ຄະນະສຶກສາສາດ ມະຫາວິທະຍາໄລສຸພານຸວົງ ແລະ ສູນພັດທະນາເທັກໂນໂລຢີການສຶກສາ ມະຫາວິທະຍາໄລຣາຊພັດຊຽງລາຍ ລາຊອານາຈັກໄທ, ໂດຍມີສຳມະນາກອນ ທີ່ເປັນຄູ-ອາຈານ ຈາກມະຫາວິທະຍາໄສພານຸວົງ ແລະ ສະຖາບັນການສຶກສາອ້ອມຂ້າງແຂວງເຂົ້າຮ່ວມ 40 ຄົນ ຍິງ 18 ຄົນ.
ທ່ານ ກາລະພັດ ກຸນລະໄຊ ຄະນະບໍດີຄະນະສຶກສາສາດ ມະຫາວິທະຍາໄລສຸພານຸວົງ ໄດ້ຕາງໜ້າໃຫ້ຄະນະນຳ ມະຫາວິທະຍາໄລສຸພານຸວົງ ກ່າວຕ້ອນຮັບ ແລະ ສະແດງຄວາມຂອບໃຈ ຕໍ່ຄະນະອາຈານ ແລະນັກຄົ້ນຄວ້າຈາກ ຣາຊອານາຈັກໄທ ນຳໂດຍ ທ່ານ ນັດທະພົນ ສັນຕິ ຜູ້ຊ່ວຍອະທິການບໍດີ ມະຫາວິທະຍາໄລຣາຊພັດຊຽງລາຍ, ທີ່ໄດ້ເດີນທາງມາແລກປ່ຽນແບ່ງປັນປະສົບການຄົ້ນຄວ້າວິທະຍາສາດ ໃຫ້ກັບຄູ-ອາຈານ ແລະ ນັກຄົ້ນຄວ້າຂອງມະຫາວິທະຍາໄລສຸພານຸວົງ ທັງໄດ້ຕີລາຄາສູງຕໍ່ກັບກິດຈະກຳສຳມະນາ ທີ່ມີຄວາມສຳຄັນ ໂດຍສະເພາະການຄົ້ນຄວ້າວິທະຍາສາດ ເພື່ອຮັບໃຊ້ການຂະຫຍາຍຕົວຂອງເສດຖະກິດສັງຄົມ ແລະ ພັດທະນາທ້ອງຖິ່ນ, ພ້ອມກັນນີ້ ທ່ານໄດ້ຮຽກຮ້ອງໃຫ້ ສຳມະນາກອນທຸກຄົນ ຈົ່ງພ້ອມກັນຕັ້ງໜ້າເກັບກ່ຽວເອົາບົດຮຽນ ແລະ ປະສົບການອັນຫາຍາກນີ້ ໃຫ້ໄດ້ຫຼາຍ ເພື່ອໄປນຳໃຊ້ໃຫ້ເກີດຜົນດີທີ່ສຸດ ແນໃສ່ພັດທະນາວຽກງານວິຊາການ ກໍຄືພັດທະນາວຽກງານການສຶກສາຂອງ ສປປ ລາວ ໃຫ້ກ້າວໄປໜ້າຢ່າງບໍ່ຢຸດຢັ້ງ.
ຈາກນັ້ນ, ທ່ານ ນັດທະພົນ ສັນຕິ ໄດ້ໃຫ້ກຽດຂຶ້ນກ່າວແນະນຳກິດຈະກຳການສຳມະນາ ແລະວິທະຍາກອນຈາກຣາຊອານຈັກໄທ, ຊຶ່ງການສໍາມະນາຄັ້ງນີ້ ໄດ້ສຸມໃສ່ຫົວຂໍ້ທີ່ມີຄວາມສຳຄັນ ແລະ ກຳລັງເປັນທີ່ນິຍົມ ໃນວົງການຄົ້ນຄວ້າຂອງສາກົນ ຄື: ວິທະຍາສາດ, ເທັກໂນໂລຢີ, ວິສະວະກຳ, ສິລະປະ ແລະ ຄະນິດສາດ. ນອກຈາກນີ້, ສູນພັດທະນາເທັກໂນໂລຢີການສຶກສາ ມະຫາວິທະຍາໄລຣາຊພັດຊຽງລາຍ ໄດ້ມອບຊຸດອຸປະກອນ, ຮຸ່ນຍົນ ຈຳນວນ 10 ຊຸດ ໃຫ້ກັບມະຫາວິທະຍາໄລສຸພານຸວົງ ແລະ ສະຖາບັນການສຶກສາອ້ອມຂ້າງແຂວງ ເພື່ອນຳໄປໃຊ້ເປັນສື່ການສອນ ແລະ ນຳໃຊ້ເຂົ້າໃນວຽກງານຕົວຈິງ ທີ່ກ່ຽວຂ້ອງຂອງສະຖາບັນ ໃຫ້ມີຄວາມທັນສະໄໝຕໍ່ໄປ.
(ຂ່າວ-ພາບ: ໄຊພອນ ໂຄດໄຊໂຢ)
ຄໍາເຫັນ