ທ່ານ ວັນໄຊ ແພງຊຸມມາ ກໍາມະການສູນກາງພັກ ຮອງຫົວໜ້າຫ້ອງວ່າການສູນກາງພັກ ຮອງຫົວໜ້າຄະນະປະຕິຮູບລັດວິສາຫະກິດ ຜູ້ປະຈຳການ ພ້ອມຄະນະ ໄດ້ຕ້ອນຮັບ ແລະ ພົບປະກັບ ທ່ານ ຈູ ມິນ (Zhu Min) ຮອງຫົວໜ້າສູນແລກປ່ຽນເສດຖະກິດສາກົນ ສປ ຈີນ ອະດີດຮອງຫົວໜ້າອົງການ IMF ພ້ອມດ້ວຍຄະນະ ໃນວັນທີ 28 ກຸມພາຜ່ານມາ ໃນໂອກາດທີ່ຄະນະຜູ້ແທນດັ່ງກ່າວເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 25 ກຸມພາ ຫາ 5 ມີນາ 2024.
ໃນໂອກາດນີ້, ທ່ານ ຈູມິນ ໄດ້ສະເໜີຈຸດປະສົງຂອງການມາເຮັດວຽກໃນຄັ້ງນີ້ ແມ່ນເພື່ອເປັນການປຶກສາຫາລື ແລະ ແລກປ່ຽນບົດຮຽນກ່ຽວກັບວຽກງານການປະຕິຮູບລັດວິສາຫະກິດ ຢູ່ ສປປ ລາວ ແລະ ສປ ຈີນ. ຫຼັງຈາກນັ້ນ, ທ່ານ ວັນໄຊແພງ ຊຸມມາ ໄດ້ລາຍງານສະພາບການເຄື່ອນໄຫວດຳເນີນທຸລະກິດຂອງລັດວິສາຫະກິດ ຢູ່ ສປປ ລາວ ໂດຍຫຍໍ້ໃຫ້ຄະນະຝ່າຍຈີນ ຊາບວ່າ: ລັດວິສາຫະກິດຢູ່ ສປປ ລາວ ສ່ວນຫຼາຍແມ່ນດຳເນີນທຸລະກິດ ຂາດທຶນ, ລັດວິສາຫະກິດ ມີໜີ້ສິນຄຸມເຄືອ ເນື່ອງຈາກ ລັດວິສາຫະກິດ ຈຳນວນໜຶ່ງໄດ້ສ້າງໜີ້ສິນ ໂດຍບໍ່ຄຳນຶງເຖິງຄວາມສາມາດໃນການຊຳລະ ຈຶ່ງກາຍເປັນພາລະແບກຫາບແກ່ລັດຖະບານ, ຄຽງຄູ່ກັບການຄຸ້ມຄອງຂອງພາກລັດຕໍ່ລັດວິສາຫະກິດ ແມ່ນຍັງບໍ່ທັນເປັນລະບົບຄົບຊຸດ, ຂາດນິຕິກໍາຄຸ້ມຄອງທີ່ຈໍາເປັນຈໍານວນໜຶ່ງ, ການປະສານງານລະຫວ່າງກະຊວງທີ່ລັດວິສາຫະກິດຂຶ້ນກັບຍັງບໍ່ທັນກົມກຽວ, ການລາຍງານດ້ານການເງິນຂອງລັດວິສາຫະກິດ ຍັງບໍ່ເປັນປົກກະຕິ ແລະ ຂາດການຕິດຕາມ, ກວດກາ ແລະ ການປະເມີນຜົນການດຳເນີນທຸລະກິດ. ຍ້ອນສາເຫດດັ່ງກ່າວ ລັດຖະບານ ຈຶ່ງມີຄວາມຈຳເປັນຕ້ອງໄດ້ດຳເນີນການປະຕິຮູບລັດວິສາຫະກິດ ເຫຼົ່ານັ້ນຢ່າງຮອບດ້ານ ເພື່ອເຮັດໃຫ້ລັດວິສາຫະກິດ ສາມາດດຳເນີນທຸລະກິດໄດ້ຢ່າງມີປະສິດທິຜົນ ແລະ ສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.
ພາຍຫຼັງ ທີ່ຄະນະຝ່າຍລາວ ໄດ້ລາຍງານສະພາບໂດຍລວມຂອງລັດວິສາຫະກິດແລ້ວ, ຄະນະຝ່າຍຈີນ ແລະ ຝ່າຍລາວ ກໍໄດ້ຜັດປ່ຽນກັນມີຄຳເຫັນແລກປ່ຽນບົດຮຽນໃນວຽກງານການປະຕິຮູບລັດວິສາຫະກິດ ຢູ່ ສປປ ລາວ ແລະ ສປ ຈີນ ຊຶ່ງຄະນະຝ່າຍ ສປ ຈີນ ໄດ້ໃຫ້ຄວາມສົນໃຈຕໍ່ລັດວິສາຫະກິດ ທີ່ຖືກຮັບຮອງໃນແຜນ 5 ປີ (2021-2025) ຈາກລັດຖະບານ ຕາມມະຕິເລກທີ 10/ລບ, ປີ 2021 ຈໍານວນ 32 ຫົວໜ່ວຍ ເປັນຕົ້ນ: ລັດວິສາຫະກິດ ໄຟຟ້າລາວ, ລັດວິສາຫະກິດ ການບິນລາວ ແລະ ລັດວິສາຫະກິດ ນໍ້າມັນເຊື້ອໄຟລາວ ທີ່ໄດ້ສໍາເລັດການສ້າງແຜນປະຕິຮູບ ແລະ ໄດ້ຖືກຮັບຮອງແລ້ວ.
ໃນກອງປະຊຸມ, ທັງສອງຝ່າຍໄດ້ ພົບປະ ແລະ ແລກປ່ຽນບົດຮຽນ ຢ່າງກົງໄປກົງມາ ເຖິງແມ່ນວ່າການເຮັດວຽກຮ່ວມກັນໃນຄັ້ງນີ້ ຈະໃຊ້ເວລາສັ້ນ ແຕ່ທັງສອງຝ່າຍ ກໍສຸມໃສ່ໃນການແລກປ່ຽນຄຳຄິດຄຳເຫັນ ທີ່ເປັນປະໂຫຍດ ຮ່ວມກັນຫຼາຍດ້ານ.
ໃນໂອກາດນີ້ ຝ່າຍ ສປ ຈີນ ຍິນດີ ທີ່ຈະໃຫ້ການຊ່ວຍເຫຼືອທາງດ້ານວິຊາການ, ບົດຮຽນ ແລະ ປະສົບການໃນການປະຕິຮູບລັດວິສາຫະກິດ ຢູ່ ສປ ຈີນ ໃຫ້ແກ່ຝ່າຍລາວ ລວມທັງການໃຫ້ການຝຶກອົບຮົມວຽກງານການປະຕິຮູບລັດວິສາຫະກິດ ໃຫ້ຝ່າຍລາວ ແລະ ການເດີນທາງໄປສຶກສາຂໍ້ມູນ ເພື່ອຖອດຖອນບົດຮຽນ ກ່ຽວກັບການປະຕິຮູບລັດວິສາຫະກິດ ຢູ່ ສປ ຈີນ ອີກດ້ວຍ.
ຂ່າວ-ພາບ: ຫ້ອງວ່າການສູນກາງພັກ
ຄໍາເຫັນ