ເມືອງລອງ ປາຖະກະຖາວັນສ້າງຕັ້ງກໍາລັງປ້ອງກັນຄວາມສະຫງົບ

ເມືອງລອງ ແຂວງຫຼວງນໍ້າທາ ໄດ້ຈັດພິທີປາຖະກະຖາວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 63ປີ (ວັນທີ 5 ເມສາ ປີ 1961 - ວັນທີ 5 ເມສາ 2024) ຂຶ້ນໃນວັນທີ 3 ເມສາຜ່ານມາ ທີ່ເມືອງດັ່ງກ່າວ, ເປັນກຽດເຂົ້າຮ່ວມຂອງທ່ານ ບຸນຖອງ ລໍຫວັນວົງສາ ກໍາມະການປະຈໍາພັກເມືອງ ກໍາມະການແນວລາວສ້າງຊາດແຂວງ ປະທານແນວລາວເມືອງ ຜູ້ຊີ້ນໍາອົງການຈັດຕັ້ງມະຫາຊົນ, ມີທ່ານ ພັນໂທ ນິດສະວົງ ຄຸນພະຈັນສີ ເລຂາຄະນະພັກຮາກຖານ ຫົວໜ້າກອງບັນຊາການປ້ອງກັນຄວາມສະຫງົບເມືອງ, ມີກໍາມະການປະຈໍາພັກເມືອງ,ກໍາມະການພັກເມືອງ, ຫົວໜ້າຫ້ອງການ, ຮອງຫ້ອງການ, ສອງກອງກໍາລັງປ້ອງກັນຊາດ - ປ້ອງກັນຄວາມສະຫງົບ ຕະຫຼອດຮອດພະນັກງານລັດຖະກອນເຂົ້າຮ່ວມ.
    ໃນພິທີ, ທ່ານ ພັນໂທນິດສະວົງ ຄຸນພະຈັນສີ ເລຂາຄະນະພັກຮາກຖານ ຫົວໜ້າກອງບັນຊາການປ້ອງກັນຄວາມສະຫງົບເມືອງ ໄດ້ປາຖະກະຖາມູນເຊື້ອວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 63 ປີ ໂດຍຍົກໃຫ້ເຫັນເຖີງການກໍາເນີດ, ເຕີບໃຫຍ່ຂະຫຍາຍຕົວ, ຜົນງານອັນພົ້ນເດັ່ນ ແລະ ທາດແທ້ ມູນເຊື້ອອົງອາດກ້າຫານຂອງກໍາລັງປ້ອງກັນຄວາມສະຫງົບ. ຈາກນັ້ນ, ທ່ານ ພັນໂທ ບຸນຈອນ ທັນທະວົງ ຄະນະພັກຮາກຖານຮອງກອງບັນຊາການ ປກສ ເມືອງ ໄດ້ຜ່ານຜົນງານ ແລະ ໄຊຊະນະຂອງກໍາລັງ ປກສ ເມືອງລອງໃນໄລຍະໜຶ່ງປີຜ່ານມາສາມາດຍາດໄດ້ຜົນງານຫຼາຍດ້ານເປັນຕົ້ນ: ວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ວຽກງານຄຸ້ມຄອງພົນລະເມືອງ, ກໍ່ສ້າງຮາກຖານການເມືອງ, ວຽກງານປັບປຸງກໍ່ສ້າງກໍາລັງ, ວຽກງານຮັບປະກັນດ້ານພາລາທິການ ແລະ ວຽກງານຍົກສູງຄຸນນະພາບເປັນເສນາທິການໃຫ້ຄະນະບັນຊາແຕ່ລະຂັ້ນ. ໃນພິທີກໍ່ໄດ້ຜ່ານຂໍ້ຕົກລົງຂອງກະຊວງປ້ອງກັນຄວາມສະຫງົບວ່າດ້ວຍການເລື່ອນຊັ້ນໃຫ້ນາຍຕໍາຫຼວດກອງບັນຊາການ ປກສ ເມືອງລອງ ຈໍານວນ 10 ທ່ານ. ໃນນີ້, ເລື່ອນຊັ້ນພັນຕີຂຶ້ນຊັ້ນພັນໂທ 1 ທ່ານ, ເລື່ອນຊັ້ນຮ້ອຍເອກຂຶ້ນເປັນພັນຕີ 2 ທ່ານ ແລະ ເລື່ອນຊັ້ນຮ້ອຍຕີຂື້ນຮ້ອຍໂທ 7 ທ່ານ, ໃຫ້ກຽດປະດັບຊັ້ນໂດຍທ່ານ ບຸນຖອງ ລໍຫວັນວົງສາ.
 (ຂ່າວ: ຈັນສຸກ ຜົນປະເສີດ)