ສ້ອມແປງ, ກໍ່ສ້າງຫຼາຍໜ້າວຽກເປັນຕົ້ນຖະໜົນສຳລັບລົດເມດ່ວນ, ລົດຖີບ ແລະ ຄົນຍ່າງ, ອູ່ລົດເມBRT, ສູນສ້ອມແປງ ແລະ ອື່ນໆ ໃຫ້ສຳເລັດໃນເດືອນທັນວາ 2024.
ໃນໂອກາດເຂົ້າຮ່ວມ ກອງປະຊຸມຮັບຟັງການລາຍງານ ແລະ ເຜີຍແຜ່ຂໍ້ມູນຂ່າວສານໂຄງການຂົນສົ່ງແບບຍືນຍົງໃນຕົວເມືອງ ນວ ທີ່ຈັດຂຶ້ນເມືອບໍ່ດົນມານີ້, ທ່ານ ຄຳພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງ ໃນຕົວເມືອງ ນວ ໄດ້ລາຍງານໃຫ້ຮູ້ກ່ຽວກັບໂຄງການດັ່ງກ່າວວ່າ: ຜ່ານມາແມ່ນໄດ້ເນັ້ນແຕ່ພຽງການສ້າງ ແລະ ປັບປຸງເສັ້ນທາງເຮັດໃຫ້ການແກ້ໄຂບັນຫາບໍ່ຍືນຍົງ.ດັ່ງນັ້ນ, ຜ່ານການສຶກສາ ແລະ ຈັດຕັ້ງປະຕິບັດຫຼາຍໂຄງການຫຼາຍອົງການຈັດຕັ້ງສາກົນ ຈຶ່ງເຫັນດີເປັນເອກະພາບ ຕໍ່ແນວທາງການແກ້ໄຂບັນຫາທີ່ມີລັກສະນະຮອບດ້ານ, ຄົບຊຸດເອົາການບໍລິການຂົນສົ່ງສາທາລະນະເປັນໃຈກາງ (TOD) ຄືດັ່ງໂຄງການນີ້.
ສ່ວນຖະໜົນສຳລັບລົດເມດ່ວນ, ລົດຖີບ ແລະ ຄົນຍ່າງສະຖານີໃຫຍ່ ຫຼື Transit Mall ແມ່ນເຂດສະເພາະສຳລັບລົດເມດ່ວນ, ລົດຖີບ ແລະ ຄົນຍ່າງ ມີຄວາມຍາວປະມານ 600 ແມັດ ຢູ່ຕາມຖະໜົນເສດຖາທິລາດເລີ່ມຈາກຖະໜົນຂຸນບູລົມ ສີ່ແຍກໄຟແດງວັດອິນແປງຫານ້ຳພຸ. ການສ້າງຖະໜົນດັ່ງກ່າວໂດຍມີຈຸດປະສົງ ເພື່ອສົ່ງເສີມການຂີ່ລົດຖີບ ແລະ ການຍ່າງ, ປັບປຸງການເຂົ້າເຖິງຂົນສົ່ງສາທາລະນະເພື່ອໃຫ້ມີພື້ນທີ່ສໍາລັບຄົນຍ່າງຫຼາຍກວ່ານໍາໃຊ້ຍານພາຫະນະ, ຫຼຸດຜ່ອນມົນລະພິດໃນໃຈກາງຕົວເມືອງ. ໃນນັ້ນ, ລະບົບການເກັບຄ່າໂດຍສານ, ລົດເມທຸກຄັນຕິດຕັ້ງອຸປະກອນກວດສອບລະບົບຈ່າຍຄ່າໂດຍສານ;ນໍາໃຊ້ບັດ smart card ຊຳລະຄ່າໂດຍສານ;ຜູ້ໂດຍສານ ຍັງສາມາດຈ່າຍເງິນຄ່າບໍລິການຜ່ານໂທລະສັບມືຖືທີ່ມີການສົມທົບກັບລະບົບບັນຊີທະນາຄານ;ຜູ້ໂດຍສານທີ່ບໍ່ໃຊ້ໂທລະສັບມືຖື, ສາມາດຊື້ປີ້ລົດເມດ່ວນຢູ່ສະຖານີຫຼັກ ແລະຈຸດຂາຍປີ້ໂດຍສານໃດໜຶ່ງກໍໄດ້.ລະບົບດັ່ງກ່າວຍັງສາມາດນໍາໃຊ້ສຳລັບຈ່າຍຄ່າຝາກລົດແລະໃຊ້ບໍລິການລົດຖີບສາມລໍ້ (pedicab).ໃນນັ້ນ, ຈຸດກໍ່ສ້າງອູ່ລົດເມ BRT ຢູ່ຖະໜົນ 13ໃຕ້ບ້ານໂພນຄຳເມືອງໄຊທານີນວມີເນື້ອທີ່ທັງໝົດປະມານ 3 ເຮັກຕາຊຶ່ງອູ່ລົດຈະສ້າງຮົ້ວອ້ອມ ແລະຮອງຮັບຊ່ອງຈອດລົດເມໄຟຟ້າ BRT ໄດ້ 82 ຄັນ ພ້ອມດ້ວຍບ່ອນສາກໝໍ້ໄຟ.ພ້ອມກັນນີ້, ຈະມີການຝຶກອົບຮົມກ່ຽວກັບບຳລຸງຮັກສາ,ການສ້ອມແປງ, ສະຖານີລ້າງ ແລະສິ່ງອຳນວຍຄວາມສະດວກອື່ນໆສຳລັບຄົນຂັບລົດ ແລະພະນັກງານ. ອູ່ລົດດັ່ງກ່າວຍັງມີຫ້ອງການບໍລິຫານໃຫ້ແກ່ຜູ້ປະກອບການລົດເມ BRT ເຊັ່ນກັນກັບສູນຄວບຄຸມການປະຕິບັດງານ.
ທ່ານ ຄຳພັນ ວັນທະນາ ຍັງໃຫ້ຮູ້ຕື່ມວ່າ: ສຳລັບຄວາມຄືບໜ້າຂອງໂຄງການດັ່ງກ່າວມາຮອດທ້າຍເດືອນກໍລະກົດ 2024, ໂຄງການສາມາດປະຕິບັດໄດ້ 62% ທຽບກັບແຜນການລວມທັງໝົດ (5 ອົງປະກອບ/ໜ້າວຽກ) ແລະ ແຜນໃນຕໍ່ໜ້າຈະສືບຕໍ່ວຽກກໍ່ສ້າງໂຄງລ່າງພື້ນຖານແກ່ລະບົບຂົນສົ່ງໃຫ້ສຳເລັດໃນກາງປີ 2025;ສູ້ຊົນສຳເລັດການກໍ່ສ້າງອູ່ລົດເມ, ສູນສ້ອມແປງ ແລະ ອື່ນໆ ໃຫ້ສຳເລັດໃນເດືອນທັນວາ 2024;ສືບຕໍ່ວຽກປະມູນສັນຍາບໍລິການທີ່ຍັງເຫຼືອ(ສາມສັນຍາ);ສືບຕໍ່ວຽກງານໂຄສະນາເຜີຍແຜ່ ແລະ ກະກຽມປັບປ່ຽນທິດທາງສັນຈອນຢູ່ບາງເສັ້ນທາງ; ສືບຕໍ່ວຽກໄກ່ເກ່ຍ ແລະ ຂໍ້ຄົງຄ້າງທີ່ຍັງບໍ່ທັນສຳເລັດ ພ້ອມຕິດຕາມການຂໍອະນຸມັດຕໍ່ອາຍຸ ແລະ ດັດແກ້ສັນຍາກູ້ຢືມ/ຊ່ວຍເຫຼືອຕື່ມອີກ 2 ປີ.
ຄໍາເຫັນ