ເນື່ອງໃນໂອກາດມູນນິທິພິບານ ສປ ຈີນຮ່ວມກັບມູນນິທິຈີນ ນະຄອນຫຼວງວຽງຈັນໄດ້ຈັດຝຶກອົບຮົມໃຫ້ແກ່ພະນັກງານໜ່ວຍກູ້ໄພພາຍໃນນະຄອນຫຼວງວຽງຈັນເພື່ອຍົກລະດັບໃຫ້ແກ່ໜ່ວຍກູ້ໄພນະຄອນຫຼວງວຽງຈັນໃຫ້ມີຄຸນນະພາບ ແລະ ທັນກັບເຫດການ ພາຍໃຕ້ຫົວຂໍ້ ການຊ່ວຍເຫຼືອສຸກເສີນ, ໄພພິບັດ ແລະ ອື່ນໆ.ໃນລະຫວ່າງວັນທີ 23-27 ພຶດສະພາ 2024 ແລະ ໃນວັນທີ 24 ພຶດສະພາ 2024 , ມູນນິທິພິບານ ສປ ຈີນ ແລະ ມູນນິທິຈີນ ນະຄອນຫຼວງວຽງຈັນໄດ້ເຂົ້າພົບປະ ແລະ ຢ້ຽມຢາມ ກົມຕໍາຫຼວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ,ນຳໂດຍທ່ານນາງ ສຸວັນນາ ຮອງຫົວໜ້າກົມຮ່ວມມືສາກົນ ສູນຫຼຸດຜ່ອນໄພພິບັດແຫ່ງຊາດ ກະຊວງຄຸ້ມຄອງເຫດສຸກເສີນ ສປ ຈີນ ພ້ອມຄະນະ,ໃຫ້ການຕ້ອນຮັບໂດຍທ່ານ ພັອ ຈັນຫອມ ແກ້ວສຸລະໄຊ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບພ້ອມດ້ວຍຄະນະເຂົ້າຮ່ວມ.
ໃນການພົບປະຄັ້ງນີ້ ທ່ານນາງ ສຸວັນນາ ໄດ້ລາຍງານວ່າ: ມູນນິທິພິບານ ສປ ຈີນໜ້າທີ່ຫຼັກໃນຄວາມຮັບຜິດຊອບປະກອບມີ: ຮັກສາຄວາມປອດໄພໃນຕົວເມືອງ, ໄພພິບັດທາງດ້ານທຳມະຊາດ ແລະ ການຊ່ວຍເຫຼືອສຸກເສີນ ພາຍໃນປະເທດ ແລະຍັງມີໜ້າທີ່ຊ່ວຍເຫຼືອໄພພິບັດຢູ່ຕ່າງປະເທດ ຖ້າຫາກປະເທດໃດຫາກມີໄພພິບັດເກີດຂຶ້ນກໍຈະສົ່ງກໍາລັງຄົນໄປຊ່ວຍປະເທດດັ່ງກ່າວ.
ທ່ານ ພັອ ຈັນຫອມ ແກ້ວສຸລະໄຊ ໄດ້ລາຍງານວ່າ: ມູນນິທິພິບານ ສປ ຈີນ ແລະ ມູນນິທິຈີນ ນະຄອນຫຼວງວຽງຈັນ ໄດ້ມາຊ່ວຍຝຶກອົບຮົມໃຫ້ພະນັກງານໜ່ວຍກູ້ໄພຂອງພວກເຮົາໄດ້ຮັບຮູ້ບົດຮຽນ ແລະຮັບໃຊ້ເຂົ້າໃນຕົວຈິງ,ສໍາລັບກົມຕໍາຫຼວດສະກັດກັ້ນ ແລະ ຕ້ານອັກຄີໄພແມ່ນກົມສະເພາະໜຶ່ງທີ່ຂຶ້ນກັບກົມໃຫຍ່ກະຊວງປ້ອງກັນຄວາມສະຫງົບເຮັດໜ້າທີ່ເປັນເສນາທິການໃຫ້ແກ່ກົມໃຫຍຕໍ່າຫຼວດກະຊວງປ້ອງກັນຄວາມສະຫງົບໃນວຽກງານສະກັດກັ້ນຕ້ານອັກຄີໄພ ແລະ ກູ້ໄພ, ດ້ານວຽກງານວິຊາສະເພາະແມ່ນເລັ່ງໃສ່ປ້ອງກັນ, ສະກັດກັ້ນ,ຕ້ານອັກຄີໄພ ແລະ ກູ້ໄພເປັນຫຼັກ, ວຽກງານສະກັດກັ້ນແມ່ນອີງໃສ່ໂຄສະນາ, ການໂຄສະນາແມ່ນລົງຮາກຖານແຕ່ລະສະຖານທີ່ໂດຍສະເພາະພື້ນທີ່ ສຳນັກງານ, ໂຮງງານ ແລະ ວຽກງານກວດດກາຄວາມປອດໄພທາງດ້ານອັກຄີໄພບັນດາພື້ນຖານຕ່າງໆ ນັບແຕ່ການອອກແບບ, ການປຸກສ້າງອາຄານ ແລະ ອື່ນໆ. ວຽກງານຕ້ານອັກຄີໄພການອອກແກ້ເຫດໃນກໍລະນີມີໄຟໄໝ້ (ກໍຄືໄປມອດໄຟ), ກົມພວກເຮົາເປັນຫ້ອງການແຈ້ງເຫດສຸກເສີນເວລາເກີດໄຟໄໝ້ ຈະມີສາຍໂທເຂົ້າຫາສາຍດ່ວນ1190 ແລະ ທາງກົມພວກເຮົາຈະແຈ້ງຫາ ພະແນກມອດໄຟ ປກສ ນະຄອງຫຼວງຈະສົມທົບກັບ 1628.
ທ່ານໄດ້ລາຍງານຕື່ມວ່າ: ອັກຄີໄພທີ່ເກີດຂຶ້ນໃນໄລຍະເດືອນມັງກອນ ຫາ ເດືອນ ເມສາ 2024 ນີ້ ທົ່ວປະເທດມີອັກຄີໄພທີ່ເກີດຂຶ້ນທັງໝົດ 96 ຄັ້ງ.ຜົນເສຍຫາຍມີດັ່ງນີ້: ເສຍຊີວິດ 6 ຄົນ, ບາດເຈັບ 2 ຄົນ, ປະເພດອາຄານທີ່ຢູ່ອາໄສ 62 ຫຼັງ, ອາຄານ ວັດ 2 ຫຼັງ, ໂຮງເລື່ອຍ 2 ຫຼັງ, ຫໍຄອຍເດີ່ນບິນເກົ່າ 1 ຫຼັງ, ແຄັມກຳມະກອນ 1 ຫຼັງ, ຮ້ານສ້ອມແປງລົດຈັກ 1 ຮ້ານ, ລົດໃຫຍ່ 8 ຄັນ ແລະ ອື່ນໆອີກຈໍານວນໜຶ່ງ.
(ຂ່າວ-ພາບ: ບຸນອູ້ມ)
ຄໍາເຫັນ