຍໄດ້ແກ້ໄຂ, ສ້ອມແປງ ແລະ ກູ້ລະບົບຂໍ້ມູນຢຸດສະງັກ ແລະ ບໍ່ສາມາດດໍາເນີນວຽກງານບໍລິການທີ່ດິນ ພ້ອມທັງໄດ້ປະສານສົມທົບກັບກະຊວງເຕັກໂນໂລຊີ ແລະ ການສື່ສານ, ກະຊວງການເງິນ, ສູນສະຖິຕິແຫ່ງຊາດ ແລະ ທະນາຄານແຫ່ງ ສປປ ລາວ. 
ນອກນີ້, ຍັງໄດ້ສຸມໃສພັດທະນາ API (Application Programming Interface) ເພື່ອເຊື່ອມຕໍ່ຂໍ້ມູນທີ່ດິນ ໃນກະຊວງການເງິນເພື່ອເກັບຄ່າທໍານຽມ ແລະ ຄ່າບໍລິການໃນການຄຸ້ມຄອງນໍາໃຊ້ດິນ ແລະ ລາຍຮັບຈາກທີ່ດິນອື່ນໆ ຊຶ່ງໄດ້ເຮັດທົດລອງຢູ່ເມືອງໄຊທານີ ນະຄອນຫຼວງວຽງຈັນ.
 (ຂ່າວ-ພາບ: ສຸກສະຫວັນ)