ກະຊວງກະສິກຳ ແລະ ປ່າໄມ້ ໄດ້ນຳພາຄະນະຂອງສະຖາບັນແລະສະມາຄົມລ້ຽງງົວລາວເດີນທາງຢ້ຽມຢາມສະຖາບັນວິທະຍາສາດການລ້ຽງສັດທີ່ຂຶ້ນກັບສະຖາບັນ-ບັນດິດວິທະຍາສາດກະສິກໍາສປຈີນເພື່ອປຶກສາຫາລືແລະແລກປ່ຽນບົດຮຽນກ່ຽວກັບວິທະຍາສາດການລ້ຽງງົວ.
ການຢ້ຽມຢາມໃນຄັ້ງນີ້ມີຈຸດປະສົງເພື່ອລົງເລິກກະກຽມກິດຈະກຳລະອຽດໃຫ້ສາມາດຈັດຕັ້ງປະຕິບັດກິດຈະກຳທີ່ສຳຄັນພາຍໃຕ້ “ໂຄງການຮ່ວມມືການຄົ້ນຄວ້າແລະພັດທະນາແນວພັນງົວຊີ້ນທີ່ດີລາວ-ຈີນ”ໂດຍສະເພາະແມ່ນການນຳເອົານ້ຳເຊື້ອແນວພັນງົວທີ່ດີ (ແນວພັນງົວHouaxi), ອຸປະກອນທີ່ຈຳເປັນແລະແຜນວຽກທີ່ສຳຄັນໃຫ້ສາມາດລິເລີ່ມຈັດຕັ້ງປະຕິບັດໄດ້ແລະໃຫ້ປະກົດຜົນເປັນຈິງຕາມແຜນທີ່ໄດ້ກຳນົດໄວ້.
ໃນການມາຢ້ຽມຢາມດັ່ງກ່າວທ່ານ ຈາງ ຈູນມິນ(Zhang Junmin)ຫົວໜ້າສະຖາຄົ້ນຄວ້າການລ້ຽງສັດແລະສັດຕະວະແພດພ້ອມດ້ວຍຄະນະໄດ້ໃຫ້ການຕ້ອນຮັບແລະນຳພາຢ້ຽມຢາມບັນດາສູນແລະສະຖາບັນວິທະຍາສາດການຄົ້ນຄວ້າການລ້ຽງສັດທີ່ນະຄອນຫຼວງປັກກິ່ງແລະຢ້ຽມຢາມຟາມລ້ຽງງົວແນວພັນ (Houaxi) ຕົວແບບທີ່ດີທີ່ນະຄອນຄຸນມິ່ງ.
ການເດີນທາງໄປປຶກສາຫາລື ແລະ ແລກປ່ຽນບົດຮຽນຄັ້ງນີ້ ກໍແມ່ນເປັນການຈັດຕັ້ງປະຕິບັດແລະຜັນຂະຫຍາຍເນື້ອໃນຈິດໃຈຂອງສັນຍາວ່າດ້ວຍໂຄງການຮ່ວມມືການຄົ້ນຄວ້າແລະພັດທະນາແນວພັນງົວຊີ້ນທີ່ດີລາວ-ຈີນລະຫວ່າງສະຖາບັນຄົ້ນຄວ້າກະສິກໍາ, ປ່າໄມ ້ ແລະພັດທະນາຊົນນະບົດ, ກະຊວງກະສິກໍາແລະປ່າໄມ ້ ແຫ່ງສປປລາວແລະບໍລິສັດລຽນຢູປັກກິ່ງເຕັກໂນໂລຊີປັບປຸງແນວພັນງົວຈໍາກັດ (BEIJING LIANYU BEEF CATTLE BREEDING TECHNOLOGY Co,. Ltd) ທີ່ໄດ້ລົງນາມເຊັນສັນຍາການຮ່ວມມືໃນວັນທີ11ມີນາ2025ທີ່ຜ່ານມາ.
(ຂ່າວ: ສຸກສະຫວັນ, ຂໍ້ມູນ-ພາບ:ກະຊວງ ກປ)
ຄໍາເຫັນ