ວັນທີ 12 ກຸມພາ ນີ້, ຢູ່ທີ່ສະໂມສອນຫ້ອງວ່າການເມືອງໂຂງ ແຂວງຈຳປາສັກ ໄດ້ຈັດພິທີສະເຫຼີມສະຫຼອງວັນເກີດປະທານ ຄຳໄຕ ສີພັນດອນ ຄົບຮອບ 100 ປີ (ວັນທີ 8 ກຸມພາ 1924 - ວັນທີ 8 ກຸມພາ 2024), ເພື່ອເປັນການສັນລະເສີນຄຸນງາມຄວາມດີ, ຄວາມເສຍສະຫຼະອຸທິດຕົນ ແລະ ຜົນງານອັນໃຫຍ່ຫຼວງຂອງ ປະທານ ຄໍາໄຕ ສີພັນດອນ ຕໍ່ພາລະກິດ ປະຕິວັດຊາດ ປະຊາທິປະໄຕ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ທັງເປັນການສຶກສາອົບຮົມ ແລະ ປຸກລະດົມໃຫ້ສະມາຊິກພັກ, ພະນັກງານ, ກໍາລັງປະກອບອາວຸດ, ມະຫາຊົນ ແລະ ຄົນຮຸ່ນຫຼັງ ໄດ້ນໍາເອົານໍ້າໃຈເສຍສະຫຼະ, ຄຸນສົມບັດສິນທໍາປະຕິວັດ, ແບບແຜນນໍາພາ, ແບບແຜນວິທີເຮັດວຽກ ແລະ ແບບແຜນດໍາລົງຊີວິດ ຕະຫຼອດຮອດແນວຄິດຊີ້ນໍາຂອງເພິ່ນໄປຮໍ່າຮຽນ, ໄປເປັນແວ່ນແຍງ ແລະ ເປັນການຜັນຂະຫຍາຍ ເພື່ອນໍາໄປປະຕິບັດເຂົ້າໃນໜ້າທີ່ຂອງຕົນ.
ເຂົ້າຮ່ວມໃນພິທີຄັ້ງນີ້, ມີທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ, ມີບັນດາຄະນະປະຈຳພັກແຂວງ, ກຳມະການພັກແຂວງ, ຫົວໜ້າ-ຮອງຫົວໜ້າພະແນກການອ້ອມແຂວງແຂວງ, ເຈົ້າເມືອງ 9 ຕົວເມືອງ 1 ນະຄອນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນຕອນເຊົ້າຂອງວັນດຽວກັນນີ້, ທີ່ສຳນັກງານເມືອງໂຂງ ໄດ້ມີພິທີເປີດຂະບວນການຂີ່ລົດຖີບອ້ອມດອນໂຂງ ໂດຍເລີ່ມຈາກສໍານັກງານເມືອງ ຊຶ່ງມີຈຳນວນຜູ້ເຂົ້າຮ່ວມ 100 ກວ່າທ່ານ ແລະ ໄດ້ມີພິທີເປີດທ່ຽວຊົມຮູບພາບການເຄື່ອນໄຫວຂອງ ປະທານ ຄໍາໄຕ ສີພັນດອນ ທີ່ບ້ານຫົວໂຂງພະໃຫຍ່.
(ຂ່າວ-ພາບ: ພຸດທະສິນ ວົງວິໄລທອງ).
ຄໍາເຫັນ