ໃນທຸກໆປີຈະໄດ້ພ້ອມກັນສະເຫຼີມສະຫຼອງວັນສໍາຄັນດັ່ງກ່າວ ຮ່ວມກັບ ປະຊາຄົມໂລກ ຊຶ່ງໃນປີນີ້ ກົງກັບ ວັນສິ່ງແວດລ້ອມໂລກ ຄົບຮອບ 53 ປີ ແລະ ວັນສິ່ງແວດລ້ອມແຫ່ງຊາດ ຄົບຮອບ 27 ປີ, ການສະເຫຼີມສະຫຼອງວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດ ແມ່ນເພື່ອເປັນການສ້າງຈິດສໍານຶກໃຫ້ປະຊາຄົມໂລກ ກໍຄືພໍ່ແມ່ປະຊາຊົນລາວບັນດາເຜົ່າ ເຫັນໄດ້ຄວາມສໍາຄັນຂອງສິ່ງແວດລ້ອມ ກໍຄືການປ່ຽນແປງຂອງສະພາບການປ່ຽນແປງດິນຟ້າອາກາດ ເພື່ອຮ່ວມກັນປ້ອງກັນ, ແກ້ໄຂ ແລະ ມີສ່ວນຮ່ວມ ໃນການຫຼຸດຜ່ອນບັນຫາໂລກຮ້ອນ, ອັນເນື່ອງມາຈາກການປ່ຽນແປງຂອງສະພາບດິນຟ້າອາກາດທີ່ເປັນໄພຂົ່ມຂູ່ຕໍ່ການດໍາລົງຊີວິດຂອງມະນຸດ ແລະ ຊີວະນາໆພັນ, ສໍາລັບປີນີ້ ອົງການສະຫະປະຊາຊາດ ເພື່ອສິ່ງແວດລ້ອມ (UNEP) ໄດ້ກໍານົດຫົວຂໍ້ການສະເຫຼີມສະຫຼອງວັນສິ່ງແວດລ້ອມໂລກ ໂດຍສຸມໃສ່ການຈັດຕັ້ງປະຕິບັດວຽກງານສະພາບພູມອາກາດ ຊຶ່ງ ສາທາລະນະລັດ ອາແຊກບາຍຊານ (Azerbaijan) ໄດ້ເປັນເຈົ້າພາບຈັດງານສະເຫຼີມສະຫຼອງວັນດັ່ງກ່າວ ພາຍໃຕ້ຄໍາຂວັນ: Now For Climate, ສຳລັບ ສປປ ລາວ ກໍໄດ້ກໍານົດຄໍາຂວັນວັນສິ່ງແວດລ້ອມ ແຫ່ງຊາດ ຄື: “ເຖິງເວລາແລ້ວ ທີ່ພວກເຮົາຕ້ອງໃສ່ໃຈ ຕໍ່ສະພາບພູມອາກາດ ໃຫ້ສົດໃສ ແລະ ສົດຊື່ນ", ຄໍາຂວັນ ການສະເຫຼີມສະຫຼອງວັນສິ່ງແວດລ້ອມໂລກ ໃນປີນີ້ ແມ່ນມີເປົ້າໝາຍ ເນັ້ນໜັກໃສ່ການແກ້ໄຂບັນຫາການປ່ຽນແປງດິນຟ້າອາກາດ ທີ່ເປັນບັນຫາທ້າທາຍ ແລະ ສົ່ງຜົນກະທົບອັນໜັກໜ່ວງ ຕໍ່ຫຼາຍປະເທດໃນໂລກ ຊຶ່ງປັດຈຸບັນພວກເຮົາບໍ່ພຽງແຕ່ ປະເຊີນກັບ "ພາວະໂລກຮ້ອນ" (Global Warming) ທຳມະດາ, ແຕ່ກໍາລັງກ້າວເຂົ້າສູ່ຍຸກ "ພາວະໂລກຮ້ອນແບບຮຸນແຮງ" (Global Boiling) ທີ່ສະທ້ອນໃຫ້ເຫັນເຖິງຄວາມ ອັນຕະລາຍ ຂອງວິກິດການດັ່ງກ່າວ ທີ່ພວກເຮົາ ຕ້ອງຮ່ວມມືກັນ ຮີບຮ້ອນແກ້ໄຂ.
ທ່ານກ່າວຕື່ມວ່າ: ສຳລັບ ສປປ ລາວ ກໍປະເຊີນໜ້າກັບ ບັນຫາຜົນກະທົບຈາການປ່ຽນແປງດິນຟ້າອາກາດ ບັນຫາສິ່ງແວດລ້ອມເຊື່ອມໂຊມ ເຊັ່ນ: ສະພາບພູມອາກາດມີການປ່ຽນແປງ ໂດຍສະເພາະ ໃນລະດູແລ້ງ ອາກາດຮ້ອນອົບເອົ້າ, ອຸນຫະພູມສູງຂຶ້ນ, ເກີດມີໄຟໄໝ້ລາມປ່າ, ບັນຫາໝອກຄວັນ ແລະ ຝຸ່ນ PM 2.5 ເກີນມາດຕະຖານໃນບາງເຂດ, ຝົນຕົກບໍ່ຖືກຕາມລະດູການ, ເກີດມີຝົນໝາກເຫັບ, ໄພນໍ້າຖ້ວມ, ໄພແຫ້ງແລ້ງ, ດິນເຊາະເຈື່ອນ ຊຶ່ງໄດ້ສົ່ງຜົນກະທົບຕໍ່ໂຄງລ່າງພື້ນຖານ, ພື້ນທີ່ທຳການຜະລິດ ແລະ ສົ່ງຜົນກະທົບຕໍ່ກັບຊີວິດ ການເປັນຢູ່ຂອງປະຊາຊົນບັນດາເຜົ່າ ລວມທັງການພັດທະນາເສດຖະກິດ-ສັງຄົມຂອງຊາດ, ຕໍ່ບັນຫາດັ່ງກ່າວ, ລັດຖະບານ ໄດ້ໃຫ້ຄວາມສໍາຄັນໃນການແກ້ໄຂບັນຫາການປ່ຽນແປງ ດິນຟ້າອາກາດ ໂດຍການສ້າງນິຕິກຳ ແລະ ຍຸດທະສາດທີ່ສໍາຄັນ ເຊັ່ນ: ຍຸດທະສາດແຫ່ງຊາດ ການແກ້ໄຂບັນຫາການປ່ຽນແປງດິນຟ້າອາກາດ, ດຳລັດການປ່ຽນແປງດິນຟ້າອາກາດ, ດໍາລັດ ວ່າດ້ວຍສິນເຊື່ອກາກບອນ ແລະ ໄດ້ເຊື່ອມສານເອົາ ວຽກງານດັ່ງກ່າວ ເຂົ້າໃນ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2026-2030) ແລະໄດ້ກຳນົດຄາດໝາຍ ການຫຼຸດຜ່ອນການປ່ອຍ ແລະ ເພີ່ມການດູດຊັບທາດ ອາຍເຮືອນແກ້ວໃຫ້ໄດ້ 60% ພາຍໃນປີ 2030 ແລະ ໃຫ້ເປັນສູນ ໃນປີ 2050 (Net Zero Emission by 2050) ໂດຍການຫັນໄປສູ່ການຜະລິດພະລັງງານສະອາດ, ການນໍາໃຊ້ລົດໄຟຟ້າ, ການອະນຸລັກຊີວະນາໆພັນ ແລະ ເພີ່ມເນື້ອທີ່ປົກຫຸ້ມປ່າໄມ້ໃຫ້ໄດ້70% ໃນປີ 2035.
ການສະເຫຼີມສະຫຼອງ ວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດ ໃນປີ 2026 ນີ້, ໄດ້ຈັດໄປຄຽງຄູ່ກັບ ການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ຊຶ່ງພາກລັດຖະບານກໍຄືກະຊວງກະສິກຳ ແລະ ສິ່ງແວດລ້ອມ ໄດ້ຮ່ວມກັບພາກເອກະຊົນ ແລະ ພາກສ່ວນຕ່າງໆ ຈັດກິດຈະກຳຢ່າງຍິ່ງໃຫຍ່ ແລະ ຫຼາກຫຼາຍໂດຍມີຈຸດປະສົງ ເພື່ອປຸກລະດົມ ແລະ ຊຸກຍູ້ໃຫ້ທຸກພາກສ່ວນໃນສັງຄົມ ທັງພາຍໃນ ແລະ ຕ່າງປະເທດເຫັນໄດ້ຄວາມສໍາຄັນ ຂອງການປົກປັກຮັກສາສິ່ງແວດລ້ອມ ແລະ ພ້ອມໃຈກັນ ເປັນເຈົ້າການໃນການປ້ອງກັນ, ຫຼຸດຜ່ອນ ແລະ ແກ້ໄຂບັນຫາສິ່ງແວດລ້ອມ ແລະ ການປ່ຽນແປງດິນຟ້າອາກາດ ດ້ວຍການລົງມືປະຕິບັດດ້ວຍຕົນເອງ ໂດຍເລີ່ມຈາກການປູກ ແລะ ບົວລະບັດຕົ້ນໄມ້, ຫຼຸດຜ່ອນການນໍາໃຊ້ພລາສຕິກ, ບໍ່ຖິ້ມ-ບໍ່ຈູດຂີ້ເຫຍື້ອຊະຊາຍ, ບໍ່ຈູດພື້ນທີ່ການຜະລິດກະສິກຳ ແລະ ບໍ່ທຳລາຍປ່າໄມ້,
ສໍາລັບການສະເຫຼີມສະຫຼອງໃນປີນີ້ຈະຈັດພິທີເປີດສັບປະດາສະເຫຼີມສະຫຼອງ ວັນສິ່ງແວດລ້ອມໂລກ ແລະ ວັນປູກຕົ້ນໄມ້ ແຫ່ງຊາດ ພາຍໃຕ້ຫົວຂໍ້: ຢຸດການຈູດປ່າ ແລະ ປູກຕົ້ນໄມ້ຫຼາຍລ້ານຕົ້ນ ເພື່ອອາກາດສົດໃສ ໃນວັນທີ 29 ພຶດສະພາ 2026 ທີ່ສວນນໍ້າພຸ, ພາຍໃນງານຈະມີຫ້ອງວາງສະແດງ ກ່ຽວກັບພັນໄມ້ນາໆຊະນິດ, ນະວັດຕະກໍາ ກ່ຽວກັບການປົກປັກຮັກສາສິ່ງແວດລ້ອມ, ການສະແດງສິລະປະ ແລະ ອື່ນໆ, ແລ່ນມາລາທອນ ພາຍໃຕ້ຫົວຂໍ້ "ແລ່ນເພື່ອປ່າໄມ້ຂອງພວກເຮົາ ແລະ ອາກາດສົດໃສ (Run For Our Forest and Climate) ໃນວັນທີ 31 ພຶດສະພາ 2026 ທີ່ສວນນໍ້າພຸ, ສໍາລັບຜູ້ທີ່ລົງທະບຽນໃນການເຂົ້າການແຂ່ງແລ່ນມາລາທອນ ແມ່ນຈະໄດ້ຮັບຕົ້ນໄມ້ຜູ້ລະ 1 ຕົ້ນ ເພື່ອນໍາໄປປູກ, ຈັດສໍາມະນາວິທະຍາສາດໃນຫົວຂໍ້ຕ່າງໆທີ່ຕິດພັນກັບປົກປັກຮັກສາສິ່ງແວດລ້ອມ ແລະ ການປ່ຽນແປງດິນຟ້າອາກາດ, ຈັດກິດຈະກຳແຂ່ງຂັນແຕ້ມຮູບ, ສ້າງຄລິບວີດີໂອ, ຖາມ-ຕອບ ກ່ຽວກັບສິ່ງແວດລ້ອມ ແລະ ການປ່ຽນແປງດິນຟ້າອາກາດ ແລະ ກິດຈະກຳອື່ນໆ.
ດັ່ງນັ້ນ, ຈຶ່ງຂໍເຊີນຊວນມາຍັງ ບັນດາອົງການຈັດຕັ້ງ ພັກ-ລັດ, ອໍານາດການປົກຄອງທ້ອງຖິ່ນ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ, ຜູ້ພັດທະນາ ແລະ ຜູ້ປະກອບການທັງພາຍໃນ ແລະ ຕ່າງປະເທດ ແລະ ປະຊາຊົນບັນດາເຜົ່າໃນຂອບເຂດທົ່ວປະເທດໂດຍສະເພາະ ລູກຫຼານຊາວໜຸ່ມເຍົາວະຊົນທັງຫຼາຍ ຈົ່ງໃຫ້ການຮ່ວມມື ແລະ ເປັນເຈົ້າການປະກອບສ່ວນ ໃນການປົກປັກຮັກສາສິ່ງແວດລ້ອມ ແລະ ການແກ້ໄຂບັນຫາການປ່ຽນແປງດິນຟ້າອາກາດ ພ້ອມທັງເຊີນຊວນທັງໝົດ ເຂົ້າຮ່ວມງານສັບປະດາສະເຫຼີມສະຫຼອງ ວັນສິ່ງແວດລ້ອມໂລກ, ວັນສິ່ງແວດລ້ອມແຫ່ງຊາດ ແລະ ວັນປູກຕົ້ນໄມ້ແຫ່ງຊາດ ແລະ ເຂົ້າຮ່ວມແລ່ນມາລາທອນ ຕາມວັນເວລາດັ່ງກ່າວດ້ວຍ.
(ຂ່າວ-ພາບ: ສຳນານ)
ຄໍາເຫັນ