ເດີນທາງເຂົ້າຮ່ວມກອງປະຊຸມເວທີປຶກສາຫາລືແຜນງານໂຄງການອາຊີຕາເວັນອອກສ່ຽງໃຕ້ ຂອງອົງການຮ່ວມມືດ້ານເສດຖະກິດເພື່ອການພັດທະນາປະຈຳປີ 2025 ຫຼື 2025 OECD- Southeast Asia Regional Forum.
ຈຸດປະສົງຫຼັກຂອງການພົບປະສອງຝ່າຍຄັ້ງນີ້ ເພື່ອຊຸກຍູ້ການພົວພັນຮ່ວມມື ລະຫວ່າງ ສປປ ລາວ ແລະ ອົງການ OECD ໂດຍສະເພາະ ແມ່ນ ການປຶກສາຫາລືເພື່ອ ການຍາດແຍ່ງການຊ່ວຍເຫຼືອຈາກອົງການ OECD ມາສູ່ ສປປ ລາວ ໂດຍຜ່ານໂຄງການອາຊີຕາເວັນອອກສ່ຽງໃຕ້ (SEARP).
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຂອບໃຈອົງການ OECD ທີ່ ໄດ້ເຊື້ອເຊີນ ສປປ ລາວ ເຂົ້າຮ່ວມກອງປະຊຸມ ເວທີປຶກສາຫາລືແຜນງານໂຄງການອາຊີຕາເວັນອອກສ່ຽງໃຕ້ ຂອງອົງການຮ່ວມມືດ້ານເສດຖະກິດເພື່ອການພັດທະນາ ໃນຄັ້ງນີ້ ແລະ ໄດ້ຕີລາຄາສູງຕໍ່ບົດບາດ ແລະ ການຊຸກຍູ້ສົ່ງເສີມຮ່ວມມືອົງການ OECD ໂດຍສະເພາະໃນຂົງເຂດອາຊີຕາເວັນອອກ. ພ້ອມນັ້ນ, ຍັງໄດ້ແຈ້ງໃຫ້ອົງການ OECD ຊາບເຖິງບັນດາຂົງເຂດບູລິມະສິດຂອງ ສປປ ລາວ ເພື່ອຮ່ວມມືກັບສາກົນ ໂດຍສະເພາະ ການສົ່ງເສີມດ້ານການຄ້າ, ການລົງທຶນ ແລະ ການພັດທະນາດ້ານພື້ນຖານໂຄງລ່າງ.
ທ່ານເລຂາທິການໃຫຍ່ຂອງອົງການ OECD ໄດ້ສະແດງຄວາມຊົມເຊີຍ ທີ່ຄະນະຜູ້ແທນຂອງ ສປປ ລາວ ໄດ້ໃຫ້ຄວາມສຳຄັນໃນການເຂົ້າຮ່ວມກອງປະຊຸມເວທີປຶກສາຫາລືແຜນງານໂຄງການອາຊີຕາເວັນອອກສ່ຽງໃຕ້ ຊຶ່ງເປັນໂອກາດອັນດີ ໃຫ້ແກ່ ສປປ ລາວ ໃນການແລກປ່ຽນບົດຮຽນຮ່ວມກັບປະເທດຕ່າງໆ ກ່ຽວກັບ ການຮ່ວມມື, ການນຳໃຊ້ກົນໃກຂອງອົງການ OECD ເພື່ອຊຸກຍູ້ການພັດທະນາ ແລະ ປັບປຸງການກຳນົດນະໂຍບາຍພາຍໃນຂອງຕົນໃຫ້ນັບມື້ດີຂຶ້ນ. ພ້ອມນີ້, ທ່ານເລຂາທິການໃຫຍ່ຂອງອົງການ OECD ຍັງໃຫ້ຄໍາໝັ້ນສັນຍາໃນການສະໜັບສະໜູນ ການຮ່ວມມືສອງຝ່າຍກັບ ສປປ ລາວ ແລະ ໄດ້ສະເໜີໃຫ້ພາກສ່ວນທີ່ກ່ຽວຂ້ອງຂອງສອງຝ່າຍ ສືບຕໍ່ພົບປະກັນ ເພື່ອປຶກສາຫາລືໃນລາຍລະອຽດ ເພື່ອຮັດແໜ້ນ ແລະ ເສີມຂະຫຍາຍການຮ່ວມມືລະຫວ່າງ ສປປ ລາວ ກັບອົງການ OECD ແລະ ປະເທດສະມາຊິກ ເພື່ອນໍາເອົາຜົນປະໂຫຍດມາສູ່ ສປປ ລາວ.
ການພົບປະຄັ້ງນີ້ ເປັນຄັ້ງທຳອິດຂອງການນຳຂັ້ນສູງຂອງ ສປປ ລາວ ແລະ ເລຂາທິການໃຫຍ່ອົງການ OECD ນັບແຕ່ໄດ້ຮັບການສ້າງຕັ້ງ ເວທີປຶກສາຫາລືແຜນງານໂຄງການອາຊີຕາເວັນອອກສ່ຽງໃຕ້ ຂອງອົງການຮ່ວມມືດ້ານເສດຖະກິດເພື່ອການພັດທະນາ (SEARP) ຂຶ້ນນັບແຕ່ປີ 2014.
(ຂ່າວ-ພາບ: ກະຊວງການຕ່າງປະເທດ)
ຄໍາເຫັນ