ມອບ-ຮັບໜ້າທີ່ຫົວໜ້າພະແນກຍທຂ ນວ ຜູ້ເກົ່າ-ຜູ້ໃໝ່

ພະແນກໂຍທາທິການ ແລະ ຂົນສົ່ງ (ຍທຂ) ນະຄອນຫຼວງວຽງຈັນ (ນວ) ໄດ້ຈັດພິທີມອບ-ຮັບໜ້າທີ່ ຫົວໜ້າພະແນກ ຍທຂ ນວ  ລະຫວ່າງທ່ານ ສຸລິວັນ ພົມມະຫາໄຊ ຫົວໜ້າພະແນກ ຍທຂ ນວ ຜູ້ເກົ່າ ແລະ ທ່ານ ບຸນຍະວັດ ນິລະໄຊຍ໌ ຫົວໜ້າພະແນກ ຍທຂ ນວ ຜູ້ໃໝ່ໄດ້ຈັດຂຶ້ນໃນວັນທີ 7 ກຸມພາຜ່ານມາທີ່ຫ້ອງວ່າການ ນວ ໂດຍມີທ່ານ ອາດສະພັງທອງ ສີພັນດອນ ເຈົ້າຄອງ ນວ, ທ່ານ ງາມປະສົງ ເມືອງມະນີ ລັດຖະມົນຕີກະຊວງ ຍທຂ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ໃນພິທີຕາງໜ້າຄະນະຈັດຕັ້ງ ນວ ໄດ້ຂຶ້ນຜ່ານຂໍໍ້ຕົກລົງເຈົ້າຄອງ ນວ ວ່າດ້ວຍການຍົກຍ້າຍຫົວໜ້າພະແນກ ຍທຂ ນວ ສະບັບເລກທີ 106/ຈນວ ລົງວັນທີ 30 ມັງກອນ 2024 ໂດຍເຫັນດີຕົກລົງຍົກຍ້າຍທ່ານ ສຸລິວັນ ພົມມະຫາໄຊ ຫົວໜ້າພະແນກ ຍທຂ ນວ (ຜູ້ເກົ່າ) ໄປຮັບໜ້າທີ່ໃໝ່ເປັນເລຂາຄະນະພັກເມືອງເຈົ້າເມືອງນາຊາຍທອງ ນວ, ຜ່ານຂໍ້ຕົກລົງເຈົ້າຄອງ ນວ ວ່າດ້ວຍການແຕ່ງຕັ້ງຫົວໜ້າພະແນກ ຍທຂ ນວ ສະບັບເລກທີ 108/ຈນວ, ລົງວັນທີ 30 ມັງກອນ 2024 ໂດຍແຕ່ງຕັ້ງທ່ານ ບຸນຍະວັດ ນິລະໄຊຍ໌ ເປັນຫົວໜ້າພະແນກ ຍທຂ ນວ ຜູ້ໃໝ່ ແລະ ຜ່ານມະຕິຕົກລົງຄະນະປະຈຳພັກ ນວ ວ່າດ້ວຍການແຕ່ງຕັ້ງເລຂາຄະນະພັກຮາກຖານພະແນກ ຍທຂ ນວ ສະບັບເລກທີ 63 ລົງວັນທີ 5 ກຸມພາ 2024 ໂດຍແຕ່ງຕັ້ງທ່ານ ບຸນຍະວັດ ນິລະໄຊຍ໌ ເປັນເລຂາຄະນະພັກຮາກຖານພະແນກ ຍທຂ ນວ.
ໃນໂອກາດດັ່ງກ່າວ, ທ່ານ ອາດສະພັງທອງ ສີພັນດອນ ໄດ້ມີຄຳເຫັນໂອ້ລົມບາງຕອນກ່າວວ່າ: ການແຕ່ງຕັ້ງ, ສັບຊ້ອນໝູນວຽນພະນັກງານເປັນວຽກງານປົກກະຕິ ຂອງວຽກງານຄຸ້ມຄອງບຸກຄະລາກອນບົນຫຼັກການມີຂຶ້ນມີລົງ, ມີເຂົ້າມີອອກ ແລະ ໝູນວຽນປ່ຽນແທນ. ສໍາລັບທ່ານ ສຸລິວັນ ພົມມະຫາໄຊ ຫົວໜ້າພະແນກ ຍທຂ ນວ (ຜູ້ເກົ່າ) ເປັນພະນັກງານທີ່ເຕີບໃຫຍ່ມາຈາກຂະແໜງຍທຂ ເປັນຜູ້ທີ່ມີຄວາມຮູ້-ຄວາມສາມາດ, ກ້າຮັບຜິດຊອບ ແລະ ມີຄວາມໄວ້ວາງໃຈຈາກຂັ້ນເທິງ ແລະ ສະມາຊິກພັກ-ພະນັກງານ ໄດ້ຮັບມອບໝາຍໜ້າທີ່ການເມືອງທີ່ສໍາຄັນ ຊຶ່ງໃນປີ 2016 ໄດ້ຮັບການແຕ່ງຕັ້ງເປັນຮອງຫົວໜ້າພະແນກ ຍທຂ ນວ, ຕໍ່ມາປີ 2020 ໄດ້ຮັບການແຕ່ງຕັ້ງເປັນຫົວໜ້າພະແນກ ຍທຂ ນວ ຊຶ່ງໄດ້ປະຕິບັດວຽກງານດ້ວຍຄວາມຮັບຜິດຊອບສູງໃນການນໍາພາ-ຊີ້ນໍາວຽກງານຂະແໜງ ຍທຂ ເຮັດໃຫ້ມີຜົນສໍາເລັດທາງດ້ານການກໍ່ສ້າງ ແລະ ສ້ອມແປງເສັ້ນທາງ, ການຄຸ້ມຄອງຜັງເມືອງ, ການກໍ່ສ້າງທາງນໍ້າ, ການຂົນສົ່ງທາງໂດຍສານ ແລະ ສິນຄ້າ, ການຄຸ້ມຄອງຍານພາຫະນະ ເຮັດໃຫ້ຕົວເມືອງໄດ້ຮັບການພັດທະນາຂຶ້ນເປັນກ້າວໆ. ການຍົກຍ້າຍໄປຮັບໜ້າທີ່ໃໝ່ອີງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ສໍາລັບທ່ານ ບຸນຍະວັດ ນິລະໄຊຍ໌ ທີ່ຖືກແຕ່ງຕັ້ງຮັບໜ້າທີ່ໃໝ່ ຊຶ່ງເປັນຜູ້ທີ່ມີຄວາມຮູ້ຄວາມສາມາດ ແລະ ປະສົບການຢູ່ໃນຂົງເຂດວຽກງານດັ່ງກ່າວ. ສະນັ້ນ, ເຊື່ອໝັ້ນວ່າທ່ານທີ່ຖືກແຕ່ງຕັ້ງໃນຄັ້ງນີ້ຈະນໍາເອົາບົດຮຽນ ແລະ ປະສົບການທີ່ມີ ເພື່ອສືບຕໍ່ປັບປຸງ, ແກ້ໄຂໃນວຽກງານຂອງຕົນໃຫ້ມີໃບໜ້າໃໝ່ມີຄວາມເຂັ້ມແຂງ ແລະ ມີຜົນສໍາເລັດຕາມລະດັບຄາດໝາຍ. ການມອບໝາຍໜ້າທີ່ໃນຄັ້ງນີ້ສຸດທີ່ມີຄວາມໝາຍ-ຄວາມສໍາຄັນໃນເງື່ອນໄຂສະພາບການທັງພາຍໃນ ແລະ ສາກົນ ມີທັງສິ່ງທີ່ເອື້ອອໍານວຍ ແລະ ມີສິ່ງທ້າທາຍຫຼາຍຢ່າງເຊື່ອໝັ້ນວ່າຄວາມຮູ້, ຄວາມສາມາດ, ມານະຈິດປະຕິວັດບວກກັບຄວາມສາມັກຄີເປັນປຶກແຜ່ນ ແນ່ນອນເຖິງຈະເປັນວຽກທີ່ຫຍຸ້ງຍາກກໍຈະສາມາດບັນລຸການຈັດຕັ້ງປະຕິບັດໜ້າການເມືອງທີ່ໄດ້ຮັບການມອບໝາຍດ້ວຍຜົນສຳເລັດດີ. ຂໍໃຫ້ທ່ານທີ່ໄດ້ຮັບການແຕ່ງຕັ້ງໃໝ່ສືບຕໍ່ປະຕິບັດໜ້າທີ່ວຽກງານໃນຕໍ່ໜ້າໂດຍມີການຊີ້ນໍາ ແລະ ສົມທົບກັບຂະແໜງການກ່ຽວຂ້ອງເປັນຕົ້ນຄົ້ນຄວ້າ, ເຊື່ອມຊຶມ, ເຜີຍແຜ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານ, ແຜນຍຸດທະສາດກ່ຽວກັບວຽກງານຍທຂໃຫ້ເລິກເຊິ່ງ, ມີປະສິດທິພາບ ແລະ ປະສິດທິຜົນ.
(ຂ່າວ-ພາບ: ວັນເພັງ)