ໄລຍະບຸນປີໃໝ່ ຕະຫຼາດລາວ ພ້ອມສະໜອງ ແລະ ຄວບຄຸມລາຄາສິນຄ້າ ຢ່າງເຄັ່ງຄັດ 

ໃນໄລຍະສະເຫຼີມສະຫລອງປີໃໝ່ລາວ ປີນີ້, ຕະຫຼາດລາວ ຂາຍຍົກ-ຂາຍຍ່ອຍ ໄດ້ກຽມຄວາມພ້ອມ ຮອບດ້ານເພື່ອສະໜອງສິນຄ້າ ປະເພດຕ່າງໆ ໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ ຢູ່ນະຄອນຫຼວງວຽງຈັນ, ພ້ອມທັງວາງມາດຕະການຢ່າງເຂັ້ມງວດ ເພື່ອຄວບຄຸມລາຄາສິນຄ້າ ຢູ່ພາຍໃນຕະຫຼາດ ເພື່ອບໍ່ໃຫ້ຊາວຄ້າຂາຍ ສວຍໂອກາດ ຂຶ້ນລາຄາສິນຄ້າ ຕາມລໍາພັງໃຈ ແລະ ອື່ນໆ.
ທ່ານ ສົມຫວັງ ໄຊສົມພູ ຫົວໜ້າຈັດສັນ ຕະຫຼາດລາວ ຂາຍຍົກ-ຂາຍຍ່ອຍ ໃຫ້ສຳພາດໃນວັນທີ 9 ເມສາ  ນີ້ວ່າ: ໃນໄລຍະສະເຫຼິມສະຫຼອງປີໃໝ່ລາວ 2024 ນີ້, ຕະຫຼາດລາວ ຂາຍຍົກ-ຂາຍຍ່ອຍ ກຽມຄວາມພ້ອມຮອບດ້ານ ເພື່ອສະໜອງສິນຄ້າປະເພດຕ່າງໆ ໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ, ພ້ອມທັງວາງມາດຕະການຢ່າງເຄັ່ງຄັດ ເພື່ອຄວບຄຸມລາຄາສິນຄ້າ ໂດຍຈະຈັດຕັ້ງທີມງານລົງໄປກວດກາລາຄາສິນຄ້າ, ກວດກາຕາຊັ່ງ ແລະ ວາງຊິງກາງ ທັງໝົດ 6 ຈຸດ, ພ້ອມທັງໃຫ້ຊາວຄ້າຂາຍ ຕິດປ້າຍລາຄາ ສິນຄ້າຕ່າງໆຢ່າງຊັດເຈນ ເພື່ອບໍ່ໃຫ້ເອົາລັດເອົາປຽບຜູ້ບໍລິໂພກ, ທັງເປັນການຢັ້ງຢືນໃຫ້ຜູ້ບໍລິໂພກ ມີຄວາມໝັ້ນໃຈທີ່ຈະຊື້ສິນຄ້າປະເພດຕ່າງໆໄດ້ຕາມໃຈມັກ. 
ຫົວໜ້າຈັດສັນຕະຫຼາດ ກ່າວອີກວ່າ: ຖ້າຫາກຊາວຄ້າຂາຍຜູ້ໃດລະເມີດຕໍ່ລະບຽບການ ຂອງຕະຫຼາດວາງອອກ ເປັນຕົ້ນ ສວຍໂອກາດຂຶ້ນລາຄາສິນຄ້າ, ປັບຕາຊິງ ແລະ ອື່ນໆ ຈະຖືກດຳເນີນຄະດີຕາມລະບຽບ ທີ່ວາງໄວ້ ຢ່າງເຄັ່ງຄັດ ຄື: ຖ້າກະທຳຜິດເທື່ອທຳອິດ ຈະອອກໃບແຈ້ງເຕືອນເຖິງຮ້ານ, ເທື່ອທີ່ສອງ ຈະເຮັດບົດບັນທຶກ ແລະ ກະທຳຜິດ ເທື່ອທີສາມ ຈະໃຫ້ຢຸດເຊົາກິດຈະການຊົ່ວຄາວ ແລະ ປັບໃໝ ຕາມລະບຽບການ.
ສຳລັບ ສິນຄ້າທີ່ນຳມາວາງຂາຍ ຢູ່ຕະຫຼາດລາວ ຂາຍຍົກ-ຂາຍຍ່ອຍ ແມ່ນໄດ້ມາຈາກຫຼາຍແຫ່ງ ເປັນຕົ້ນ ພືດຜັກຕ່າງໆ ໄດ້ຈາກສະຫະກອນບ້ານທ່າຊ້າງ, ບ້ານທົ່ງມັ່ງ, ຈາກເມືອງກາສີ ແຂວງວຽງຈັນ ແລະ ແຂວງຊຽງຂວາງ ຈຳນວນໜຶ່ງ ຊຶ່ງນຳເຂົ້າມາຂາຍໃນຕະຫຼາດ 6-7 ພັນກິໂລຕໍ່ມື້. ສ່ວນຊີ້ນໝູພັນ ພໍ່ຄ້າ-ຊາວຂາຍ ນຳມາວາງຂາຍ 2 ພັນກວ່າກິໂລຕໍ່ມື້, ໝູລາດ 15 ໂຕຕໍ່ມື້, ຊີ້ນງົວ-ຄວາຍ 600 ກິໂລ, ນອກນີ້ ຍັງມີເປັດ-ໄກ່, ປາ, ອາຫານທະເລ ແລະ ໝາກໄມ້. ໃນນັ້ນ, ລາຄາ ຊີ້ນໜູພັນ 78 ພັນກີບຕໍ່ກິໂລ, ໜູລາດ 80 ພັນກີບຕໍ່ກິໂລ, ຊີ້ນງົວ-ຄວາຍ 130.000 ກີບຕໍ່ກິໂລ, ເປັດ-ໄກລາດ 120.000 ກີບຕໍ່ກິໂລ ແລະ ປານິນ 45 ພັນກີບຕໍ່ກິໂລ.
ຂ່າວ: ທະນູທອງ