ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງ ພ້ອມດ້ວຍຄະນະ ແລະ ສະມາຊິກຊາວໜຸ່ມອ້ອມຂ້າງແຂວງເຂົ້າຮ່ວມ.
ທ່ານ ຕຸລາວັນ ວົງໄຊ ລາຍງານວ່າ: ທົ່ວແຂວງມີຄະນະຊາວໜຸ່ມຮາກຖານ 9 ຮາກຖານ, ມີໜ່ວຍຊາວໜຸ່ມ ຂຶ້ນກັບຄະນະຊາວໜຸ່ມຮາກຖານ 52 ໜ່ວຍ, ໜ່ວຍຮາກຖານຊາວໜຸ່ມເອກະລາດ 32 ໜ່ວຍ ແລະ ໜ່ວຍຮາກຖານຊາວໜຸ່ມຂັ້ນເມືອງ 342 ໜ່ວຍ, ມີສະມາຊິກຊາວໜຸ່ມທັງໝົດ 18,713 ສະຫາຍ ຍິງ 6,143 ສະຫາຍ. ໃນໄລຍະຜ່ານມາ, ຄະນະບໍລິຫານງານຊາວໜຸ່ມແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດສະມາຊິກຊາວໜຸ່ມ-ໄວໜຸ່ມ ແລະ ເຍົາວະຊົນ ໃຫ້ຮັບຮູ້-ເຂົ້າໃຈຢ່າງເລິກເຊິ່ງຕໍ່ແນວທາງ, ແຜນນະໂຍບາຍຂອງພັກ ແລະ ລະບຽບກົດໝາຍຂອງລັດ ຕິດພັນກັບການປັບປຸງກົງຈັກການຈັດຕັ້ງຊາວໜຸ່ມໃຫ້ເຂັ້ມແຂງ ເຮັດໜ້າທີ່ເປັນເສນາທິການໃຫ້ແກ່ຄະນະພັກຂັ້ນຂອງຕົນ ເຕົ້າໂຮມຄວາມສາມັກຄີ ແລະ ປຸກລະດົມສະມາຊິກຊາວໜຸ່ມເຂົ້າຮ່ວມໃນການພັດທະນາເສດຖະກິດ-ສັງຄົມ ກໍຄືການປົກປັກຮັກສາ ແລະ ພັດທະນາປະເທດຊາດ; ເອົາໃຈໃສ່ຕິດຕາມ-ຊຸກຍູ້ສະມາຊິກຊາວໜຸ່ມປະຕິບັດຂໍ້ແຂ່ງຂັນ 4 ບຸກ, ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນ, ຂະບວນການແຂ່ງຂັນຮັກຊາດ - ພັດທະນາ ແລະ ວຽກງານ 3 ສ້າງ ຕາມພາລະບົດບາດ, ສິດ ແລະ ຄວາມຮັບຜິດຊອບຂອງຕົນ.
ໂອກາດນີ້, ທ່ານ ມອນໄຊ ລາວມົວຊົ່ງ ໄດ້ຊີ້ນໍາໃຫ້ຄະນະບໍລິຫານງານຊາວໜຸ່ມແຂວງ-ເມືອງ ແລະ ຮາກຖານຊາວໜຸ່ມ ກໍຄື ໜ່ວຍຊາວໜຸ່ມຮາກຖານອ້ອມຂ້າງແຂວງ ສືບຕໍ່ສຶກສາອົບຮົມການເມືອງ-ແນວຄິດສະມາຊິກຊາວໜຸ່ມ-ໄວໜຸ່ມໃຫ້ຮັບຮູ້-ເຂົ້າໃຈຕໍ່ແນວທາງຂອງພັກ, ແຜນນະໂຍບາຍຂອງລັດ ແລະ ສະພາບການຕ່າງໆທີ່ເກີດຂຶ້ນໃນປັດຈຸບັນ; ສືບຕໍ່ປຸກລະດົມເຕົ້າໂຮມຄວາມສາມັກຄີຊາວໜຸ່ມໃຫ້ເປັນປຶກແຜ່ນແໜ້ນໜາ, ເຂົ້າຮ່ວມ ແລະ ປະຕິບັດບັນດາມະຕິຄໍາສັ່ງຕ່າງໆທີ່ຂັ້ນເທິງວາງອອກ; ເອົາໃຈໃສ່ກະກຽມໃຫ້ແກ່ການດໍາເນີນກອງປະຊຸມໃຫຍ່ຜູ້ແທນຊາວໜຸ່ມທົ່ວແຂວງໃຫ້ສໍາເລັດຕາມຄາດໝາຍແຜນການທີ່ວາງໄວ້ ແລະ ມີປະສິດທິດຜົນສູງ.
ໃນໂອກາດດຽວກັນ, ທ່ານ ເລຂາຄະນະບໍລິຫານງານ ສຊປປລ ຍັງມອບຄອມພິວເຕີ 1 ຊຸດໃຫ້ຫ້ອງການຊາວໜຸ່ມແຂວງ ເພື່ອນໍາໃຊ້ເຂົ້າໃນການເຄື່ອນໄຫວວຽກງານວິຊາສະເພາະຂອງຕົນ.
(ພາບ-ຂ່າວ: ອັດສະວິນ)
ຄໍາເຫັນ