ເມືອງເກົ່າເຈົ່າຮົ້ວມີວັດທະນະທຳ ປະຫວັດສາດອັນຍາວນານໃນສາມອານາຈັກ

ໃນເຂດເມືອງເກົ່າເຈົ່າຮົ້ວ ມີເນື້ອທີ່ທັງໝົດ 29 ເຮັກຕາ,ມີແມ່ນໍ້າສອງສາຍໄຫຼຜ່ານ,ອ້ອມຮອບດ້ວຍພູຜາທີ່ສູງຊັນ.

ທ່ານ ນາງ ຫຼີຟີຫົງ ຜູ້ອະທິບາຍໃຫ້ນັກທ່ອງທ່ຽວທີ່ເມືອງເກົ່າເຈົ່າຮົ້ວ ໃຫ້ຮູ້ວ່າ: ດ້ານໜ້າເຂົ້າເມືອງເກົ່າເຈົ່າຮົ້ວມີປະຕູໂຂງຈ່າມົງ ແລະ ໃນປີ 1972 ໄດ້ຖືກປ່ຽນຊື່ໃໝ່ເປັນປະຕູໂຂງເຈົ່າຮົ້ວ,ມີເສັ້ນທາງເກົ່າ ຊຶ່ງປັດຈຸບັນປະຊາຊົນໄດ້ມາຕັ້ງຮ້ານຂາຍເຄື່ອງທີ່ລະນຶກ,ອາຫານ,ເຂົ້າໝົມ ແລະ ອື່ນໆທີ່ດ້ານຂ້າງຂອງເສັ້ນທາງ,ໃນນັ້ນຍັງມີປະຕູໂຂງຕາເວັນອອກຂອງເມືອງເກົ່າໃນສະໄໝເກົ່າ ຊຶ່ງມີຊື່ວ່າປະຕູຈັນຟົງມີປະຫວັດສາດ 500 ກວ່າປີ,ເມື່ອກ່ອນກຳແພງປະຕູ 2 ດ້ານແມ່ນເຄີຍຖືກທຳລາຍແຕ່ປັດຈຸບັນແມ່ນໄດ້ຮັບການບູລະນະສ້ອມແປງຄືນໃໝ່ໃຫ້ຢູ່ໃນສະພາບເດີມ,ມີຖະໜົນການຄ້າ,ມີເຮືອນຂອງຕະກຸນກູ່ໃນສະໄໝເກົ່າຊຶ່ງເປັນຜູ້ທີ່ມີອຳນາດສູງໃນປະຫວັດສາດ 400 ກວ່າປີໄດ້ຮັບການບູລະນະ ແລະ ຮັກສາເປັນຮູບຊົງແບບເກົ່າ,ປັດຈຸບັນເຮືອນດັ່ງກ່າວໄດ້ພັດທະນາເປັນໂຮງແຮມຊຶ່ງນັກທ່ອງທ່ຽວສາມາດເຂົ້າໃຊ້ບໍລິການພັກໄດ້,ໃນນັ້ນຍັງມີຖະໝົນເຊຍຢາທີ່ເປັນເສັ້ນທາງເຂົ້າໄປບ່ອນເຮັດວຽກຂອງເຈົ້າເມືອງໃນເມື່ອກ່ອນ,ປັດຈຸບັນໄດ້ພັດທະນາເປັນສະຖານທ່ອງທ່ຽວທີ່ເກົ່າແກ່ ແລະ ເປັນບ່ອນເຮັດກິດຈະກຳໃນມື້ວັນສຳຄັນຕ່າງໆຂອງຈີນ, ໃນນັ້ນຍັງມີຫ້ອງເລົ່ານິທານເລື່ອງຈິງກ່ຽວກັບປະຫວັດສາດ 3 ອານາຈັກອີກດ້ວຍ, ປັດຈຸບັນ ປະຊາຊົນທີ່ດຳລົງຊີວິດຢູ່ ຂອບເຂດເມືອງເກົ່າເຈົ່າຮົ້ວ ທີ່ເມືອງກວາງຮັນ ແຂວງເສສວນ ມີຈຳນວນ 1.200 ຄົນ ໃນນັ້ນໄດ້ຢຶດຖືອາຊີບເຮັດທຸລະກິດຄ້າຂາຍເປັນອາຊີບຫຼັກ.

(ຂ່າວ-ພາບ: ສຳນານ)